កម្ពុជាត្រៀមសាកល្បងអនុវត្តកម្មវិធីអប់រំភាសាចិន តាមវិទ្យាល័យចំនួន ២០

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានឱ្យ “កម្ពុជាថ្មី” ដឹងនៅថ្ងៃទី១០ ខែវិច្ឆិកា ឆ្នាំ២០២២​ នេះថា អនុស្សរណៈនៃការយោគយល់គ្នារវាងក្រសួងអប់រំ យុវជន និងកីឡា នៃព្រះរាជាណាចក្រកម្ពុជា និងក្រសួងអប់រំនៃសាធារណរដ្ឋប្រជាមានិតចិន ស្តីពី ការអភិវឌ្ឍកម្មវិធីអប់រំភាសាចិនរួមគ្នានៅតាមសាលាមធ្យមសិក្សា បានឈានដល់ដំណាក់កាលសាកល្បងអនុវត្តកម្មវិធីអប់រំភាសាចិន នៅតាមវិទ្យាល័យចំនួន ២០ នៅក្នុង ២ ទៅ ៣ខេត្ត។

ចំពោះ ពេលវេលាចាប់ផ្ដើម កម្មវិធីរៀនភាសាចិននៅគ្រឹះស្ថានមធ្យមសិក្សាសាធារណៈ, រាជធានីខេត្តក្រុងដែលចាប់ផ្ដើមអនុវត្តសាកល្បង, លក្ខខណ្ឌសិស្សចូលសិក្សា, ចំនួនម៉ោងសិក្សាប្រចាំសប្ដាហ៍ និងបច្ចេកទេសសិក្សាជាដើមនោះ ត្រូវបាន លោក រស់ សុវាចា បញ្ជាក់បន្ថែមថា ក្រសួងអប់រំ យុវជន និងកីឡា នឹងបង្កើតគណៈកម្មការ ដើម្បីបន្តកិច្ចការជាមួយភាគី ចិន ដែលសេចក្តីលម្អិតបន្ថែម អាចនឹងជូនដំណឹងនៅពេលក្រោយ។

អ្នកនាំពាក្យក្រសួងអប់រំ យុវជន និងកីឡា រូបនេះ លើកឡើងថា អនុស្សរណៈនៃការយោគយល់គ្នានេះមានគោលបំណងលើកកម្ពស់ការផ្លាស់ប្ដូររវាងប្រជាជន និងប្រជាជន និងពង្រឹងមិត្តភាពរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន។

គួរបញ្ជាក់ថា កម្ពុជា-ចិន បានចុះហត្ថលេខលើឯកសារកិច្ចព្រមព្រៀងចំនួន ១៨ ក្រោយជំនួបរវាង សម្ដេចតេជោ ហ៊ុន សែន នាយករដ្ឋមន្ត្រីកម្ពុជា និងលោក លី ខឺឈាង នាយករដ្ឋមន្ត្រីចិន នៅវិមានសន្តិភាព នៅល្ងាច ថ្ងៃទី៩ ខែវិច្ឆិកានេះ។ ក្នុងនោះ កិច្ចព្រមព្រៀង ទី៨ ស្ដីពី វិញ្ញាបនបតប្រគល់-ទទួលគម្រោងជំនួយរបស់ប្រទេសចិន សម្រាប់កែលម្អបរិស្ថានសាលារៀន និងការផ្គត់ផ្គង់សម្ភារបរិក្ខារអប់រំនៅកម្ពុជា។ និងកិច្ចព្រមព្រៀងទី៩ ស្ដីពី អនុស្សារណៈយោគយល់គ្នា ក្នុងការអភិវឌ្ឍរួមគា្នលើកម្មវិធីរៀនភាសាចិន នៅតាមគ្រឹះស្ថានមធ្យមសិក្សាសាធារណៈ នៅកម្ពុជា៕

អត្ថបទ៖ ច័ន្ទ វីរៈ