ថ្ងៃសៅរ៍៖ ទេសចរទៅកម្សាន្តនៅ​ខេត្តព្រះសីហនុ ​៦ម៉ឺននាក់ កើនឡើង ១ម៉ឺននាក់ ធៀបសប្តាហ៍មុន

នៅថ្ងៃសៅរ៍ចុងសប្ដាហ៍ ម្សិលមិញ ត្រូវនឹងថ្ងៃទី១៥ ខែតុលា ឆ្នាំ២០២២ មានភ្ញៀវទេសចរជាតិ និង អន្តរជាតិ មកលេងកម្សាន្ត ក្នុងក្រុងព្រះសីហនុ មានប្រមាណជាង ៦ម៉ឺននាក់ កើនឡើងបើប្រៀបធៀបទៅនឹងថ្ងៃសៅរ៍ សប្តាហ៍មុន ដែលមានត្រឹមជិត៥ម៉ឺននាក់ប៉ុណ្ណោះ។

បើតាមរដ្ឋបាលខេត្តព្រះសីហនុ បានបញ្ជាក់ថា កំណើនភ្ញៀវទេសចរនេះ ក្រោយមានការដាក់ឱ្យដំណើរការសាកល្បងផ្លូវ​ល្បឿនលឿនភ្នំពេញ-ព្រះសីហនុ រយៈពេល០១ខែ ចាប់ពីថ្ងៃទី០១ ដល់ថ្ងៃទី៣១ ខែតុលាឆ្នាំ ២០២២ ដោយមិនមាន​ការបង់ប្រាក់ និងការអភិវឌ្ឍន៍ហេដ្ឋារចនាសម្ព័ន្ធ ការការពារសន្តិសុខ សណ្តាប់ធ្នាប់ អនាម័យ បរិស្ថានបានយ៉ាង​ល្អប្រសើរ ដែលជាការទាក់ទាញភ្ញៀវទេសចរជាតិ និងអន្តរជាតិចង់មកកម្សាន្តក្នុងខេត្តព្រះសីហនុ។

លោក គួច ចំរើន អភិបាលខេត្តព្រះសីហនុបានស្នើឱ្យ លោកមេបញ្ជាការ​កងរាជអាវុធហត្ថខេត្ត​ត្រូវបង្កើនកម្លាំងយាម​ល្បាត​នៅតាមគោលដៅនានា ក្នុងភូមិសាស្រ្តខេត្តព្រះសីហនុ

ដើម្បីការពារសន្តិសុខ សុវត្ថិភាពជូនប្រជាពលរដ្ឋនិងភ្ញៀវទេសចរ ខណៈភ្ញៀវទេសចរជាតិនិងអន្តរជាតិមានកំណើនខ្ពស់ ។

លោកអភិបាលខេត្តបានមានប្រសាសន៍ថា ការបើកឱ្យដំណើរការសាងល្បងផ្លូវល្បឿនលឿនរយៈពេលមួយខែ គឺភ្ញៀវទេសចរ បានធ្វើដំណើរតាមផ្លូវល្បឿនលឿនមកកាន់ខេត្តព្រះសីហនុមានការកើនឡើងពិសេសនៅចុងសប្តាហ៍។ «ដូចនេះខ្ញុំស្នើសុំឱ្យលោកមេបញ្ជាការកងរាជអាវុធហត្ថខេត្តត្រូវបង្កើនកម្លាំងយាមល្បាតនៅតាមគោលដៅនានា ក្នុងភូមិសាស្រ្តខេត្តព្រះសីហនុ ដើម្បីការពារសន្តិសុខ សុវត្ថិភាពជូនប្រជាពលរដ្ឋ និងភ្ញៀវទេសចររបស់យើង»៕ សំអឿន