ព័ត៌មានជាតិ
រដ្ឋមន្ត្រីអប់រំ លើកទឹកចិត្តមាតាបិតាបង្រៀនកូនឱ្យចេះអាន សរសេរនិងចេះគិតលេខលើកកម្ពស់គុណភាពអប់រំនៅកម្ពុជា
លោក បណ្ឌិតសភាចារ្យ ហង់ ជួនណារ៉ុន រដ្ឋមន្ត្រីក្រសួងអប់រំយុវជននិងកីឡាបានលើកទឹកចិត្តដល់មាតាបិតាលោកគ្រូអ្នកគ្រូខិតខំជួយបង្រៀនកូន និងកុមារឱ្យចេះអានចេះសរសេរ និងចេះគិតលេខ ដើម្បីចូលរួមចំណែកក្នុងការលើកម្ពស់គុណភាពអប់រំនៅកម្ពុជាឱ្យកាន់តែប្រសើរឡើង។
ថ្លែងក្នុងកម្មវិធីប្រកួតប្រជែងThink Think World cup ថ្នាក់ជាតិ ដែលរៀបចំឡើងដោយក្រសួងអប់រំយុវជន និងកីឡា និងJICA នៅមជ្ឈមណ្ឌលសហប្រតិបត្តិការកម្ពុជា ជប៉ុន (CJCC) នៅព្រឹកថ្ងៃទី១៤មករា លោករដ្ឋមន្ត្រីបានមានប្រសាសន៍ថា« ខ្ញុំសូមលើកទឹកចិត្តឱ្យមាតាបិតាលោកគ្រូអ្នគ្រូជួយគាំទ្រដល់កូន និងកុមារកម្ពុជាក្នុងការរៀនអានរៀនសរសេរដើម្បីឱ្យមានមូលដ្ឋានគ្រឹះរឹងមាំពេលឡើងទៅកម្រិតមធ្យមសិក្សាក៏ដូចជាឧត្តមសិក្សាអាចចាប់យកចំណេះដឹងផ្នែកវិទ្យាសាស្ត្រនិងបច្ចេកវិទ្យាបាន»។
ជាមួយគ្នានេះ លោក រដ្ឋមន្ត្រីបានបន្តថា ការបញ្ជួនកូនមកចូលរួមក្នុងការមើលសៀវភៅនិងចំណាយពេលវេលាជួយបង្រៀនកូនឱ្យចេះអានឱ្យចេះសរសេរ ចេះគិតលេខនឹងចូលរួមចំណែកក្នុងការលើកម្ពស់គុណភាពអប់រំហើយការប្រើប្រាស់បច្ចេកវិទ្យាឌីជីថលនាពេលបច្ចុប្បន្នមានសារសំខាន់សម្រាប់ការលើកកម្ពស់ការអប់រំផងដែរ ព្រោះដើម្បីឱ្យវិស័យអប់រំនៅកម្ពុជាមានគុណភាពយើងត្រូវលើកកម្ពស់អំណានក៏ដូចជាការលើកកម្ពស់ការរៀនគណិតវិទ្យានិងការរៀនវិទ្យាសាស្ត្រ។
«ជាការពិតណាស់ដើម្បីលើកកម្ពស់គុណភាពអប់រំគឺយើងត្រូវតែធ្វើការពង្រឹងពីថ្នាក់ក្រោមទៅពីកុមារតូចក៏ដូចជាថ្នាក់បឋមសិក្សាឱ្យពួកគេចេះការអានការរៀនគណិតវិទ្យា។អរគុណដល់មាតាបិតាទាំងអស់ដែលបានខិតខំប្រឹងប្រែងជួយគាំទ្រដើម្បីឱ្យកូនៗរបស់អស់លោកលោកស្រីអាចរៀនពិសេសក្នុងការអានសរសេរនិងការរៀនគណិតវិទ្យាដែលជាមូលដ្ឋានគ្រឹះសម្រាប់ការរៀនផ្នែកវិទ្យាសាស្ត្រ»។ នេះជាការបន្ថែមរបស់លោក ហង់ ជួនណារ៉ុន។
លោករដ្ឋមន្ត្រីបានបញ្ជាក់ថា«យើងដឹងហើយថា ដើម្បីអភិវឌ្ឍន៍ប្រទេសជាតិឱ្យបានរីកចមរើនរុងរឿងទៅបានការពង្រឹងគុណភាពវិស័យអប់រំគឺពិជាមានសារសំខាន់បំផុត»។
