មន្ត្រីអភិរក្សផ្នែកបរិស្ថាន រួមជាមួយអង្គការខ្លាត្រី អភិរក្សពពួកសត្វចតុប្បាទនៅក្នុងតំបន់រ៉ាមសារ​ដងទន្លេមេគង្គ

មន្ត្រីបរិស្ថានសហការជាមួយអង្គការខ្លាត្រី ដាក់ការមេរ៉ាសុវត្ថិភាពនៅតាមដងទន្លេមេគង្គលើក្នុងស្រុកបុរីអូរស្វាយ​សែន​ជ័យ ខេត្តស្ទឹងត្រែង ចំណុចដែលមានសត្វចតុប្បាទរស់នៅក្នុងភូមិសាស្ត្រតំបន់រ៉ាមសារ ដើម្បីបន្ថែមយន្តការអភិរក្ស និងបានពិនិត្យវត្តមានពពួកសត្វទាំងនេះកំពុងធ្វើសកម្មភាពចាប់ចំណីស៊ីជាអាហាររបស់វាផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ឈន ឆន អនុប្រធានការិយាល័យអភិរក្សធនធានធម្មជាតិ នៃមន្ទីរបរិស្ថានខេត្តស្ទឹងត្រែង បានបញ្ជាក់ថា ការធ្វើបែបនេះ យើងបង្កើនការអភិរក្សផង និងបានពិនិត្យមើលពពួកសត្វគ្រប់ប្រភេទដែលកំពុងរស់នៅតំបន់រ៉ាមសារ បន្ទាប់ពីកន្លងមក មានអ្នកប្រមាញ់បង្កឱ្យបាត់បង់ប្រភេទសត្វមួយចំនួនដែលយើងកំពុងការពារ។

លោកថា តាមរូបភាពបង្ហាញចេញពីការមេរ៉ាសុវត្ថិភាពបន្ទាប់ពីវត្តមានសត្វស្លាប់មានសត្វខ្លាត្រី- ឆ្នាដាវ–ឆ្នាព្រៃ-ភេខ្លួនលោង-ភេរោមច្រមុះ-សំពូចធំ ដែលវាធ្វើសកម្មភាពរកចំណីពេលយប់ដូចជាចាប់កង្កែបស៊ីជាអាហារជាដើម ។

លោក វង្ស ឬទ្ធី មន្ត្រីអង្គការខ្លាត្រីបានបញ្ជាក់ថា នេះជារួបភាពពិតប្រាកដបានបង្ហាញពីសកម្មភាពពពួកសត្វទាំងនេះកំពុងរស់នៅតាមព្រៃលើកោះក្នុងតំបន់រ៉ាមសារ ដូចប្រជាពលរដ្ឋនិយាយមែន ហើយចំណុចនេះមន្ត្រីអង្គការសត្វខ្លានឹងបន្តដាក់ការមេរ៉ាសុវត្តិភាពបន្ថែមបានចំនួន២០មកហើយនេះ ។

លោកបន្តថា ក្រុមការងារអង្គការខ្លាត្រី សហការជាមួយមន្ត្រីបរិស្ថាននិងប្រជាសហគមន៍តាមដានពិនិត្យមើលបន្ថែមទៀត ដើម្បីហាមការបរបាញ់ពីជនខិលខូច និងងាយស្រួលរៀបចំផែនការអភិរក្ស ដោយបែងចែកជាតំបន់សុវត្តិភាពសម្រាប់ឱ្យវារស់នៅ។

លោក យេន មី ប្រជាពលរដ្ឋរស់នៅលើភូមិកោះហិបបានទទួលស្គាល់ថា ជារឿយៗអាជ្ញាធរមូលដ្ឋានតែងអំពាវនាវឱ្យអភិរក្សសម្បត្តិធនធាននេះទាំងអស់គ្នា ដូចជាការឈប់កាប់ព្រៃលិចទឹក ឈប់បរបាញ់សត្វ ឈប់ប្រើឧបករណ៍ឆក់ត្រីជា​ដើម។

សូមបញ្ជាក់ថា មន្ត្រីអង្គការខ្លាត្រីដាក់ការមេរ៉ាសុវត្តិភាពបានចំនួន២០ហើយ នៅតាមចំណុចតំបន់រ៉ាមសារ ដែលមានពពួកសត្វគ្រប់ប្រភេទរស់នៅ។ ឆ្លងតាមឯកសារស្រាវជ្រាវរបស់ក្រសួងបិស្ថានបង្ហាញថា តំបន់រ៉ាមសារមានផ្ទៃដីកោះនិងព្រៃឈើលិចទឹកចំនួន១៤.៦០០ហិកតា និងមានសត្វចំនួន៩៧ប្រភេទរស់នៅ និងត្រីចំនួន១៣០ប្រភេទផងដែរ៕

អត្ថបទ៖ ងិនលីម