លោកបណ្ឌិត យង់ ពៅ អគ្គលេខាធិការរាជបណ្ឌិត្យសភាកម្ពុជា បានថ្លែងថា នយោបាយការបរទេសផ្កាចម្រុះពណ៌របស់សម្ដេចតេជោ ហ៊ុន សែន បានរួមចំណែកយ៉ាងសំខាន់ដល់ការជួយសម្របសម្រួលវិបត្តិទាំងឡាយនៅលើពិភពលោក។ លោកបណ្ឌិត យង់ ពៅ ថ្លែងបែបនេះក្នុងសន្និសីទអន្តរជាតិប្រចាំឆ្នាំ លើកទី១៧ ស្ដីពី«សណ្តាប់ធ្នាប់ពិភពលោកថ្មី៖ ការប្រកួតប្រជែង សមាហរណកម្ម និងពហុប៉ូល» នៅថ្ងៃទី២០ ខែធ្នូ ឆ្នាំ២០២២នេះ។

ថ្លែងបើកសន្និសីទនេះ លោកបណ្ឌិត យង់ ពៅ បានលើកឡើងថា ការរៀបចំសន្និសីទអន្តរជាតិ ឆ្នាំ២០២២នេះ គឺស្របពេលជាមួយពិភពលោកកំពុងជួបប្រទះវិបត្តិជាសាកល គួរឲ្យព្រួយបារម្ភជាបន្តបន្ទាប់ ជាអាទិ៍ វិបត្តិកូវីដ១៩ វិបត្តិស្បៀងអាហារ វិបត្តិថាមពល និងឧស្ម័ន អតិផរណាជាសកល ជាពិសេស សង្គ្រាមរវាងរុស្ស៊ី និងអ៊ុយក្រែន។

ពាក់ព័ន្ធនឹងបញ្ហាជាសាកលទាំងនេះ លោកបណ្ឌិត យង់ ពៅ បានគូសបញ្ជាក់ដូច្នេះថា៖ «ក្រោមការដឹកនាំដ៏ឈ្លាសវៃ និងប៉ិនប្រសព្វរបស់សម្ដេចតេជោ ហ៊ុន សែន តាមរយៈការដាក់ចេញនូវនយោបាយការបរទេសផ្កាចម្រុះពណ៌ និងក្នុងនាមជាប្រធានអាស៊ាន ឆ្នាំ២០២២នេះ រាជរដ្ឋាភិបាលកម្ពុជា បានរួមចំណែកយ៉ាងសំខាន់ជាមួយថ្នាក់ដឹកនាំទាំងនៅក្នុងតំបន់ និងពិភពលោក ក្នុងការជួយសម្របសម្រួលវិបត្តិទាំងអស់នេះ រួមទាំង វិបត្តិនៅមីយ៉ាន់ម៉ា»។

ប៉ុន្តែយ៉ាងណាក៏ដោយ អគ្គលេខាធិការរាជបណ្ឌិត្យសភារូបនេះ បានលើកឡើងដែរថា ពេលបច្ចុប្បន្ននេះ ពិភពលោក ហាក់កំពុងតែរអិលទៅរកសង្គ្រាមត្រជាក់ថ្មី ដែលជាការព្រួយបារម្ភរួមរបស់ពិភពលោក។ លោកបណ្ឌិត បានរំលឹកនូវការលើកឡើងរបស់លោក ចូ បៃឌិន ប្រធានាធិបតីអាមេរិកដែលនិយាយថា «យើងមិនគួរឲ្យមានសង្គ្រាមត្រជាក់ថ្មីកើតឡើងទេ»។ ប៉ុន្តែត្រង់ន័យនេះ លោកបណ្ឌិត យង់ ពៅ បានមើលឃើញថា តាមរយៈការប្រកួតប្រជែងភូមិសាស្ត្រនយោបាយរបស់ប្រទេសមហាអំណាច ហាក់កំពុងបង្ហាញអំពីការឈានទៅរកសង្គ្រាមត្រជាក់ថ្មីនេះ៕

ដោយ៖ ធឿន វ៉ាន់សុង