នៅរសៀលថ្ងៃទី២៩ ខែធ្នូ ឆ្នាំ២០២២ ម្សិលមិញ ប្រធានរាជបណ្ឌិត្យសភាកម្ពុជា លោកបណ្ឌិត សុខ ទូច បានថ្លែងថា សារព័ត៌មាន គឺជាអំណាចទី៤ របស់រដ្ឋ។ ប៉ុន្តែ ប្រសិនបើអំណាចទី៤នេះ មិនចេះប្រើប្រាស់តួនាទីទេនោះ សារព័ត៌មានអាចនឹងក្លាយជាជញ្ជាំងបិទជិត។

នៅចំពោះមុខអ្នកសារព័ត៌មានប្រមាណ ៥៤រូប ក្នុងពិធីបិទសិក្ខាសាលាបណ្ដុះបណ្ដាល ស្ដីពីតួនាទីប្រព័ន្ធផ្សព្វផ្សាយ និងការបោះឆ្នោត លោកបណ្ឌិត សុខ ទូច បានលើកឡើងថា សារព័ត៌មាន គឺជាអំណាចទី៤ របស់រដ្ឋ សម្រាប់ជាកញ្ចក់ឆ្លុះបញ្ចាំងតថភាពសង្គម។ លោកបណ្ឌិត បញ្ជាក់ថា ប្រសិនបើសង្គមយល់ពីកិច្ចការ ក៏ដូចជា ចេះប្រើប្រាស់តួនាទីនេះច្បាស់ នោះសារព័ត៌មានកាន់តែមានប្រសិទ្ធភាព។ តែផ្ទុយទៅវិញ បើអំណាចទី៤នេះ មិនត្រូវបានប្រើប្រាស់ ឬមិនចេះប្រើប្រាស់ឲ្យចំទិសដៅទេនោះ សារព័ត៌មាននឹងអាចក្លាយជាជញ្ជាំងបិទជិត។

ត្រង់ចំណុចនេះ លោកបណ្ឌិត សង្កត់ធ្ងន់ថា «សារព័ត៌មានបានដើរតួនាទីយ៉ាងសំខាន់ ប្រសិនបើសារព័ត៌មានថាតាមគេ និយាយតាមគេ ឬតាមអ្នកនយោបាយ ឬក៏ប្រទេសមួយមិនមានសារព័ត៌មានទេនោះ គឺមានន័យថា ប្រទេសនោះហាក់កំពុងនៅក្នុងបន្ទប់បិទជិតដោយជញ្ជាំងបួនជ្រុង»។

បើតាមលោកបណ្ឌិត សុខ ទូច តួនាទីចម្បងរបស់សារព័ត៌មាន គឺការនាំពាក្យពិត ការនាំយកហេតុការណ៍ពិត ក៏ដូចជាសភាពការណ៍ពិត ប្រកបដោយវិជ្ជាជីវៈ និងក្រមសីលធម៌ ដោយមិនត្រូវបំភ្លៃព័ត៌មាន បំភ្លើស ឬបំប៉ោងព័ត៌មាន ខុសពីការពិតឡើយ។ បន្ថែមពីនេះ សារព័ត៌មាន ក៏បានដើរតួជាអ្នកចែករំលែកចំណេះដឹងយ៉ាងទូលំទូលាយនៅសតវត្ស៍ទី២១ នៃសម័យឌីជីថលនេះ៕

ដោយ៖ ធឿន វ៉ាន់សុង