សម្ដេចតេជោ ហ៊ុន សែន នាយករដ្ឋមន្ត្រីកម្ពុជានៅថ្ងៃទី ២២ ខែធ្នូនេះបានអំពាវនាវឲ្យម្ចាស់​អាជីវកម្មដឹកជញ្ជូន​ប្រើប្រាស់​ផ្លូវល្បឿនលឿន​ ដើម្បីផលចំណេញប្រេងឥន្ធនៈ និងសង្វាកផ្គត់ផ្គង់។

សម្ដេចតេជោ ហ៊ុន សែន មានប្រសាសន៍លើកឡើងនៅក្នុងពិធីបើកឲ្យប្រើប្រាស់ផ្លូវពីរខ្សែជាង ៤៣ គីឡូម៉ែត្រ នៅខេត្តព្រះសីហនុថា «ខ្ញុំសង្កេតឃើញថា មិនទាន់មានឡានដឹកទំនិញលើផ្លូវល្បឿនលឿនទេ ចំណុចនេះខ្ញុំគួរ​តែដាស់តឿនចំពោះថៅកែដឹកទំនិញ ថៅកែរថយន្តប្រើប្រាស់ផ្លូវល្បឿនលឿនចំណេញច្រើនជាងផ្លូវធម្មតា ប្រេងក៏អស់តិច ពេលវេលាក៏ចំណេញក្នុងសង្វាក់ផ្គត់ផ្គង់»។

សម្ដេចតេជោអំពាវនាវទៅកាន់ម្ចាស់អាជីវកម្មដែលមានរថយន្តច្រើនក្នុងការដឹកជញ្ជូនប្រើផ្លូវល្បឿនលឿនទទួលផលចំណេញខាងផ្នែកសេដ្ឋកិច្ចជាងផ្លូវធម្មតា ហើយក៏អាចកាត់បន្ថយគ្រោះថ្នាក់ចរាចរណ៍នៅលើផ្លូវជាតិលេខ ៤ ផងដែរ៕