សូមប្រយ័ត្ន និងបង្ការខ្លួន ខណៈស្ថានភាពចម្លងវីរុសកូវីដ-១៩ ងើបឡើងវិញ រួមទាំងនៅកម្ពុជា

ក្រសួងសុខាភិបាល នៅថ្ងៃនេះ បានចេញសេចក្តីជូនព័ត៌មាន ស្ដីពី ការការពារការចម្លងវីរុសកូវីដ-១៩ ខណៈខណៈស្ថានភាពចម្លងវីរុសកូវីដ-១៩ នៅលើសាកលលោក ក៏ដូចជានៅកម្ពុជា មានការងើបឡើងវិញគួរឱ្យកត់សម្គាល់។

ក្រសួងសុខាភិបាលបានឱ្យដឹងថា ស្ថានភាព នៃជំងឺកូវីដ-១៩ នៅលើសាកលលោក មានការងើបឡើងវិញនូវការចម្លងវីរុសកូវីដ-១៩ ដោយឡែក ព្រះរាជាណាចក្រកម្ពុជាក៏ជាប្រទេសមួយដែលស្ថិតនៅក្នុងតំបន់ និងនៅលើសាកលលោកដែរ។ នេះបញ្ជាក់ថា វីរុសកូវីដ-១៩ មិនទាន់ទៅណាឆ្ងាយពីយើងនៅឡើយទេ ជាពិសេសពពួកអូមីក្រុង នៅតែបន្តការបំប្លែងខ្លួនរបស់វាជាបន្តបន្ទាប់ បណ្តាលឱ្យលទ្ធភាពនៃការចម្លងគឺកើតមានគ្រប់ពេលវេលា គ្រប់កាលៈទេសៈ និងគ្រប់កន្លែងទាំងអស់។

ក្រសួងសុខាភិបាល បានបន្តថា ដូច្នេះយើងត្រូវតែប្រុងប្រយ័ត្នទាំងអស់គ្នា ដើម្បីការពារកុំឱ្យមានការស្ទុះងើបឡើងវិញ និងការឆ្លងរាលដាលនៃវីរុសកូវីដ-១៩ ចូលទៅក្នុងសហគមន៍របស់យើង និងដើម្បីបន្តនិរន្តរភាពដំណើរការប្រទេសជាបន្តទៅមុខទៀតប្រកបដោយសុវត្ថិភាព និងភាពរីករាយ ក្នុងគន្លងប្រក្រតីភាពថ្មី។

ក្រសួងសុខាភិបាល សូមក្រើនរំលឹក និងអំពាវនាវសារជាថ្មី ដល់សាធារណជន សូមបន្តចូលរួមទប់ស្កាត់ការចម្លងវីរុសកូវីដ-១៩ នៅក្នុងគ្រួសារនិងសហគមន៍យើងទាំងអស់គ្នា ដោយបន្តអនុវត្តតាមការណែនាំដ៏ខ្ពង់ខ្ពស់របស់ សម្ដេចអគ្គមហាសនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នូវវិធានការ “៣ការពារ (ពាក់ម៉ាស់ លាងដៃឱ្យញឹកញាប់ និងរក្សាគម្លាតសុវត្ថិភាពបុគ្គលពីមួយម៉ែត្រកន្លះឡើង) និង ៣កុំ (កុំទៅកន្លែងមានមនុស្សច្រើន កុំទៅកន្លែងបិទជិតគ្មានខ្យល់ចេញចូល កុំប៉ះពាល់គ្នា កុំចាប់ដៃគ្នា កុំកៀកស្មាគ្នា) ដែលបានដាក់ចេញឱ្យអនុវត្តតាំងពីពាក់កណ្ដាល ខែធ្នូ ឆ្នាំ២០២០មក ហើយជាបន្តបន្ទាប់មក សម្ដេចក៏តែងតែក្រើនរំលឹកជាញឹកញាប់ ឱ្យបន្តនូវការអនុវត្តវិធានការខាងលើនេះ ប្រកបដោយស្មារតីទទួលខុសត្រូវខ្ពស់ ដោយផ្តើមចេញពីបុគ្គលផ្ទាល់ខ្លួនម្នាក់ៗ សមាជិកគ្រួសារ សហគម និងសង្គមទាំងមូល និងបន្តទៅចាក់វ៉ាក់សាំងទាំងដូសមូលដ្ឋាន ដូសជំរុញទី៣ ទី៤ ទី៥ និងដូសជម្រុញនានា ដើម្បីបញ្ចៀសនូវការរីករាលដាលដ៏ធ្ងន់ធ្ងរទៅក្នុងសហគមន៍ ទៅក្នុងគ្រួសារ និងស្ថាប័ននានា ដែលអាចកើតមានជាយថាហេតុ។

គួរបញ្ជាក់ថា នៅថ្ងៃនេះ ក្រសួងសុខាភិបាល បានចេញសេចក្តីជូនព័ត៌មាន ស្តីពីការសរុបស្ថានភាពជំងឺកូវីដ-១៩ ក្នុងព្រះរាជាណាចក្រកម្ពុជា សម្រាប់ម្សិលមិញថ្ងៃទី១៨ ខែធ្នូ ឆ្នាំ២០២២ គឺកម្ពុជាបានរកឃើញ ករណីឆ្លងថ្មីឆ្លងក្នុងសហគមន៍ ចំនួន ៣២នាក់ ជាករណីអូមីក្រុង ខណៈថ្ងៃទី១៧ រកឃើញ ៨ករណី, ថ្ងៃទី១៦ រកឃើញ ១៧ករណី, ថ្ងៃទី១៥ រកឃើញ ១៥ករណី, ថ្ងៃទី១៤ រកឃើញ ២៧ករណី, ថ្ងៃទី១៣ រកឃើញ ១៨ករណី, ថ្ងៃទី១២ រកឃើញ ២៦ករណី, ថ្ងៃទី១១ រកឃើញ ២៥ករណី។ គិតត្រឹមថ្ងៃទី១៨ ខែធ្នូនេះ កម្ពុជា មានការឆ្លងកូវីដ១៩សរុប ១៣៨ ៤១៩ករណី, ជាសះស្បើយសុរប ១៣៥ ២២៤ករណី និង ស្លាប់សរុប ៣ ០៥៦ករណី៕