ពាក់ព័ន្ធនឹងកម្មវិធីការប្រកួតប្រជែងThink Think World cup ថ្នាក់ជាតិវិញ លោកបណ្ឌិតសភាចារ្យ ហង់ជួន ណារ៉ុន បានបញ្ជាក់ថា«វាពិតជាមានសារៈសំខាន់ណាស់ក្នុងការរៀនSTEMតាំងពីកុមារភាពនិងអភិវឌ្ឍបំណិនសតវត្សទី២១នៅក្នុងសង្គមដែលផ្លាស់ប្ដូរយ៉ាងឆាប់រហ័សហើយកម្មវិធីThink Think World cupគឺជាឱកាសដ៏ល្អដែលអាចទាក់ទាញចំណាប់អារម្មណ៍សិស្សានុសិស្សឱ្យចាប់អារម្មណ៍លើជំនាញSTEM»។
លោក តានីណៃ អ៊ីជឺតូមុភារៈធារី ស្តីទីស្ថានទួតជប៉ុនប្រចាំកម្ពុជាបានមានប្រសាសន៍ថា កម្មវិធីប្រកួតប្រជែងThink Think World cup ថ្នាក់ជាតិនេះ ជាផ្នែកមួយនៃខួប៧០ឆ្នាំនៃទំនាក់ទំនងការទូតរវាងកម្ពុជា និងជប៉ុនដើម្បីលើកទឹកចិត្តដល់សិស្សានុសិស្សកាន់តែច្រើនក្នុងប្រទេសកម្ពុជាឱ្យរៀនជំនាញ STEMរួមមានមុខវិជ្ជា គណិតវិទ្យា វិទ្យាសាស្ត្រវិស្វរកម្មនិងបច្ចេកវិទ្យា តាំងពីវ័យកុមារជាមួយនឹងបច្ចេកវិទ្យាអប់រំពីប្រទេសជប៉ុន។
លោកបានបន្តថា ការប្រកួតនេះមានចូលរួមសិស្សប្រមាណ៤០០០នាក់ ហើយពួកគេបានប្រកួតប្រជែងជំនាញSTEMរបស់ពួកគេជាមួយគ្នានៅលើកម្មវិធី Think Think ដែលJICAនាំយកមកកម្ពុជា។
លោកស្រី ហារ៊ុកុកាមិអិ ប្រធានតំណាងJICAប្រចាំនៅកម្ពុជាបានមានប្រសាសន៍ថា Think Think គឺជាសេវាកម្មអប់រំរបស់ប្រទេសជប៉ុនដ៏លេចធ្លោមួយដែលត្រូវបានទទួលស្គាល់ច្បាស់លាស់សម្រាប់កម្មវិធីបច្ចេកវិទ្យាអប់រំដ៏ល្អឥតខ្ចោះសម្រាប់កុមារនៅប្រទេសជប៉ុននិងនៅទូទាំងពិភពលោក។
គួរបញ្ជាក់ថា Think Think ជាកម្មវិធីមកពីប្រទេសជប៉ុន ដើម្បីអភិវឌ្ឍជំនាញ STEM និងជំនាញសតវត្សរ៍ទី២១របស់សិស្ស។ វាមានភាពល្បីល្បាញដោយសារការទទួលបានពានរង្វាន់កម្មវិធីអប់រំលេខមួយរបស់ប្រទេសជប៉ុន និងកម្មវិធីល្អបំផុតរបស់ google សម្រាប់កុមារ។ កម្មវិធីនេះ មានអ្នកប្រើប្រាស់ជាង២សែននាក់នៅទូទាំងពិភពលោក៕ សំអឿន
-
ព័ត៌មានជាតិ៦ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៤ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៣ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ព័ត៌មានជាតិ៤ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
ជីវិតកម្សាន្ដ១ សប្តាហ៍ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សេដ្ឋកិច្ច៥ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៤ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
សន្តិសុខសង្គម៤ ថ្ងៃ ago
បឋម៖ អគ្គិភ័យកំពុងឆេះផ្ទះពលរដ្ឋក្នុងបុរីពិភពថ្មីកំបូល