មន្ត្រីជំនាញ៖ ឆ្នាំ២០២៣ ស្ថានភាពជំងឺគ្រុនឈាមអាចនឹងបន្តកើនឡើងដល់ជាង២ម៉ឺនករណី

មន្ត្រីជំនាញនៃកម្មវិធីជាតិប្រយុទ្ធនឹងជំងឺគ្រុនឈាមបានអះអាងថា នៅឆ្នាំ២០២៣ខាងមុខនេះស្ថានភាពជំងឺគ្រុនឈាមអាចនឹងកើនឡើងដល់ជាង២ម៉ឺនករណីខ្ពស់ជាងឆ្នាំ២០២២ទៅទៀតដោយសារវាកៀកដល់វន្តនៃការផ្ទុះជំងឺគ្រុនឈាមបន្ទាប់ពីកម្ពុជាបានផ្ទុះទ្រង់ទ្រាយធំកាលពីឆ្នាំ២០១៩ កន្លងទៅ។

លោកវេជ្ជបណ្ឌិត លាង ឬទ្ធា ប្រធានកម្មវិធីជាតិប្រយុទ្ធនឹងជំងឺគ្រុនឈាមនៃក្រសួងសុខាភិបាលមានប្រសាសន៍នៅ
ព្រឹកថ្ងៃទី១០ធ្នូនេះថា «ស្ថានភាពជំងឺគ្រុនឈាមនៅឆ្នាំ២០២៣យោងតាមវន្តនៃផ្ទុះជំងឺគ្រុនឈាមមានរយៈពេលដែល​៥ទៅ៦ឆ្នាំផ្ទុះម្តងនោះដោយសារផ្ទុះចុងក្រោយនៅឆ្នាំ២០១៩អីចឹងឆ្នាំ២០២៣នេះចូលដល់ឆ្នាំទី៤កៀកដល់នៃការផ្ទុះហើយអីចឹងជំងឺគ្រុនឈាមនឹងចាប់ផ្តើមកើនឡើងច្រើនជាងឆ្នាំ២០២២ទៅទៀតអាចមាន២ឬជាង២ម៉ឺនករណីនិងស្លាប់កើនលើសឆ្នាំនេះទៀត»។

នៅក្នុងរយៈពេល១១ខែឆ្នាំ២០២២នេះមានអ្នកឆ្លងជំងឺគ្រុនឈាមប្រមាណជាង១១០០០ករណីនិងស្លាប់១៨ករណីកើនឡើងជាង៥ដងបើធៀបទៅនឹងរយៈពេលពេញមួយឆ្នាំ២០២១កន្លងទៅដែលមានប្រមាណ២០០០ករណីនិងមានអ្នកស្លាប់ចំនួន៨ករណីប៉ុណ្ណោះ។

លោកវេជ្ជបណ្ឌិតបានបន្តថា ខេត្តដែលប្រឈមនឹងជំងឺគ្រុនឈាមខ្ពស់រួមមានខេត្តបន្ទាយមានជ័យ កំពង់ស្ពឺ រាជធានីភ្នំពេញ ព្រៃវែង សៀមរាប តាកែវ ពោធិ៍សាត់ និងត្បូងឃ្មុំ។ លោកវេជ្ជបណ្ឌិត បានសំណូមដល់ប្រជាពលរដ្ឋ ត្រូវបន្តការរស់នៅស្អាត និងអនាម័យ ដោយធ្វើការលប់បំបាត់នូវសំបកកំប៉ុង សំបកដូង សំបកកង់ឡាន និងម៉ូតូ ព្រមទាំងឆ្នាំងចាស់ៗ ទុកចោលនៅក្រៅផ្ទះ ព្រោះថាវត្ថុទាំងនេះអាចដាក់ទឹកបាន ដែលអាចកកើតទៅជាដង្កូវទឹកហើយវិវត្តន៍ទៅជាមូសខ្លា ដែលជាភ្នាក់ងារចម្លងជំងឺគ្រុនឈាមនិងអាចចម្លងទៅមនុស្ស ធ្វើឲ្យអត្រាឆ្លងកាន់តែច្រើនថែមទៀត ។

លោកវេជ្ជបណ្ឌិតបានបន្តទៀតថា «ប្រសិនបើមានអាការៈក្តៅខ្លួនសូមកុំព្យាបាលដោយខ្លួនឯងឬយកទៅព្យាបាលកន្លែង
ព្យាបាលតូចៗតាមភូមិដោយសារគាត់មិនមានឧបករណ៍សម្ភារជួយសង្គ្រោះបងប្អូនបានទាន់ពេលវេលានោះទេដោយ​សារជំងឺគ្រុនឈាមជាជំងឺមួយកាចសាហាវនិងអាចធ្វើឱ្យកូនលោកអ្នកស្លាប់បានយ៉ាងកឿនក្នុងរយៈបេល៣ទៅ៤ថ្ងៃក្រោយ​ពីឆ្លងជំងឺហ្នឹងចេញរោគសញ្ញាប្រសិនបើយើងមិនព្យាបាលបានទាន់ពេលវេលាទេមានកាយឺតយ៉ាវគឺអាចឱ្យស្លាប់បាន»។

លោកវេជ្ជបណ្ឌិតបានបញ្ជាក់ថា ដូចករណីស្លាប់១៨នាក់ក្នុងរយៈពេល១១ខែនេះគឺដោយសារមានការយឺតយ៉ាវគាត់បានយកទៅព្យាបាលពេទ្យផ្សេងៗដែលមិនមានឧបករណ៍មិនមានចំណេះជំនាញច្បាស់លាស់ដែលទម្រាំគាត់សម្រេចចិត្តមកមន្ទីរពេទ្យរដ្ឋគឺយឺតពេលទៅហើយបើទោះបីជាគ្រូពេទ្យពូកែយ៉ាងណាក៏មិនអាចជួយសង្គ្រោះបានដែរ។ លោកវេជ្ជបណ្ឌិតបានណែនាំថាជំងឺគ្រុនឈាមមានអាការៈនិងរោគសញ្ញាដូចជាក្តៅខ្លួនចាប់ពី ៣៩ទៅដល់ ៤០ អង្សា នឹងមានរោគសញ្ញាផ្សេងៗទៀតដូចជាមុខក្រហមឈឺប្រឡង់កែវភ្នែកចាក់ទៅក្រោយ ឈឺក្បាល ចង់ក្អួតឬក្អួតឈឺពោះឈឺសាច់ដុំឈឺសន្លាក់ដៃជើងស្នាមអុចៗក្រហមលើស្បែកឬមានហូរឈាមតាមអញ្ចាញធ្មេញជាដើមហើយប្រសិនបើឃើញមានករណីនេះត្រូវរួសរាន់បញ្ជូនអ្នកជំងឺទៅកាន់មន្ទីរពេទ្យរដ្ឋដែលនៅជិតផ្ទះជាបន្ទាន់ដើម្បីព្យាបាលឱ្យបានទាន់ពេលវេលា៕

អត្ថបទ៖ សំអឿន