ក្រសួងអប់រំ កំពុងពិនិត្យករណីនាយកសាលាវិទ្យាល័យសំពៅលូនអនុវត្តវិន័យកាត់សក់សិស្សកែលែងកើត

ក្រសួងអប់រំ យុវជននិងកីឡា កំពុងពិនិត្យករណីនាយកសាលាវិទ្យាល័យសម្តេចតេជោហ៊ុនសែន សំពៅលូន ដែលបានអនុវត្តវិន័យ​សាលាដោយបានកាត់សក់សិស្សប្រុសៗបណ្តាលឱ្យមានការរិះគន់លើបណ្ដាញសង្គមដោយគ្រាន់តែសិស្សទាំងនោះទុកសក់វែងបន្តិច។

លោក រស់ សុវាចា អ្នកនាំពាក្យក្រសួងអប់រំយុវជននិងកីឡា បានមានប្រសាសន៍នៅរសៀលថ្ងៃទី២៤មករា នេះថា​ ក្រសួងអប់រំយុវជន និងកីឡា កំពុងពិនិត្យករណីនេះហើយ។ លោកថា «ជាទូទៅគណ:គ្រប់គ្រងគ្រឹះស្ថានសិក្សាត្រូវដោះស្រាយករណីបាតុភាពផ្សេងៗនៅតាមគ្រឹះស្ថានសិក្សា ដោយចាត់វិធានការតាមទិដ្ឋភាពជាក់ស្តែង។ បើចាំបាច់ គណ:គ្រប់គ្រងគ្រឹះស្ថានសិក្សាអាចសហការជាមួយមន្ទីរអប់រំ យុវជននិងកីឡា ទាំង២៥ខេត្ត រាជធានី ដែលជាសេនាធិការតាមឋានានុក្រមនៃក្រសួងអប់រំយុវជន និងកីឡា»។

សូមបញ្ជាក់ថា កាលពីថ្ងៃទី២៣ ខែមករា ឆ្នាំ២០២៣ នៅក្នុងផេករបស់សាលាវិទ្យាល័យសម្តេចតេជោហ៊ុនសែន
សំពៅលូន បានបង្ហោះពីសកម្មភាពចុះអនុវត្តវិន័យដោយបានសរសេរថា ចុះអនុវត្តវិន័យនិងក្រុមប្រឹក្សាយុវជនដោយ
មានអមរូបថតជាច្រើនសន្លឹករួមមានរូបគ្រូកាន់កន្ត្រៃ និងរូបសិស្សមានសក់ខូចកែលែងកើតបន្ទាប់ពីគ្រូកាត់សក់រួច។

បន្ទាប់ពីមានការបង្ហោះនូវការអនុវត្តវិន័យចំពោះសិស្សប្រុសៗនៅវិទ្យាល័យសម្តេចតេជោហ៊ុនសែនសំពៅលូន រួចមក អ្នកលេងបណ្តាញហ្វេប៊ុកបានស្នើឱ្យក្រសួងអប់រំយុវជននិងកីឡា ជួយពិនិត្យមើលនូវទង្វើអនុវត្តវិន័យរបស់សាលាវិទ្យាល័យ​សម្តេចតេជោហ៊ុនសែនសំពៅលូនដោយបានលើកជាសំណួរសួរថា សិស្សប្រុសៗជាច្រើននាក់ត្រូវបានឈូសសក់បង្ក​ឱ្យពួកគាត់ខ្មាស់គេ ទាំងដែលពួកគាត់មិនសមនឹងត្រូវរងនូវទង្វើនេះ ដោយសារពួកគាត់សក់វែង ទាំងដែលជាក់ស្តែងសក់ពួកគាត់ខ្លីៗទៅហើយ រឺប្រុងឱ្យពួកគាត់កោរសក់មែនទេ? សក់លូតលាស់រាល់ថ្ងៃ បើឱ្យសក់គាត់ត្រូវតែខ្លីចឹង១ ​សប្តាហ៍គាត់ត្រូវកាត់សក់ម្តងមែនទេ? គាត់ត្រូវចំណាយ៥០០០រៀលរៀងរាល់សប្តាហ៍ដើម្បីកាត់សក់មែនទេ? ការសិក្សារីកចំរើន អាស្រ័យលើសក់មែនទេ? វិន័យក្នុងសាលាត្រូវតែមាន តែវិន័យនេះមិនអាចយកមកអនុវត្តក្នុងសាលាបានទេ។ គាំទ្រចំពោះចំណាត់ការកាត់សក់វែងសិស្សប្រុស តែសក់ពួកគាត់មិនអាចខ្លីរហូតបានទេ ហើយសក់ពួកគាត់កាត់តាមទម្រង់មុខពួកគាត់ អ្នកណាក៏ចង់ស្អាតដែរ សូម្បីលោកគ្រូដែលបានឈូសសក់សិស្ស ម៉ូតសក់គាត់ក៏មិនខុសពីសិស្សដែរ។ កុំតែសិស្សកាត់ម៉ូតហួសហេតុ រឺទុកវែងជ្រុល តែជាក់ស្តែងសក់ពួកគាត់សមរម្យស្អាតហើយ ។ សង្ឃឹមថា ប្អូនៗនឹងទទួលបានភាពត្រឹមត្រូវមកវិញ៕

អត្ថបទ៖ សំអឿន