ក្រសួងយុត្តិធម៌ និង ADB ចុះ MOU ដាក់ឱ្យដំណើរការ​តុលាការពាណិជ្ជកម្ម​នៅកម្ពុជា

ក្រសួងយុត្ដិធម៌ បានចុះហត្ថលេខាលើអនុស្សរណៈនៃការយោគយល់គ្នាជាមួយធនាគារអភិវឌ្ឍន៍អាស៊ី (ADB) ដើម្បីគាំទ្រការពង្រឹងសមត្ថភាពមន្រ្តីអនុវត្តន៍ច្បាប់ និងកិច្ចដំណើរការ​តុលា​ការពាណិជ្ជកម្មកម្ពុជា។ ក្នុងពិធីចុះ​ហត្ថលេខានេះ កាលពីថ្ងៃ សុក្រ ដោយលោក កើត រិទ្ធ រដ្ឋមន្ត្រីក្រសួងយុត្តិធម៌ និងលោកស្រី Jyotsana Varma នាយិកានៃធនាគារអភិវឌ្ឍន៍អាស៊ី​ប្រចាំ​​កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក កើត រិទ្ធ បានថ្លែងថា ការរៀបចំដាក់ឱ្យដំណើរការតុលាការពាណិជ្ជកម្មមួយ ​ដែលមានតម្លាភាព គុណភាព និងភាពត្រឹមត្រូវ សំដៅលើកកម្ពស់ជំនឿទុកចិត្តពី​សាធារណ​ជន និងលើកកម្ពស់បរិយាកាសល្អ​សម្រាប់ការវិនិយោគ​នៅកម្ពុជា គឺជាអាទិភាពការងារ និងជាការប្តេជ្ញាចិត្តខ្ពស់មួយរបស់ក្រសួងយុត្តិធម៌។ លោករដ្ឋមន្ត្រីបានបញ្ជាក់ថា ដរាបណា​តុលាការពាណិជ្ជកម្មមិនអាចធានាបាននូវតម្លាភាព គុណភាព និងភាពត្រឹមត្រូវនេះទេ តុលាការនេះ​នឹងមិនត្រូវបានដាក់ឱ្យដំណើរការឡើយ។

លោកបានបន្ថែមថា ក្រោម​ជំនួយបច្ចេកទេសរបស់ ADB និងដោយមានការចូលរួមពីក្រុមការងាររបស់ក្រសួង​យុត្តិធម៌ លោកសង្ឃឹមថា នឹងទទួលបាននូវសេចក្តីព្រាងច្បាប់ ឬ លិខិតបទ​ដ្ឋាន​គតិយុត្តពាក់ព័ន្ធនឹងតុលាការពាណិជ្ជ​កម្ម ដែលមាននីតិវិធីច្បាស់លាស់និងឆាប់រហ័ស មាន​តម្លាភាព និងផ្តល់ភាពងាយ​ស្រួលក្នុងការអនុវត្ត ដើម្បីបង្កើនជំនឿទុក​ចិត្តលើការកាត់ក្តីវិវាទ​ពាណិជ្ជកម្ម។

លោកក៏បានថ្លែងនូវអរគុណដល់ ADB ដែលបានផ្តល់ការគាំទ្រផ្នែកបច្ចេក​ទេសដល់​ក្រសួងយុត្តិធម៌ លើការរៀបចំដាក់​ឱ្យដំណើរ​ការតុលាការពាណិជ្ជកម្ម និងការ​ពង្រឹងសមត្ថភាពដល់ចៅក្រមកម្ពុជាពាក់ព័ន្ធនឹងច្បាប់ និង នីតិវិធីក្នុងវិស័យ​ពាណិជ្ជកម្ម ដែល​នេះជាតម្រូវការចាំបាច់ចំពោះមុខរបស់ក្រសួងយុត្តិធម៌។

តាមរយៈអនុស្សរណៈនៃការយោគយល់គ្នានេះ ADB បង្ហាញពី​ការគាំទ្រ និងការចូលរួមលើការរៀបចំក្រប​ខណ្ឌគតិ​យុត្តមួយ ដើម្បីធានាឱ្យមាន​តុលាការពាណិជ្ជកម្ម ដែលមានតម្លាភាព ប្រសិទ្ធភាព និងមានជំនឿទុកចិត្ត នៅកម្ពុជា ស្របតាមគោលបំណង និងចក្ខុវិស័យរបស់ក្រសួងយុត្តិធម៌ ក៏ដូចជាការចូលរួមលើកកម្ពស់​សមត្ថភាពរបស់ចៅ​ក្រមពាក់ព័ន្ធនឹងច្បាប់ពាណិជ្ជកម្ម ផងដែរ៕