មន្ត្រី​អះអាងមិនឲ្យតម្លៃស្រូវផ្ការំដួល ធ្លាក់ថ្លៃក្រោម ៩០០ រៀល​/គីឡូក្រាម

ឆ្លើយតប​កង្វល់ប្រជាកសិករដែលបានត្អួញត្អែរពីការ​ធ្លាក់ថ្លៃតម្លៃ​ស្រូវ​ ​មន្ទីរ​កសិកម្ម​ខេត្ត​បាត់ដំបងបាន​អះអាង​ពីការ​ធានា​តម្លៃ​ស្រូវ​​ ក្រោយ​ពីមានការ​បញ្ជូនមន្រ្តី​ក្រសួង​កសិកម្ម​ចុះ​មក​ដោះស្រាយ​ដល់​កសិករ។

លោក ឈឹម វជិរា ប្រធានមន្ទីរកសិកម្មខេត្តបាត់ដំបង​បានឲ្យដឹងថា នៅក្នុងស្រុកបវេល តម្លៃ​ស្រូវ​ផ្ការំដួល​សេីមចាប់ពីពេលនេះ​ទៅទទួលបានតម្លៃ ១,០៤៤.០០០៛ ក្នុងមួយតោន មិនអោយធ្លាក់​ចុះ​ដល់៩០០៛/គីឡូក្រាម​នោះទេ ដោយលោកបញ្ជាក់ថា បេីគេអោយលេីសពី ១០០០រៀលក្នុង មួយគីឡូក្រាម​​ បងប្អូនលក់ចុះ​ តែបើឈ្មួញឲ្យតម្លៃក្រោម ១០០០រៀលក្នុង ១គីឡូក្រាម លោក ឧកញ៉ា ភួ​ ពុយ​ បានសន្យា​ ទទួលទិញពីប្រជាកសិករក្នុងតម្លៃជាង ១០០០រៀល/គ.ក ដែលមានទីតាំងទទួលទិញនៅទីនោះផ្ទាល់​តែម្តង ។

លោកបានបញ្ជាក់ថាតម្លៃ​ស្រូវសេីម​ផ្ការំដួល​ :

១-ប្រភេទ​គុណភាព​ល្អ ឈ្មួញ​បានទិញពីកសិករផ្ទាល់​តម្លៃ​ពីជាង៨០០រៀល ដល់ជិត៩០០រៀល /គីឡូក្រាម​=​ ៩៨០.៦០០០៛-១.០០៩២០០៛ ក្នុង​១តោន។ ហើយឈ្មួញ​ឬកសិករ​លក់ផ្ទាល់​នៅក្រុមហ៊ុនបៃតង​ភីអិលសុី​ តម្លៃ​ជាង១០០០រៀល/គីឡូក្រាម​ =១.០៧៨៨០០៛-១.១០២.០០០៛​ ក្នុង ១តោន។

២​,ប្រភេទគុណភាពមធ្យម​ (លេខ២) ឈ្មួញ​ទិញពីសិករផ្ទាល់​តម្លៃជិត១០០០រៀល/គីឡូក្រាម​=៩៥១.២០០៛-៩៦២.៨ ០០៛​ ក្នុង​មួយ​តោន ហើយឈ្មួញឬកសិករលក់ផ្ទាល់នៅក្រុមហ៊ុន បៃតង ភីអិលស៊ី បានតម្លៃជាង១០០០រៀល/គីឡូក្រាម=១,០៤៤. ០០០៛​ ក្នុង​ ១តោន។

គួរ​បញ្ជាក់ថា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោក ឌិត ទីណា បានចាត់បញ្ជូនអនុរដ្ឋលេខាធិការក្រសួងកសិកម្មចំនួន ២ នាក់ គឺលោក ឃី កុសល និងលោក ឈុំ ឆុនលី ចុះដោះស្រាយបញ្ហាតម្លៃស្រូវ​ចុះថោក ដែល​ធ្វើឲ្យប៉ះពាល់សេដ្ឋកិច្ចគ្រួសាររបស់ប្រជាកសិករយ៉ាងធ្ងន់ធ្ងរ។

ក្រសួងកសិកម្មបានឆ្លើយតបលើការ​ធ្លាក់ថ្លៃ​តម្លៃ​ស្រូវកើតមានមិនខុសពីឆ្នាំមុនៗនោះទេ ដោយឆ្នាំនេះប្រជាកសិករបានប្រមូលផលស្រូវផ្ការំដួលចាប់ពី ខែវិច្ឆិកា ដល់ពាក់កណ្តាលខែធ្នូ។ ការប្រមូលផលរបស់ប្រជាកសិករនេះបង្កឱ្យរោងម៉ាស៊ីនកិនស្រូវកកស្ទះ ទើបធ្វើឲ្យប៉ះពាល់ដល់តម្លៃស្រូវតែម្តង៕

អត្ថបទ៖ សៅ រិទ្ធិ