នៅព្រឹក ថ្ងៃទី១៣ ខែ មករា ឆ្នាំ ២០២៣នេះ ក្នុងសាលប្រជុំសាលាខេត្តបន្ទាយមានជ័យ បានបើកយុទ្ធនាការចាក់វ៉ាក់សាំងបង្ការជំងឺ កូវីដ-១៩ ដួសជំរុញលើកទី២ ដល់ដូសលើកទី៦ ជូនដល់ ក្រុមប្រឹក្សាខេត្ត រដ្ឋបាលខេត្ត មន្ត្រីរាជការ ប្រជាពលរដ្ឋ ព្រះសង្ឃ ក្នុងក្រុងសិរីសោភ័ណ នៅ ៦ មណ្ឌលសុខភាព ដោយមិនកំណត់រយៈពេល។

លោកវេជ្ជបណ្ឌិត ឡេច័ន្ទ សង្វាត ប្រធាន មន្ទីរសុខាភិបាលខេត្តបន្ទាយមានជ័យ បានឱ្យដឹងថា ដោយបានការអនុញ្ញាតពី លោក ខេង ស៊ុម ប្រធាន ក្រុមប្រឹក្សាខេត្ត លោក អ៊ុំ រាត្រី អភិបាល ខេត្តបន្ទាយមានជ័យ ឱ្យក្រុមគ្រូពេទ្យក្នុងខេត្តបន្ទាយមានជ័យបើកយុទ្ធនាការចាក់ថ្នាំចាក់វ៉ាក់សាំងដូសជំរុញទី២ ដល់ដូសទី៦ ជូនដល់ ក្រុមប្រឹក្សាខេត្ត រដ្ឋបាលខេត្ត មន្ត្រីរាជការ មន្ទីរ អង្គភាព គ្រូបង្រៀន ប្រជាពលរដ្ឋ អាជីវករ កម្មករ ព្រះសង្ឃ ក្នុងក្រុងសិរីសោភ័ណ នៅមណ្ឌលសុខភាពចំនួន៦ ក្នុងក្រុងសិរីសោភ័ណ ដោយមិនកំណត់រយៈពេល ពោលគឺចាក់ទាល់តែអស់អ្នកមកចាក់ ហើយការចាក់វ៉ាក់សាំងនេះ មិនគិតថ្លៃនោះទេ។

លោក អ៊ុំ រាត្រី មានប្រសាសន៍ថា ការចាក់វ៉ាក់សាំងដូសជំរុញជូនដល់ ក្រុមប្រឹក្សាខេត្ត រដ្ឋបាលខេត្ត មន្ត្រីរាជការ មន្ទីរ អង្គភាព ប្រជាពលរដ្ឋ អាជីវករ កម្មករ ព្រះសង្ឃ ក្នុងក្រុងសិរីសោភ័ណ ចាប់ដំណើរការពី ថ្ងៃទី១៣ ខែមករា ឆ្នាំ២០២៣ នេះតទៅ ចាក់ទាល់តែអស់មនុស្សមកចាក់ ទើបឈប់ ដោយប្រើវ៉ាក់សាំងប្រភេទ SINOVAC។ យុទ្ធនាការចាក់វ៉ាក់សាំងដួសជំរុញនេះមានការផ្ទៀងផ្ទាត់បញ្ជូលទិន្នន័យក្នុងកុំព្យួទ័រ។

លោក អ៊ុំ រាត្រី បានកោតសរសើរ និងថ្លែងអំណរគុណដល់ក្រុមគ្រូពេទ្យទាំងអស់បានខិតខំប្រឹងប្រែងចាក់វ៉ាក់សាំងបង្ការកូវីដ-១៩ ជូនមន្ត្រីរាជការ ប្រជាពលរដ្ឋ អាជីវករ កម្មករ ព្រះសង្ឃ ក្នុងក្រុងសិរីសោភ័ណ ដោយមិនខ្លាចពីការនឿយហត់។ លោកបានណែនាំទូទៅ វិន័យ ការទទួលខុសត្រូវចំពោះថ្នាក់លើ បច្ចេកទេសជាដើម ដើម្បីឱ្យដំណើរការចាក់វ៉ាក់សាំងប្រព្រឹត្តទៅរលូន បានលទ្ធផលល្អ មានប្រសិទ្ធភាព និងប្រកបដោយការទទួលខុសត្រូវ៕

អត្ថបទ៖ វ៉ាន់ ណាង