លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជំរុញដល់វិទ្យាស្ថានស្រាវជ្រាវ និងអភិវឌ្ឍកសិកម្មកម្ពុជាត្រូវបន្តសហការជាមួយដៃគូពាក់ព័ន្ធថែមទៀតក្នុងការស្រាវជ្រាវ គ្រប់គ្រង និងផលិតពូជស្រូវឲ្យមានគុណភាពល្អ។

ការជំរុញរបស់លោក ឌិត ទីណា ធ្វើឡើងក្នុងឱកាសលោកចុះត្រួតពិនិត្យសកម្មភាពការងាររបស់វិទ្យាស្ថានស្រាវជ្រាវ និងអភិវឌ្ឍកសិកម្មកម្ពុជា កាលពីថ្ងៃទី១៦ ខែមករា ម្សិលមិញ។

ក្នុងឱកាសនោះ លោក ឌិត ទីណា បានលើកឡើងថា វិទ្យាស្ថានស្រាវជ្រាវ និងអភិវឌ្ឍកសិកម្មកម្ពុជា គឺត្រូវបន្តជំរុញការស្រាវជ្រាវលើការងាររបស់ខ្លួនបន្ថែមទៀតឲ្យអស់លទ្ធភាព ដើម្បីធានាការផលិត គ្រប់គ្រង និងដាំដុះដំណាំស្រូវឲ្យមាននិរន្តរភាព។ ត្រង់ចំណុចនេះ លោករដ្ឋមន្ត្រី ក៏បានស្នើឲ្យវិទ្យាស្ថានគួរតែគ្រប់គ្រងការផលិតពូជឲ្យឈានទៅរកវិញ្ញាបនប័ត្រពូជស្រូវ ជាពិសេសត្រូវបន្តពង្រីកខ្លួនឲ្យក្លាយជារាជបណ្ឌិតសភាកសិកម្មនាថ្ងៃខាងមុខ។

ក្នុងនោះដែរ លោករដ្ឋមន្ត្រី ក៏បានណែនាំឲ្យវិទ្យាស្ថានត្រូវតែគិតគូពីប្រសិទ្ធភាព និងនិរន្ដរភាពសេដ្ឋកិច្ចរបស់ខ្លួន ដោយត្រូវមានការសហការជាមួយក្រុមហ៊ុនដៃគូនានាបន្ថែមទៀត។

ឆ្លៀតក្នុងឱកាសចុះពិនិត្យការងារនៅវិទ្យាស្ថានស្រាវជ្រាវ និងអភិវឌ្ឍកសិកម្មកម្ពុជា លោករដ្ឋមន្ត្រី ឌិត ទីណា បានចុះត្រួតពិនិត្យទៅលើលទ្ធភាពដាំដុះពូជស្រូវចំប៉ីស៧០ និងត្រួតពិនិត្យទៅលើសំណាប ព្រមទាំងបានផ្ដល់អនុសាសន៍ជាធាតុចូលបន្ថែមដល់វិទ្យាស្ថានទាក់ទងនឹងការដឹកជញ្ជូនពូជស្រូវ។

ទន្ទឹមគ្នានេះ លោករដ្ឋមន្ត្រីបានពិនិត្យទៅលើការវាយតម្លៃស្រឡាយស្រូវ និងសំណាកពូជមួយចំនួនដែលមានការទុកដាក់យ៉ាងល្អដោយក្រុមការងារវិទ្យាស្ថាន ស្វែងយល់អំពីបច្ចេកទេសជាលិកាវប្បកម្ម និងពិនិត្យមន្ទីរពិសោធន៍ជីវបច្ចេកវិទ្យា។ ក្នុងនោះ លោកក៏បានស្ដាប់បទបង្ហាញទាក់ទងនឹងការបង្កាត់ពូជដង្កូវនាងខ្មែរជាមួយពូជនាំចូលពីកូរ៉េ ដែលអាចមានលទ្ធភាពផលិតសូត្របានល្អ ហើយបានលទ្ធផលពូជថ្មីមួយមន្ថែមមានភាពធន់ទៅនឹងអាកាសធាតុ៕