ព័ត៌មានជាតិ

ទេសរដ្ឋមន្ត្រី លី ធុជ ដឹកនាំដៃគូអភិវឌ្ឍន៍សកម្មភាពមីនចុះពិនិត្យសកម្មភាពបោសសម្អាតមីនរបស់អង្គការ HALO Trust នៅខេត្តឧត្តរមានជ័យ

បានផុស

២ ខែ មុន

នៅ

ថ្ងៃអង្គារ ១៧ មករា ២០២៣

ដោយ

ឧត្តរមានជ័យ ៖ ថ្ងៃទី១៧ ខែមករា ឆ្នាំ២០២៣ ក្នុងនាមរាជរដ្ឋាភិបាលកម្ពុជា លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរមីន បានដឹកនាំគណៈប្រតិភូនៃគម្រោងបោសសម្អាតមីនរបស់ទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ រួមមាន អាល្លឺម៉ង់ សហរដ្ឋអាមេរិក ចក្រភពអង់គ្លេស ស្វីស អៀរឡង់ និង HDR&D ចុះពិនិត្យសកម្មភាពបោសសម្អាតមីនរបស់អង្គការ HALO Trust ប្រចាំកម្ពុជា និងជួបសំណេះសំណាលជាមួយអ្នកទទួលផល នៅស្រុកអន្លង់វែង ខេត្តឧត្តរមានជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អង្គការ HALO Trust ប្រចាំកម្ពុជា កំពុងប្រតិបត្តិការបោសសម្អាតមីនក្នុងឃុំថ្លាត ស្រុកអន្លង់វែង ខេត្តឧត្តរមានជ័យ លើផ្ទៃដីចំនួន ៤.៣៥៣.៥៤៣ ម៉ែត្រក្រឡា បានរកឃើញ និងកម្ទេចចោលមីនប្រឆាំងមនុស្សចំនួន ១.៨៦៦ គ្រាប់ មីនប្រឆាំងរថក្រោះចំនួន ៧២ គ្រាប់ និងយុទ្ធភ័ណ្ឌមិនទាន់ផ្ទុះចំនួន ៨៨០ គ្រាប់។

ជាមួយគ្នានេះ លោកទេសរដ្ឋមន្ត្រី បាននាំគណៈប្រតិភូចូលទស្សនារមណីយដ្ឋានទេសចរណ៍ប្រវត្តិសាស្ត្រផ្ទះតាម៉ុក ដើម្បីស្វែងយល់អំពីប្រវត្តិសាស្ត្រពិតនៃអតីតតំបន់សមរភូមិប្រយុទ្ធចុងក្រោយរបស់ខ្មែរក្រហម ដែលកំឡុងពេលនោះកម្ពុជាមួយមានតំបន់ត្រួតត្រាច្រើន និងមិនទាន់មានសន្តិភាពពេញលេញនៅឡើយ ប៉ុន្តែបច្ចុប្បន្ននេះគឺកម្ពុជាមានតែមួយ និងទទួលបានសុខសន្តិភាពទូទាំងប្រទេស ក្រោមនយោបាយ ឈ្នះ ឈ្នះ របស់សម្តេចតេជោនាយករដ្ឋមន្ត្រី បញ្ចប់សង្គ្រាមចុងឆ្នាំ១៩៩៨។

ដំណើរទស្សនកិច្ចនេះ មានការចូលរួមផងដែរពី លោក Stefan Messerer ឯកអគ្គរដ្ឋទូតអាល្លឺម៉ង់ប្រចាំកម្ពុជា, លោក Dominic Williams ឯកអគ្គរដ្ឋទូតចក្រភពអង់គ្លេសប្រចាំកម្ពុជា, លោក Markus Buerli នាយកទីភ្នាក់ងារស្វីសសម្រាប់ការអភិវឌ្ឍ និងកិច្ចសហប្រតិបត្តិការ, លោកស្រី ប៊ុត រតនា តំណាង HD R& D និងលោក Miles Hawthorn នាយកអង្គការ HALO Trust ប្រចាំកម្ពុជា៕