បុណ្យដារលាន នៅតែនិយមប្រារព្ធធ្វើឡើង​ក្នុងភូមិ​ស្រុក​មួយចំនួន ក្នុងខេត្ត​ជាប់​រាជធានីភ្នំពេញ

បុណ្យដារលាន ឬបុណ្យភូមិ គឺជាពិធីបុណ្យប្រពៃណីដូនតាខ្មែរ ដើម្បីជួបជុំ និងអបអរ បន្ទាប់ហត់នឿយធ្វើស្រូវអស់រយៈពេលជាច្រើនខែ។ ប្រជាកសិករនិយមរៀបចំបុណ្យនេះឡើង នៅរៀងរាល់រដូវច្រូតកាត់ ចាប់ពីអំឡុងខែធ្នូ ហើយមានភូមិខ្លះ អាចអូសបន្លាយដល់អំឡុងខែមីនាផងដែរ។ នេះបើតាមការឱ្យដឹងពី លោកយាយ ម៉ែន ខុន ជាចាស់ព្រឹទ្ធាចារ្យម្នាក់ រស់នៅក្នុងភូមិភែក ឃុំស្រង់ ស្រុកគងពិសី ខេត្តកំពង់ស្ពឺ។

បើតាមលោកយាយ ម៉ែន ខុន ពេលដែលអ្នកភូមិច្រូតកាត់ហើយអស់ ទើបអ្នកភូមិនឹងស្រុះស្រួលគ្នា ជ្រើសថ្ងៃដើម្បីរៀបចំពិធីបុណ្យនេះឡើង ដោយថ្ងៃទី១ គឺមានរៀបចំនំបញ្ចុកសម្លខ្មែរ ឬសម្លការី (តាមចំណង់ចំណូលចិត្ត) ដើម្បីទទួលភ្ញៀវ ឬសាច់ញាតិ​បងប្អូន តាមផ្ទះរៀងៗខ្លួន។

លុះរសៀលថ្ងៃដដែល អ្នកភូមិមូលមីគ្នាស្តាប់ធម៌ទេសនា ប្រគេនចង្ហាន់ និងភេសជ្ជៈ ដល់ព្រះសង្ឃ នៅកន្លែងដែលអ្នកភូមិជ្រើសជាទីតាំងប្រារព្ធពិធីបុណ្យជុំគ្នា ដែលភាគច្រើនអ្នកភូមិស្រុកលោកយាយផ្ទាល់ ច្រើនយកវាលស្រែក្រោយផ្ទះ ព្រោះតែមានទីធ្លាធំ។ ក្រោយព្រះសង្ឈសូត្រមន្តចប់ នៅពេលវេលាម៉ោងប្រមាណជា ៧យប់ឡើងទៅ ក្មេងចាស់ប្រុសស្រី ក្នុងភូមិ នាំគ្នារាំសប្បាយជួបជុំគ្នា ដោយមានទាំងអ្នកភូមិផ្សេងមករាំលេងផងក៏មាន។

បន្ទាប់ពីកម្មវិធីថ្ងៃទី១ ចប់ នៅព្រឹកថ្ងៃទី២ និងជាថ្ងៃបិទបញ្ចប់នៃកម្មវិធីបុណ្យ អ្នកភូមិជួបជុំគ្នាម្តងទៀតនៅរោងបុណ្យដដែល ប្រគេនចង្ហាន់ព្រះសង្ឃ និងស្តាប់ធម៌ទេសនា ដើម្បីបិញ្ចប់កម្មវិធីបុណ្យ រហូតដល់ចង្ហាន់ថ្ងៃត្រង់តែម្តង។

មិនជាខុសគ្នានោះទេ ចំណែកឯអ្នកភូមិត្រពាំងប្រុយ ឃុំបែកចាន ស្រុកអង្គស្នួល ខេត្តកណ្តាល ក៏មានរៀបចំកម្មវិធីបុណ្យ​ដារលាន​ ជារៀងរាល់ឆ្នាំផងដែរ។ អ្នកភូមិមួយនេះ និយមរៀបចំកម្មវិធីគ្រប់ផ្ទះ ដោយមានអញ្ជើញ​ភ្ញៀវពីទីជិតឆ្ងាយ ដើម្បីចូលរួមរីករាយជុំញាតិមិត្តបងប្អូន។

កញ្ញា មិត្ត រស្មី បានឱ្យដឹងថា នៅស្រុកកំណើតរបស់កញ្ញា តែងតែប្រារព្ធធ្វើកម្មវិធីបុណ្យនេះ ជារៀងរាល់ឆ្នាំ ចាប់ពីអំឡុងខែមករា ដល់ខែមីនា បើទោះបីអ្នកភូមិនេះ នៅប្រកបរបរស្រែចំការតិចជាងមុនក៏ដោយ។ ចំណែកឯដំណើរការកម្មវិធីវិញ គឺមិនជាខុសគ្នានឹងអ្នកកំពង់ស្ពឺទេ ទាំងការរៀបចំកម្មវិធីនៅផ្ទះ និងនិមន្តព្រះសង្ឃសូត្រមន្ត្ត៕