ព័ត៌មានជាតិ

រាជរដ្ឋាភិបាលបន្តផ្តល់ស្រូវពូជដល់កសិករដែលរងគ្រោះនិងប៉ះពាល់ដំណាំស្រូវដែលលិចលង់

បានផុស

៣ years មុន

នៅ

ថ្ងៃសុក្រ ២៨ តុលា ២០២២

ដោយ

កំពង់ចាម ៖ នៅរសៀលថ្ងៃទី២៨ ខែតុលា ឆ្នាំ២០២២ លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានចូលរួមអមដំណើរ លោក ឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តា អភិវឌ្ឍន៍វិស័យកសិកម្ម និងជនបទ និងជាប្រធានក្រុមការងារចុះជួយខេត្តកំពង់ចាម អញ្ជើញចុះជួបសំណេះសំណាល និងចែកពូជស្រូវ អំណោយដ៏ថ្លៃថ្លារបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា ជូនប្រជាកសិករដែលរងផលប៉ះពាល់ដោយទឹកជំនន់ សរុបចំនួន២៥១៧គ្រួសារ ស្មើនឹង៩ឃុំ ៥៣ភូមិ លើផ្ទៃដី៣១៣៩ហិចតា ក្នុងស្រុកបាធាយ ខេត្តកំពង់ចាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីនេះក៏មានការអញ្ជើញចូលរួមពីសំណាក់លោក វេង សាខុន រដ្ឋមន្ត្រីប្រតិភូអមនាយករដ្ឋមន្ត្រី លោក ឌិត ទីណា រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ ឯកឧត្តម លោកជំទាវសមាជិកព្រឹទ្ធសភា អ្នកតំណាងរាស្ត្រ មណ្ឌលកំពង់ចាម មន្ទីរអង្គភាពជុំវិញខេត្ត អាជ្ញាធរមូលដ្ឋាន និងមន្ត្រីពាក់ព័ន្ធ ព្រមទាំងបងប្អូនប្រជាកសិករយ៉ាងច្រើនកុះករ នៅក្នុងបរិវេណវិទ្យាស្ថានកូរ៉េ ស្រុកបាធាយ ខេត្តកំពង់ចាម។

ឆ្លៀតឱកាសនោះដែរ លោក ឌិត ទីណា រដ្ឋមន្ត្រីក្រសួងកសិកម្មរុក្ខាប្រម៉ាញ់ និងនេសាទ បានជម្រុញដល់ប្រជាពលរដ្ឋទាំងអស់ ខិតខំប្រឹងប្រែងយកស្រូវពូជរបស់រាជរដ្ឋាភិបាលដែលផ្តល់ជូននៅពេលនេះ សម្រាប់ស្តារឡើងវិញបន្ទាប់ពីជំនន់ទន្លេមេគង្គ និងជំនន់ទឹកភ្លៀង ។ ស្រូវពូជដែលផ្តល់នៅពេលនេះ គឺដើម្បីឲ្យប្រជាពលរដ្ឋ មានលទ្ធភាពក្នុងបង្កបង្កើនផលបានទាន់ពេលវេលា និងបង្កើនសេដ្ឋកិច្ចគ្រួសាររបស់ឡើងវិញ។

ដោយឡែក លោកឧបនាយករដ្ឋមន្ត្រី យឹម ឆៃលី បានថ្លែងថា មានតែសម្តេចតេជោ ទេដែលតែងតែយកចិត្តទុកដាក់ជាមួយប្រជាពលរដ្ឋខ្លួនគ្រប់កាលៈទេសៈ ដោយមិនប្រកាន់និន្ទាកាលអ្វីពោលគឺឲ្យតែពលរដ្ឋជួបបញ្ហាក្នុងនាមរដ្ឋាភិបាលកម្ពុជា បានផ្តល់ជាស្បៀងជួយសង្គ្រោះជានិច្ច។ ជាក់ស្ដែងដូចពេលនេះ ស្រូវពូជរបស់រាជរដ្ឋាភិបាល តាមរយៈប្រព័ន្ធស្បៀងបម្រុងកម្ពុជា ជូនដល់ប្រជាកសិករក្នុងស្រុកបាធាយ គឺជាសាក្សីភាពមួយបង្ហាញឲ្យឃើញថា រដ្ឋាភិបាលគឺតែនៅក្បែរពលរដ្ឋគ្រប់ពេលវេលា៕

អត្ថបទនិងរូបភាព ៖ ឡេក ចាន់ពេជ្រ