ព័ត៌មានជាតិ

ពលរដ្ឋឃុំភ្ញីមាស សុំអាជ្ញាធរពន្លឿនដោះស្រាយផលប៉ះពាល់គម្រោងធ្វើអាងទឹកស្អាត

បានផុស

៤ years មុន

នៅ

ថ្ងៃសុក្រ ២ ធ្នូ ២០២២

ដោយ

ប្រជាពលរដ្ឋក្នុងឃុំភ្ញីមាស ស្រុកគិរីសាគរ បានស្នើសុំឲ្យអាជ្ញាធរខេត្ត មេត្តាពន្លឿនដោះស្រាយពីផលប៉ះពាល់គម្រោងអភិវឌ្ឍន៍ធ្វើអាងទឹកស្អាតរបស់ក្រុមហ៊ុន អាន កូ គ្រាបញ្ហានេះកើតមានយូរឆ្នាំ គ្មានលទ្ធផលបង្ហាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តំណាងឲ្យប្រជាពលរដ្ឋរស់នៅភូមិពាមក្រឡាញ់ ឃុំភ្ញីមាស ចំនួន ១០ គ្រួសារ កំពុងរង់ចាំដំណោះស្រាយរវាងក្រុមហ៊ុនអាន កូ ដែលកំពុងវិនិយោគធ្វើអាងទំនប់ទឹកស្អាតចូលដីស្រែចម្ការរបស់ពួកគាត់ ដោយក្រុមហ៊ុនចេះតែពន្យារពេលវេលាមិនទូទាត់ផ្តល់សំណង។

តំណាងប្រជាពលរដ្ឋ អះអាងកាលពីថ្ងៃទី ១ ខែធ្នូ ឆ្នាំ ២០២២ ក្នុងវេទិកាផ្សព្វផ្សាយ និងពិគ្រោះយោបល់របស់ក្រុមប្រឹក្សាខេត្តកោះកុងថា ពួកគាត់សុំរកដំណោះស្រាយពីអាជ្ញាធរភូមិ-ឃុំ និងស្រុក ជាង ១ ឆ្នាំ មកហើយ ក៏នៅមិនទាន់មានលទ្ធផលអ្វីឡើយ។ ដូច្នេះដល់លោក កាយ សំរួម ប្រធានក្រុមប្រឹក្សាខេត្តកោះកុង មេត្តាពិនិត្យ និងពន្លឿនឲ្យមានការដោះស្រាយឆាប់ៗ។

បើតាមក្រុមពលរដ្ឋដដែល បច្ចុប្បន្នគ្មានចំណូលអ្វីដើម្បីផ្គត់ផ្គង់ជីវភាពគ្រួសារប្រចាំថ្ងៃទេ ខណៈដីស្រែចម្ការអាស្រ័យផលបានលិចទឹកដោយសារគម្រោងធ្វើអាងទំនប់ទឹកនេះ ហើយថែមទាំងកំពុងជំពាក់ធនាគារទៀតផង។

ទាក់ទិននឹងបញ្ហានេះ ត្រូវបានលោក សុខ សុទ្ធី អភិបាលរងខេត្តកោះកុង ទទួលស្គាល់ពីភាពឆកល្វែងដើម្បីស្វែងដំណោះស្រាយជូនពលរដ្ឋដែលរងផលប៉ះពាល់ ដោយក្រសួងបរិស្ថានធ្លាប់ណែនាំដល់តំណាងក្រុមហ៊ុន អាន កូ ចាំបាច់ដោះស្រាយផ្តល់សំណងឲ្យឆាប់រហ័ស។

លោកអភិបាលរងខេត្ត អះអាងថា មកទល់ម៉ោងនេះ ក្រុមហ៊ុនវិនិយោគពិតជាមិនបានដោះស្រាយជូនពលរដ្ឋប្រាកដមែន។ ដូច្នេះតបនឹងសំណើពលរដ្ឋ រដ្ឋបាលខេត្ត នឹងរកពេលវេលាជជែកពីឧកញ៉ា កុក អាន ដើម្បីពិនិត្យពន្លឿនការដោះស្រាយជូនពលរដ្ឋ ខណៈដីធ្លីអាស្រ័យស្របច្បាប់។

លោក សុខ សុទ្ធី ក៏រម្លឹកដែរថា កន្លងទៅ ពួកគាត់ត្រូវបានដោះស្រាយពីផលប៉ះពាល់ដោយក្រុមហ៊ុន ញូញៀន មករកទីតាំងខាងលើដើម្បីរស់នៅអាស្រ័យ ប៉ុន្តែឥឡូវមកជួបបញ្ហាជាមួយក្រុមហ៊ុន អាន កូ រឹងតែប៉ះពាល់បន្ថែមទៀត ដោយលោកចាត់ទុកថា នេះជាសំណើស្របច្បាប់របស់ពលរដ្ឋកំពុងរងផលប៉ះពាល់ មិនអាចពន្យារពេលវេលាបានបន្តឡើយ៕

អត្ថបទ ៖ សិរីវឌ្ឍនៈ