ព័ត៌មានជាតិ

អតីតរង្វង់មូលព្រឹកស្ទះល្ងាចស្ទះ មានស្ពានអាកាសប្រវត្តិសាស្រ្ត លើកដំបូង មិនធ្លាប់មាននៅស្រុកខ្មែរ

បានផុស

៦ years មុន

នៅ

ថ្ងៃចន្ទ ១១ មករា ២០២១

ដោយ

នៅថ្ងៃ ២៤ មិថុនា ឆ្នាំ ២០១០ រាជធានីភ្នំពេញបានបើកសម្ពោធស្ពានអាកាសលើកដំបូងមិនធ្លាប់មានជាប្រវត្តិសាស្ត្រ។ស្ពានអាកាសក្បាលថ្នល់ ត្រូវបានស្ថាបនាឡើងជំនួសរង្វង់មូលក្បាលថ្នល់ ដែលបើកការដ្ឋានសាងសង់កាលពីឆ្នាំ២០០៩ ដោយចំណាយអស់ទឹកប្រាក់ជាង ៦លានដុល្លារ។

ការស្ថាបនាស្ពាននេះ បានសម្រួលចរចរណ៍បានមួយកម្រិតនៅម្តុំរង្វង់មូលក្បាលថ្នល់ ដែលតែងតែកកស្ទះទាំងព្រឹកទាំងល្ងាច ហើយដែលមន្ត្រីប៉ូលិសត្រូវឈរជើងបញ្ជាចរាចរណ៍ជាប្រចាំ។ ស្ពានអាកាសក្បាល ថ្នល់ទី១នេះបានចាប់ដំណើរការសាងសង់ពី ថ្ងៃទី២៧ ខែឧសភា ឆ្នាំ២០០៩ ដោយក្រុមហ៊ុនអាណិកជនកម្ពុជា (OCIC) ស្ថាបនាពីបេតុងអារម៉េ ដែលមានបណ្ដោយ៣០៨ម៉ែត្រ ទទឹង១៤,២ ម៉ែត្រ និងកំពស់៥,២០ម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ស្ពាននេះចំណុចឡើងចាប់ពីមុខស្ថានីយប្រេងតេលាលើដងមហាវិថីព្រះនរោត្ដម ចុះនៅចំណុចមុខអតីតមន្ទីរពេទ្យការងារលើដងផ្លូវជាតិលេខ២។ មានទ្វេទិស មានគំនូសផ្លូវរថយន្ដចំនួន៤ខ្សែ គឺផ្លូវរថយន្ដ ២ខ្សែទៅ ២ខ្សែមក និងមានបង្កាន់ដៃស្ពាន ប៉ុន្ដែពុំមានចិញ្ចើមសម្រាប់ថ្មើរជើងទេ។

នៅពេលដាក់ឱ្យដំណើរការទីតាំងអតីតចំណុចរង្វង់មូលក្បាលថ្នល់ បានកាត់បន្ថយការកកស្ទះ ដោយសារចរាចរក្នុងទិសដៅនីមួយៗ មិនកាត់ប្រសព្វគ្នាដូចមុនទៀតឡើយ។

ក្រោយលេចស្ពានអាកាសដំបូងនេះ រាជធានីភ្នំពេញបានចាប់ផ្តើមស្ថាបនាស្ពានអាកាសជាបន្តបន្ទាប់រួមមាន ស្ពានអាកាសស្ទឹងមានជ័យ ស្ពានអាកាស៧មករា ស្ពានអាកាស ៥មករា (តិចណូ) និងស្ពានអាកាសផ្សារដីហ៊ុយ។ ស្ពានអាកាសចោមចៅ និងផ្លូវក្រោមដីចោមចៅ កំពុងស្ថាបនាគ្រោងបញ្ចប់ដាក់ឲ្យដំណើរការនៅឆ្នាំ២០២១៕