សម្ដេចតេជោ ហ៊ុន សែន សង្ឃឹមថា អង់គ្លេសនឹងពង្រឹងភាពជាដៃគូជាមួយអាស៊ាន បន្ទាប់ពីចាកចេញពីសហភាពអឺរ៉ុប

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២ បានបង្ហាញក្ដីសង្ឃឹមថា ចក្រភពអង់គ្លេសនឹងចូលរួមចំណែកកាន់តែច្រើនឡើង ជាពិសេសការពង្រឹងភាពជាដៃគូជាមួយបណ្ដាប្រទេសក្នុងតំបន់អាស៊ាន បន្ទាប់ពីចក្រភពអង់គ្លេស បានចាកចេញពីសហភាពអឺរ៉ុបហើយនោះ។

សម្ដេចតេជោ ហ៊ុន សែន បានថ្លែងក្នុងកិច្ចប្រជុំកំពូលស្ត្រីអាស៊ានលើកទី ២ នារសៀលថ្ងៃទី ១២ ខែតុលានេះថា នាពេលនេះ គឺជាឱកាសរបស់ចក្រភពអង់គ្លេស ដើម្បីពង្រឹងភាពជាដៃគូជាមួយបណ្ដាប្រទេសក្នុងតំបន់អាស៊ាន បន្ទាប់ពីចក្រភពអង់គ្លេសបានដកខ្លួនចេញពីសហភាពអឺរ៉ុប។

សម្ដេចតេជោ ហ៊ុន សែន​ បានយ៉ាងដូច្នេះថា «យើងធ្វើការកត់សម្គាល់ថា គឺជាឱកាសរបស់អង់គ្លេសសម្រាប់ភាពជាដៃគូជាមួយនឹងអាស៊ាន បន្ទាប់ពីអង់គ្លេសបានដកខ្លួនចេញពីសហភាពអឺរ៉ុប…អង់គ្លេសបានចូលក្នុងដំណាក់កាល ដែលអាស៊ានមានមូលដ្ឋានអំពីការផ្អាកការទទួលសមាជិក ដូច្នេះសង្ឃឹមថា អង់ភ្លេសនឹងចូលរួមចំណែកកាន់តែធំ ជាមួយនឹងអាស៊ានធ្វើការឲ្យបានច្រើនជាងមុន ជាមួយនឹងអាស៊ានដោយសារតែអង់គ្លេស បានទទួលផលប្រយោជន៍ពីអាស៊ាន ដោយមិនមានការប្រឹងប្រែងច្រើន ​នោះទេ ហើយឋិតនៅក្នុងដំណាក់ដែលអាស៊ានបានបង្កកការទទួលយកដៃថ្មី»៕

អត្ថបទ៖ ឃួន សុភ័ក្រ