សម្ដេចតេជោ ហ៊ុន សែន ៖ ពលរដ្ឋខ្មែរនៅអឺរ៉ុបជាង ២ពាន់នាក់ មកជួបសម្ដេចនាពេលនេះ មិនមានការគាបសង្កត់ ឬការទិញដូរឡើយ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានគូសបញ្ជាក់ថា ប្រជាពលរដ្ឋខ្មែររស់នៅតំបន់អឺរ៉ុប ដែលបាន​មកជួបសម្ដេចនាពេលនេះ មិនមានការគាបសង្កត់ ទិញទឹកចិត្ត ឬជួលឲ្យមកជួបនោះឡើយ ហើយសម្ដេចស្នើឲ្យបញ្ចប់ភាសានេះ នៅក្នុងពេលណាមួយ។

សម្ដេចតេជោ ហ៊ុន សែន បានថ្លែងក្នុងពិធីជួបសំណេះសំណាល ជាមួយប្រជាពលរដ្ឋខ្មែររស់នៅតំបន់អឺរ៉ុបជាង ២ពាន់នាក់ នៅទីក្រុងព្រុចសែល ប្រទេសបែលហ្សិក កាលពីល្ងាចថ្ងៃទី ១២ ខែធ្នូថា ការជួបសំណេះសំណាលជាមួយប្រជាពលរដ្ឋនាពេលនេះ មិនមែនជាការទិញទឹកចិត្ត គាបសង្កត់ ឬជួលឲ្យមកជួបនោះឡើយ។ ម្យ៉ាងទៀត សម្ដេចតេជោ លើកឡើងថា ភាសានៃទិញដូរ ឬជួល ដើម្បីជំនួបជាមួយសម្តេចនោះ គួរតែត្រូវបានបញ្ចប់ក្នុងពេលណាមួយ ព្រោះភាសានេះគឺជាការបំពានលើសិទ្ធិសេរីភាព នៃសតិសម្បជញ្ជៈរបស់ប្រជាពលរដ្ឋខ្មែរ។

សម្ដេចតេជោ ហ៊ុន សែន បានថ្លែងយ៉ាងដូច្នេះថា «បើកមើលឃើញក្មួយៗ និយាយថា ប្រើពាក្យថា គ្មាននរណា​គាប​សង្កត់ អញ្ចឹងមាន​ន័យថា ពួកគេបានបំផុសនូវពាក្យពេចន៍ថា ការមកជួបនេះ ត្រូវបានទទួលការគាបសង្កត់ ឬការទិញដូរ ប្រហែលជាភាសានេះ យើងគួរតែបញ្ចប់វា នៅក្នុងដំណាក់កាលណាមួយ ព្រោះវាជាការប្រមាថដ៏ធ្ងន់ សម្រាប់សតិ​សម្បជញ្ជៈ ឬសម្រាប់សិទ្ធិពលរដ្ឋ តើអ្នកទាំងអស់គ្នា ដែលមកទីនេះក្រោមការគំរាមកំហែងរបស់អ្នកណា?»។

សម្ដេចតេជោ ហ៊ុន សែន លើកឡើងបន្តថា មិនថាតែសម្រាប់ប្រជាពលរដ្ឋដែលរស់នៅក្រៅប្រទេសទេ សូម្បីតែប្រជាពលរដ្ឋខ្មែរនៅក្នុងប្រទេស ក៏រាជរដ្ឋាភិបាលគ្មានសិទ្ធិគាបសង្កត់ ដើម្បីឲ្យពួកគាត់ត្រូវតែចូលរួមពិធីបុណ្យនេះ ចូលរួមកម្មវិធីនោះ នោះឡើយ លើកលែងតែមានការចាត់តាំងណាមួយ។

សម្ដេចតេជោ ហ៊ុន សែន បានបន្ថែមទៀតថា «ប៉ុន្តែការជួបជុំបែបនេះ អត់មានទេ អ្នកចង់មកក៏មក អ្នកមិនចង់មកគឺជាសិទ្ធិ ខ្ញុំមិនយល់ថា អ្នកដែលបានមកនៅលើទឹកដី ដែលគេហៅថា ទឹកដីប្រជាធិបតេយ្យ បែរជាចេះប្រើភាសានេះទៅរួច ប៉ុន្តែប្រហែលជាទម្លាប់របស់ពួកគេទេដឹង ប៉ុន្តែមិនមែនជាទម្លាប់របស់ ហ៊ុន សែន ហើយក៏មិនមែនជាទម្លាប់របស់គណបក្សប្រជាជនដែរ»។

គួរកត់សម្គាល់ថា ប្រជាពលរដ្ឋខ្មែរដែលកំពុងរស់នៅ និងបម្រើការងារនៅតាមប្រទេសមួយចំនួន នៃតំបន់អឺរ៉ុប បានសម្ដែងនូវក្តីរីករាយឥតឧបមាចំពោះវត្តមានដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលបានធ្វើដំណើរមកកាន់តំបន់អឺរ៉ុប និងបានសម្ដែងនូវការគាំទ្រចំពោះការដឹកនាំរបស់សម្ដេចតេជោ ក្នុងការអភិវឌ្ឍប្រទេសជាតិ ឲ្យមានការរីកចម្រើនលូតលាស់ជាបន្តបន្ទាប់។

មតិគាំទ្ររបស់ប្រជាពលរដ្ឋខ្មែរនៅតំបន់អឺរ៉ុបនេះ ធ្វើឡើងខណៈដែលពួកគាត់អញ្ជើញមកចូលរួមក្នុងពិធីសំណេះ​សំណាល ជាមួយសម្ដេចតេជោនាយករដ្ឋមន្ត្រីជាង ២ពាន់នាក់ នៅទីក្រុងព្រុចសែល ប្រទេសបែលហ្សិក។ ពិធីសំណេះសំណាលនេះ ធ្វើឡើងមុនពេលដែលសម្តេចតេជោ ត្រូវធ្វើជាសហប្រធាន នៃកិច្ចប្រជុំកំពូលអាស៊ាន-សហភាពអឺរ៉ុប ដើម្បីអបអរសាទរខួបអនុស្សាវរីយ៍លើកទី ៤៥ នៃទំនាក់ទំនងដៃគូសន្ទនារវាងអាស៊ាន-សហភាពអឺរ៉ុប នៅទីក្រុងព្រុចសែល ប្រទេសប៊ែលហ្សិក នាថ្ងៃទី ១៤ ខែធ្នូ ឆ្នាំ ២០២២ខាងមុខ៕