ពលរដ្ឋ២៣០គ្រួសាររស់នៅបុរី រុងរឿង ទទួលបានអំណោយពីក្រុមហ៊ុន OCIC

ប្រជាពលរដ្ឋប្រមាណ៥០គ្រួសារ តំណាងបងប្អូនប្រជាពលរដ្ឋ ២៣០ គ្រួសារ រស់នៅបុរី រុងរឿង ទទួលបានអំណោយពីក្រុមហ៊ុន OCIC ដោយក្នុង១គ្រួសារៗទទួលបានអង្ករ ៣០គីឡូក្រាម និងថវិកា ៥0,000រៀល ។

ពិធីនេះប្រព្រឹត្តឡើងកាលពីព្រឹកថ្ងៃទី១៧ ខែមករា ឆ្នាំ២០២៣ ក្រោមវត្តមានលោក ផន សុភាព ប្រធានការដ្ឋាន ផ្នែកដោះស្រាយដីធ្លី និងក្រុមការងារមួយចំនួនទៀត ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមការងារបានលើកឡើងថា ក្រុមហ៊ុន OCIC បានសហការយ៉ាងជិតស្និតជាមួយរាជរដ្ឋាភិបាល ជាពិសេសសាលារាជធានីភ្នំពេញ សាលាខណ្ឌជ្រោយចង្វារ និងអាជ្ញាធរដែនដីដែលពាក់ពន័្ធនៅក្នុងមូលដ្ឋាន ក្នុងការដោះស្រាយគោលនយោបាយជូនប្រជាពលរដ្ឋដែលទទួលរងផលប៉ះពាល់ក្នុងគម្រោងអភិវឌ្ឍន៍ទីក្រុងជ្រោយចង្វារ ប្រកបដោយសន្តិវិធី និងព្រហ្មវិហារធម៌ ។

នាថ្ងៃទី១៧ ខែមករា ឆ្នាំ២០២៣ នេះ គឺជាការចែកអំណោយលើកទី៣៣ហើយរបស់អ្នកឧកញ៉ា ពុង ឃាវសែ ជូនដល់ប្រជាពលរដ្ឋដែលមានប័ណ្ណ បុរី រុងរឿង ដែលក្នុងនោះសរុបអំណោយទំាង៣៣លើក ចំណាយអស់ទឹកប្រាក់សរុប ៩៤២,៣៧០,០០០ រៀល។

ដោយក្តីព្រហ្មវិហាធម៌របស់អ្នកឧកញ៉ា ពុង ឃាវសែ និងគណៈគ្រប់គ្រងបុរី រុងរឿង ចូលរួមចំណែកក្នុងកិច្ចការសប្បុរ​សធម៌ជូនប្រជាពលរដ្ឋបន្ថែមផងដែរ ក្នុងនោះបានផ្តល់ការងារជូនដល់ប្រជាពលរដ្ឋរស់នៅបុរីរុងរឿង សរុបមានចំនួន ៦៥នាក់ ។ ផ្តល់មូលនិធិឥតយកការប្រាក់ និងមិនគិតពីប្រាក់ចំណេញប្រកបដោយក្ដីអាណិតមេត្តា ករុណា ដ៏ប្រពៃ ជូនបងប្អូនប្រជាពលរដ្ឋ និងបុគ្គលិកដែលមានជីវភាពខ្វះខាតដោយពុំយកការប្រាក់បានកើនឡើង១៨លាន៣សែនរៀល គិតមកដល់បច្ចុប្បន្នចំនួនអ្នកខ្ចីឥណទានមានចំនួនសរុប៨៤នាក់ ។ បានឧបត្ថម្ភកង់, អង្ករ, វ៉ែនតា, ក្រម៉ា , សារ៉ុង, សៀវភៅ, សាប៊ូ ម៉ាស អាកុល និងសំភារៈផ្សេងៗជាច្រើនទៀត ដែលចំណាយអស់ទឹកប្រាក់សរុបជាង២៣លានរៀល។

ទិសដៅការងារក្រុមហ៊ុននឹងបន្តសហការការងារ និងពង្រឹងបន្ថែម ដើម្បីសុវត្ថិភាពក្នុងគម្រោងទីក្រុងជ្រោយចង្វារទាំងមូល ។ បន្តសហការអនុវត្តន៍ក្នុងការងារសាងសង់ ដើម្បីសំរេចបាននូវបរិមាណ និងគុណភាពល្អ ដែលគម្រោងប្លង់មេបានកំណត់រួចហើយ ។បន្តការងារដោះស្រាយជូនប្រជាពលរដ្ឋដែលរងផលប៉ះពាល់ និងប្រជាពលរដ្ឋដែលរស់នៅ ក្នុង បុរី រុងរឿង និងបន្តឧបត្ថម្ភអំណោយដល់ប្រជាពលរដ្ឋដែលមានប័ណ្ណ បុរី រុងរឿង តាមលទ្ធភាពជាក់ស្តែង ៕

អត្ថបទ៖ រ៉ាវុទ្ធ