ជប៉ុន​សាកល្បង​​ម៉ាស៊ីនឈូសដី​ប្រើ​បច្ចេកវិទ្យា​ឡាស័រ​ ដាំដុះ​ស្រូវ​ទទួលទិន្នផលខ្ពស់

លោក KISHI KAWA អគ្គនាយអង្គការ Tokyo JMas HQ បានដឹកនាំក្រុមការងារជួប​​ពិភាក្សាការងារជាមួយលោក សុខ លូ អភិបាលខត្តបាត់ដំបង ដើម្បីបង្ហាញពីគម្រោងអភិវឌ្ឍន៍ភូមិសុវត្ថិភាព និងពីគម្រោងកែលម្អដីកសិកម្មដែលស្ថិតនៅតាមបណ្តាស្រុកគោលដៅ ដែលបានអនុវត្តដោយ​អង្គការសកម្មភាពកំចាត់មីនជប៉ុន (JMAS.ជេម៉ាស់)។

លោក KISHI.KAWA បានបញ្ជាក់ថា អង្គការសកម្មភាពកំចាត់មីនជប៉ុន ​(JapanMineActionServiceJMAS) គឺជាអង្គការក្រៅរដ្ឋាភិបាលកម្រិតអន្តរជាតិមានទីស្នាក់ការកណ្ដាលនៅទីក្រុងតូក្យូប្រទេសជប៉ុន។ អង្គការ (JMAS) បានសហការជាមួយមជ្ឈមណ្ឌលសកម្មភាពកំចាត់មីនកម្ពុជាក្នុងការអនុវត្តនូវគម្រោងជាច្រើន ក្នុងនោះមានគម្រោង​មួយឈ្មោះថា “គម្រោងកសាងភូមិសុវត្ថិភាព (Safety Village Construction Project SVC) ដែលទទួលជំនួយទាំងស្រុងពីក្រុមហ៊ុនផលិតគ្រឿងចក្រសាងសង់មានឈ្មោះថា “ក្រុមហ៊ុនកុម៉ាត់ស៊ុ KOMATSU Ltd” ចាប់តាំងពីឆ្នាំ២០០៨ នៅក្នុងខេត្តបាត់ដំបងនិងខេត្តបន្ទាយមានជ័យ។

លោកអគ្គនាយក JMAS ជប៉ុន បានឲ្យដឹងទៀតថា នៅឆ្នាំ ២០២០ ក្រុមហ៊ុន KOMATSU បាននាំយកម៉ាស៊ីន​ឈូសដីដែលប្រើបច្ចេកកវិទ្យាឡេស័រ (LASER) ដែលអាចឈូសពង្រាបដីស្រែឲ្យមានកំរិតនីវ៉ូទឹកស្មើគ្នា មកបំពាក់ លើគម្រោង PMS ក្នុងនាមជា”គម្រោងសាកល្បង”របស់ខ្លួន។

ការ​សាកល្បងក្នុងការនាំយកគ្រឿងចក្រ​ឈូសឆាយកៀរពង្រាបដី ដើម្បីជួយដល់ប្រជាកសិកររស់នៅក្នុងស្រុកគោលដៅ​លើ​វិស័យកសិកម្មដាំដំណាំស្រូវឲ្យទទួលបានទិន្នផលខ្ពស់។

លោកបន្ត​ថា ដោយសារតែវិបត្តិជាសាកលពីជំងឺកូវីដ ការអនុវត្តគម្រោងបានខកខានមួយរយះ ហើយអ្នកជំនាញមកពីប្រទេសជប៉ុនក៏បានផ្អាកសកម្មភាពផងដែរ។ តែក្រុមហ៊ុននៅតែបន្តផ្តល់ជំនួយដើម្បីជួយឈូសពង្រាបដីស្រែជូនប្រជាកសិករជាធម្មតាក្រោយពីវិបត្តិកូវីដ ១៩ បានបញ្ចប់។

បើទោះបីមិនទាន់ពង្រីកគោលដៅសកម្មភាពរបស់ខ្លួនឲ្យបានទូលំទូលាយក៏ដោយ អង្គការ​របស់​ជប៉ុននេះ​បានរិះរកយុទ្ធសាស្ត្រជាច្រើន ដើម្បីបន្តការកែលម្អនិងពង្រីកគម្រោងរបស់ខ្លួនក្នុងគោលដៅការលើកកំពស់នូវជីវភាពប្រជាពលរដ្ឋ៕

អត្ថបទ៖ សៅ សារិទ្ធ