កម្ពុជា និងប្រទេសសាយប្រឹសពិនិត្យលទ្ធភាព​ពង្រឹងទំនាក់ទំនងសេដ្ឋកិច្ចពាណិជ្ជកម្ម

អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា បានជួបពិភាក្សាការងារជាមួយ គណៈប្រតិភូប្រទេសសាយប្រឹស (Cyprus) ដែលដឹកនាំដោយលោក អេនដ្រីអាស វីរ៉ាស់ (Andreas Vyras) អភិបាលក្រុងឡាណាកា នៃប្រទេសសាយប្រឹស នៅថ្ងៃទី១៣ ខែតុលា ឆ្នាំ២០២២ ។ កិច្ចប្រជុំនេះ ប្រព្រឹត្តិទៅក្នុងគោលបំណងពិភាក្សា​អំពីស្ថានភាពសេដ្ឋកិច្ច និងឱកាសក្នុងការវិនិយោគរវាងប្រទេសកម្ពុជា និងប្រទេសសាយប្រឹស។

ថ្លែងក្នុងកិច្ចប្រជុំនេះ អ្នកឧកញ៉ាប្រធាន បានស្វាគមន៍ប្រតិភូប្រទេសសាយប្រឹស មកកាន់កម្ពុជា និងជំរុញលើកទឹកចិត្ត​ពង្រឹង​ទំនាក់​ទំនងសេដ្ឋកិច្ចតាមរយៈការផ្សារភ្ជាប់រវាងសភាពាណិជ្ជកម្មកម្ពុជា និងសភាពាណិជ្ជកម្ម និងឧស្សា​ហកម្មសាយប្រឹស។

ជាមួយគ្នានេះ លោកអភិបាលក្រុង ក្រុងឡាណាកា នៃប្រទេសសាយប្រឹស ​បានចែករំលែកអំពីសក្តានុពល និងស្ថានភាពសេដ្ឋកិច្ច នៃប្រទេសសាយប្រឹស ព្រមទាំងបានគូសបញ្ជាក់ពីភូមិសាស្ត្រសេដ្ឋកិច្ចរបស់សាយប្រឹស​ដែលដើរតួជាច្រកសេដ្ឋកិច្ចរវាងតំបន់អឺរ៉ុប និងមជ្ឈិមបូព៌ា។

កិច្ចប្រជុំនេះបានបញ្ចប់ជាមួយលទ្ធផលដ៏ល្អប្រសើរ ដោយភាគីទាំងសងខាងបានឯកភាព លើការរៀបចំចុះអនុស្សារណៈ​នៃការយោគយល់រវាងសភាពាណិជ្ជកម្មប្រទេសទាំងពីរ  និងពិនិត្យលទ្ធភាពក្នុងការរៀបចំគណៈប្រតិភូធុរជនសាយ​ប្រឹសមកបំពេញទស្សនកិច្ចនៅកម្ពុជា ឬគណៈប្រតិភូធុជនកម្ពុជា ទៅកាន់ទីក្រុងសាយប្រឹស៕