សណ្ឋាគារ ផ្ទះសំណាក់ បឹងហ្គាឡូ រីសត ខុស​គ្នា​ដូចម្ដេច?

សណ្ឋាគារនិង​សេវាស្នាកនៅ​ទេសចរណ៍​ ត្រូវ​បាន​បែងចែកទៅ​តាម​ប្រភេទ​អាជីវកម្ម​​។ ក្រសួង​ទេសចរណ៍​បាន​រៀបចំ​បទប្បញ្ញត្តិ​គតិយុត្តិ​ពាក់​ព័ន្ធ​អាជីវកម្ម​សណ្ឋាគារ និង​សេវា​ស្នាក់នៅ​ទេសចរណ៍ ដោយបែងចែក​ទៅ​តាមកម្រិត​និង​គោលដៅ​ផ្សេងៗ​គ្នា។

សណ្ឋាគារ

អាជីវកម្ម​សណ្ឋាគារ គឺ​ជា​ការ​យក​អគារសម្រាប់​ធ្វើ​អាជីវកម្ម​ផ្គត់ផ្គង់​បន្ទប់​ស្នាក់នៅ ដែល​មាន​បំពាក់​សម្ភារៈ​បរិក្ខារ​ជូន​ភ្ញៀវ និង​មាន​សេវាកម្ម​មួយ​ចំនួន​ដូចជា ភោជនីយដ្ឋាន បានីយដ្ឋាន ហាង​លក់​ទំនិញ វត្ថុ​អនុស្សាវរីយ៍ កន្លែង​ហាត់ប្រាណ លេង​កីឡា សាល​ប្រជុំ ព្រម​ទាំង​មាន​សេវាកម្ម​ពេញលេញ​ទៅ​តាម​តម្រូវការ​របស់​ភ្ញៀវ។

ទីតាំង​សណ្ឋាគារ​ស្ថិត​នៅ​តាម​ទីប្រជុំជន ជាយក្រុង តំបន់​រមណីយដ្ឋាន​ទេសចរណ៍ និង​តំបន់​ដែល​មាន​ចលនា​ទេសចរណ៍ ។

សណ្ឋាគារ​អាផាតមិន (Apartment Hotel)

សណ្ឋាគារ​អាផាតមិន (Apartment Hotel) ជា​សណ្ឋាគារ​ដែលមាន​បន្ទប់​ស្នាក់នៅ និង​បន្ទប់​ស្វ៊ីត​ដោយ​បំពាក់​គ្រឿង​សង្ហារិម សម្ភារៈ​បរិក្ខារ និង​ផ្តល់​នូវ​សេវាកម្ម​ដូច​សណ្ឋាគារ​ដែរ ហើយ​បម្រើ​ឲ្យ​ការ​ស្នាក់នៅ​រយៈ​ពេល​វែង ។ បន្ទប់​ស្វ៊ីត​មាន​បន្ទប់​ស្នាក់​នៅ​មួយ ឬ​ច្រើន មាន​បំពាក់​គ្រឿង​សម្ភារៈ​ផ្ទះបាយ និង​មាន​បន្ទប់​សម្រាប់​ទទួល​ភ្ញៀវ។

សណ្ឋាគារ​ស្វ៊ីត (Suite Hotel)

សណ្ឋាគារ​ស្វ៊ីត (Suite Hotel) ជា​សណ្ឋាគារ​ដែល​មាន​បន្ទប់ស្នាក់​នៅ​ទាំងអស់​សុទ្ធ​តែ​ជា​បន្ទប់​ស្វីត។

សណ្ឋាគារ​រីសត (Resort Hotel)

សណ្ឋាគារ​រីសត (Resort Hotel) គឺជា​សណ្ឋាគារ​ដែលមាន​ទីតាំងស្ថិត​នៅក្នុងតំបន់​រមណីយដ្ឋាន​ទេសចរណ៍​ឆ្ងាយ​ពី​ទី​ប្រជុំជន មាន​កន្លែង​លំហែកាយ​សម្រាក​យកខ្យល់អាកាស មាន​ផ្តល់​សេវាកម្ម​ម្ហូប​អាហារ​ភេសជ្ជៈ និង​សេវាកម្ម​ផ្សេងទៀត​ ដែល​ធ្វើ​ឲ្យ​ចំរើន​សុខភាព ដូចជា​វាយកូនគោល វាយ​តេនីស ស្ទូចត្រី និង​ជិះ​សេះ​ជាដើម។

ម៉ូតែល (Motel)

ម៉ូតែល (Motel) ជា​អាគារ​មាន​មួយ​ជាន់ ឬ​ពីរ​ជាន់ ដែល​ស្ថិតនៅ​តាម​តំបន់​ជាយក្រុង ឬ​តំបន់​ដែល​មាន​ចលនា​ទេសចរណ៍ និង​តាម​បណ្ដោយ​ផ្លូវ​សំខាន់ៗ ផ្ដល់​នូវ​សម្បទា និង​សេវាកម្ម​មាន​កម្រិត​សម្រាប់​បម្រើ​ឲ្យ​ការ​ស្នាក់នៅ​ជា​លក្ខណៈ​សំចត​រយៈពេល​ខ្លី។ មាន​ភោជនីយដ្ឋាន​ខ្នាត​តូច មាន​ចំណត​រថយន្ត​ធំ​ទូលាយ និង​មាន​ផ្តល់​សេវាកម្ម​សម្រាប់​កម្សាន្ត​មួយ​ចំនួន។

