ព័ត៌មានជាតិ

សម្តេចតេជោ ជំរុញអភិបាលខេត្តទាំងអស់ដោះស្រាយវិវាទដីធ្លីជូនពលរដ្ឋក្រៅប្រព័ន្ធតុលាការដូចអភិបាលខេត្តកំពត

បានផុស

៣ years មុន

នៅ

ថ្ងៃសៅរ៍ ៣១ ធ្នូ ២០២២

ដោយ

សម្តេចតេជោ ហ៊ុន សែន នាយករដ្ឋមន្រ្តី បានជំរុញដល់អភិបាលខេត្តទាំងអស់យកគំរូតាមអភិបាលខេត្តកំពត លោក ម៉ៅ ធនិន ដែលបានបង្កើតវេទិកាដោះស្រាយបញ្ហាជម្លោះដីធ្លីជូនពលរដ្ឋនៅក្រៅប្រព័ន្ធតុលាការ។

សម្តេចតេជោ ហ៊ុន សែន បានកត់សម្គាល់ឃើញថា បញ្ហាវិវាទដីធ្លី និងបញ្ហាទំនាស់ផ្សេងៗទៀតរបស់ពលរដ្ឋថ្នាក់មូលដ្ឋានក្នុងខេត្តកំពត ត្រូវបានលោក ម៉ៅ ធនិន អភិបាលខេត្តកំពតចេញមុខដោះស្រាយស្ទើរតែគ្រប់បញ្ហា ដោយសម្តេចចាត់ទុកថា សកម្មភាពបែបនេះ នៅមិនទាន់ឃើញអភិបាលខេត្តដទៃទៀត បានអនុវត្តនៅឡើយ។

ថ្លែងនៅចំពោះមុខអភិបាលខេត្តកំពត និងអភិបាលខេត្តមួយចំនួនទៀតដែលមានវត្តមាននៅក្នុងពិធីបើកការដ្ឋានស្តារ និងលើកកម្រិតគុណភាពផ្លូវ ក្នុងខេត្តកំពត និងខេត្តកែប កាលពីថ្ងៃទី ៣០ ខែ ធ្នូ សម្តេចតេជោ ហ៊ុន សែន កោតសរសើរលើការដោះស្រាយទំនាស់ដីធ្លី ក្រៅប្រព័ន្ធតុលាការរបស់អភិបាលខេត្តកំពត ជាមួយនឹងពលរដ្ឋមកគ្រប់មូលដ្ឋានទាំងអស់ ដោយចុះជួបផ្ទាល់ និងដោះស្រាយតែម្តង។ ទន្ទឹមនឹងការកោតសរសើរនេះ សម្តេចនាយករដ្ឋមន្ត្រីក៏បានលើកទឹកឱ្យអភិបាលខេត្តកំពតរូបនេះ បន្តបេសសកម្មរបស់ខ្លួនក្នុងការដោះស្រាយបញ្ហាជូនពលរដ្ឋរស់នៅក្នុងខេត្តបន្តទៀត។

ឆ្លៀតឱកាសនេះ សម្តេចទៅកាន់អភិបាលខេត្តដទៃទៀត គួររៀបចំវេទិកាសាធារណដើម្បីចេញមុខដោះស្រាយវិវាទដីធ្លី និងបញ្ហាទំនាស់នានារបស់ពលរដ្ឋនៅតាមបណ្តាខេត្តដែលខ្លួនគ្រប់គ្រងឱ្យមានប្រសិទ្ធភាព តម្លាភាព និងអាចទទួលយកបានទាំងអស់គ្នា។ ដោយសម្តេចបានស្នើឱ្យអភិបាលខេត្តទាំងអស់ ត្រូវដោះស្រាយដោយឈរលើគោលការណ៍អព្យាក្រឹត្យ មិនលម្អៀងទៅភាគីណាមួយទាំងក្នុងទំនាស់តូចតាច និងក្នុងករណីធំ៕