អភិបាលខេត្តកែប គ្រោងប្រែក្លាយតំបន់ឆ្នេរ​ឱ្យទៅជាអេកូទេសចរណ៍បែបធម្មជាតិ​ស្តង់ដារខ្ពស់

អភិបាលខេត្តកែប នឹងរៀបចំប្រែក្លាយតំបន់ឆ្នេរសមុទ្រឱ្យទៅជាតំបន់អេកូទេសចរណ៍ធម្មជាតិ សម្រាប់សម្រាក​លំហែកាយបែបប្រណីត មានបរិស្ថានល្អ ដើម្បីទាក់ទាញភ្ញៀវទេសចរជាតិ និងអន្តរជាតិ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សោម ពិសិដ្ឋ អភិបាលខេត្តកែប បានបញ្ជាក់ថា ក្រោយពីមានការអភិវឌ្ឍតំបន់ឆ្នេរសមុទ្រកែបកសាងរួចរាល់ រំពឹងថានឹងមានភ្ញៀវទេសចរជាតិ-អន្តរជាតិ មកលេងកម្សាន្តកាន់តែកើនឡើងជាថែមទៀត។ លោកថា រដ្ឋបាលបានរៀប​ចំសណ្តាប់ធ្នាប់ សន្តិសុខសាធារណៈល្អ ប្រជាពលរដ្ឋបានចូលរួមគោរពច្បាប់ មានសីលធម៌រស់នៅថៃ្លថ្នូរ។​

លោក សោម ពិសិដ្ឋ ថ្លែងបែបនេះ នៅក្នុងកិច្ចប្រជុំត្រួតពិនិត្យ និងផ្តល់យោបល់លើសេចក្តីព្រាង​កម្មវិធីវិនិយោគបី​ឆ្នាំរំកិល (២០២៣-២០២៥) និងសេចក្តីព្រាងប្រតិទិនការងារកសាងកម្មវិធីវិនិយោគបីឆ្នាំរំកិល (២០២៤-២០២៦) របស់រដ្ឋបាលខេត្ត កាលពីថ្ងៃទី ០៨ ខែ កុម្ភៈ។

ជាមួយគ្នានេះ លោក គង់ សាវ៉ាត ប្រធានមន្ទីរផែនការខេត្តកែប បានលើកឡើងថា ដោយអនុវត្តន៍តាមសេចក្ដីណែនាំ​បច្ចេកទេស ស្តីពីការរៀបចំ កសាងកម្មវិធីវិនិយោគបីឆ្នាំរំកិលរបស់ខេត្ត ក្រុមការងារកសាងផែនការអភិវឌ្ឍន៍ និងកម្មវិធី​វិនិយោគបីឆ្នាំ រំកិលរបស់ខេត្តកែប ដោយបានរៀបចំបញ្ចប់ជាស្ថាពរនូវសេចក្តីព្រាងសៀវភៅកម្មវិធីវិនិយោគបីឆ្នាំរំកិល (២០២៣-២០២៥) របស់រដ្ឋបាលខេត្ត ដែលមានខ្លឹមសារទម្រង់មាតិកាត្រឹមត្រូវ តាមការកំណត់ក្នុងសេចក្តីណែនាំ និងបានត្រួតពិនិត្យ កែសម្រួលជាបន្តបន្ទាប់ជាមួយភាគីពាក់ព័ន្ធ៕

អត្ថបទ៖ សឹង រ៉ាត់​