សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា លើកឡើងថា ជ័យជម្នះ ៧ មករា ១៩៧៩ មិនត្រឹមតែធ្វើឲ្យរស់ឡើងវិញនៃជីវិតមនុស្សប៉ុណ្ណោះទេ តែបានធ្វើឲ្យរស់ឡើងវិញនូវគ្រប់សាសនាទាំងអស់ រាប់ទាំងគ្រិស្តសាសនា ផងដែរ។

ការលើកឡើងនេះ គ្រាដែលសម្ដេចតេជោ ហ៊ុន សែន បានអញ្ជើញជាអធិបតីក្នុងពិធីអបអរសាទរខួប ១០០ឆ្នាំនៃគ្រិស្ត​សាសនា «មរតកដំណឹងល្អ ១០០ឆ្នាំ (១៩២៣-២០២៣)» នៅកម្ពុជា នាព្រឹកថ្ងៃទី ២៧ ខែមករា ឆ្នាំ ២០២៣​នេះ។

សម្ដេចតេជោ ហ៊ុន សែន បានថ្លែងថា តើ ១០០ឆ្នាំកន្លងមកនេះ គ្រិស្តសាសនា បានឆ្លងកាត់នូវបញ្ហាអ្វីខ្លះ? ច្បាស់ណាស់ថា មិនខុសពីសាសនាដទៃទៀត ដែលក្នុងនោះ មានព្រះពុទ្ធសាសនា និងឥស្លាមសាសនា ក៏បា​នឆ្លងកាត់នូវសង្រ្គាម ផលវិបាកនៃរបបប្រល័យពូជសាសន៍ ប៉ុល ពត និងដំណាក់កាលនៃសង្រ្គាមជាបន្តបន្ទាប់។

សម្ដេចតេជោ ហ៊ុន សែ​ន បានថ្លែងបន្តថា «នោះហើយ គឺជាការចងភ្ជាប់នៃជោគវាសនា នៃបណ្ដាសាសនាទាំងអស់ ជាតិសាសន៍ទាំងអស់ដែលនៅលើទឹកដីកម្ពុជា ​ជាមួយនឹងសុខសន្តិភាព និងការអភិវឌ្ឍរបស់ខ្លួន ពេលយើងមានទុក្ខ គឺយើងមានទុក្ខទាំងអស់គ្នា តាមរយៈនេះអ្នកទាំងអស់គ្នា អាចយល់ដឹងបានហើយថា ៧ មករា មិនមែនគ្រាន់តែធ្វើឲ្យរស់ឡើងវិញ នៃជីវិតមនុស្សប៉ុណ្ណោះទេ ក៏ប៉ុន្តែបានធ្វើឲ្យរស់ឡើងវិញនូវគ្រប់សាសនាទាំងអស់ រាប់ទាំងគ្រិស្តសាសនា ផងដែរ»។

ជាមួយគ្នានេះ សម្ដេចតេជោ ហ៊ុន សែន លើកឡើងដែរថា សន្តិភាព ដែលប្រទេសកម្ពុជារកបានដោយលំបាកនាពេលនេះ មិនមែនសម្រាប់តែព្រះពុទ្ធសាសនា ដែលជាសាសនារបស់រដ្ឋ ឬក៏សម្រាប់អ្នកណា​ម្នាក់នោះទេ ដោយសម្ដេចតេជោ ហ៊ុន សែន បានបញ្ជាក់ថា «យើងបានទទួលផលប្រយោជន៍ពីសន្តិភាព តាមរយៈនយោបាយឈ្នះឈ្នះទាំងអស់គ្នា រាប់ទាំងគ្រិស្តសាសនារបស់យើង ផងដែរ»។

ក្នុងនោះដែរ សម្ដេចតេជោ ហ៊ុន សែន បានបន្តអំពាវនាវឲ្យជនរួមជាតិខ្មែរទាំងអស់ រួមគ្នាបន្តថែរក្សាសុខសន្តិភាពដែលរកបានដោយលំបាកនេះ ហើយពាក្យ «អរគុណសន្តិភាព» បាននិងកំពុងលាន់លឺរំពង នៅទូទាំងព្រះរាជាណាចក្រកម្ពុជា៕