ឡូដ៍ (Lodge)

ឡូដ៍ (Lodge) គឺ​ជា​អាគារ​ដែល​មាន​ទីតាំង​ស្ថិត​នៅ​តាម​តំបន់​សម្រាក​វិស្សមកាល​ជនបទ ឬ​តំបន់​ទាក់ទាញ​ទេសចរ​សម្រាប់​បម្រើ​ឲ្យ​ការ​ស្នាក់នៅ​ដល់​ទេសចរ​មាន​លក្ខណៈ​ជា​ពួក ឬ ជា​ក្រុម​ដែល​មាន​គោលបំណង​សម្រាក​លំហែ​កាយ និង​កម្សាន្ត​ក្នុង​សកម្មភាព​នេសាទ បរបាញ់ កីឡា មាន​បម្រើ​សេវា​ម្ហូប​អាហារ និង​ភេសជ្ជៈ មាន​ចំណត​រថយន្ត ព្រម​ទាំង​មាន​បំពាក់​គ្រឿង​សម្ភារៈ​ផ្ទះបាយ។

បឹងហ្គាឡូ (Bungalow)

បឹងហ្គាឡូ (Bungalow) គឺជា​អាគារ​មួយ​ជាន់​មាន​លក្ខណៈ​ជាភូមិគ្រឹះ​ដាច់​ៗ​ពីគ្នា និង​អាច​មាន​ច្រើន​យូនីត (Units) នៅ​ក្នុង​អាគារ​តែមួយ។ យូនីត (Units) នីមួយៗ មាន​បន្ទប់​ដេក​មួយ ឬ​ច្រើន មាន​បន្ទប់ ទទួល​ភ្ញៀវ​ដាច់​ដោយឡែក មាន​ផ្ទះបាយ មាន​ចំណត​រថយន្ត។ បឹងហ្គាឡូ​អាច​ជា​អាគារ​សំណង់​រឹង ឬ​ស្រាល។

ផ្ទះ​ភ្ញៀវ (Guest House)

ផ្ទះ​ភ្ញៀវ (Guest House) គឺ​ជា​អគារ​ដែល​មាន​ចំនួន​បន្ទប់​ពី ៥ ទៅ ១៥ បន្ទប់ មាន​បំពាក់​ឧបករណ៍​សម្ភារៈ បរិក្ខារ​ដែល​មាន​លក្ខណៈ​សម្បត្តិ​គ្រប់គ្រាន់ និង​មាន​សេវា​បម្រើ​ភ្ញៀវ​មាន​កម្រិត។

ផ្ទះ​ស្នាក់​នៅ ( Homestay)

ផ្ទះ​ស្នាក់​នៅ ( Homestay) គឺ​ជា​សេវាកម្ម​ស្នាក់នៅ​ទេសចរណ៍ ដោយ​ការរៀបចំ​លំនៅ​ដ្ឋាន​របស់​ខ្លួន​ឲ្យ​ទៅ​ជា​បន្ទប់​មិន​លើស​ពី ០៥ បន្ទប់ ឬ​ជា​គ្រែ​ចល័ត​ដូចជា កៅអី​ឬ​អង្រឹង មាន​បំពាក់​សម្ភារៈ​បរិក្ខារ សាមញ្ញ និង​សេវា​មាន​កម្រិត សម្រាប់​ទទួល​បម្រើ​ការ​ស្នាក់នៅ​របស់​ភ្ញៀវ​ដែល​មាន​បំណង​មក​សិក្សា និង​ស្វែងយល់​ពី​សកម្មភាព​នៃ​ជីវភាព​រស់នៅ​របស់​ប្រជាជន​ក្នុង​សហគមន៍ និង​រមណីយដ្ឋាន​ក្នុង​តំបន់​។

កន្លែង​បោះ​ជំរុំ​ទេសចរណ៍ (Tourist Camping)

កន្លែង​បោះ​ជំរុំ​ទេសចរណ៍ (Tourist Camping) គឺ​ជា​មូលដ្ឋាន​សេវាកម្ម​ស្នាក់នៅ​ទេសចរណ៍ ដោយ​បើប្រាស់​តង់ (Tent) ដែល​មាន​ទីតាំង​ស្ថិត​នៅក្នុង​តំបន់​រមណីយដ្ឋាន​ទេសចរណ៍​ធម្មជាតិ វប្បធម៌ ប្រវត្តិសាស្ត្រ ឆ្នេរសមុទ្រ មាន​ហេដ្ឋារចនាសម្ព័ន្ធ និង​សេវាកម្ម​ចាំបាច់​មួយ​ចំនួន​ដើម្បី​បម្រើ​ទេសចរ៕