អាជ្ញាធរស្រុកស្ទោងបេីកការដ្ឋានសាងសង់ផ្លូវ និងស្ពានភ្ជាប់ឃុំពពក និងភូមិកោះសំរោង

លោក គង់ សំអាត អភិបាលរងស្រុកស្ទោងនៅព្រឹកថ្ងៃទី ២០ ខែកុម្ភៈ ឆ្នាំ ២០២៣ នេះ បានអញ្ជើញបើកការដ្ឋាន គម្រោងសាងសង់ផ្លូវគ្រួសក្រហមប្រវែង ៦១០ ម ស្ពានមួយកន្លែង និងលូប្រអប់ពីរកន្លែងក្រោមគម្រោងកាត់បន្ថយភាពក្រីក្រនិងអភិវឌ្ឍន៍កសិកម្មខ្នាតតូចជំហ៊ានទី២ ចំណាយថវិកាជាង ១៩ម៉ឺន ដុល្លារ នៅភូមិកោះសំរោង ឃុំពពក ស្រុកស្ទោង ខេត្តកំពង់ធំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងឱកាសនេះដែរ លោក គង់ សំអាត អភិបាលរងស្រុកស្ទោងបានលើកឡើងថា សមិទ្ធផលថ្មីនេះបានរួមចំណែកកាត់បន្ថយភាពក្រីក្រក្នុងមូលដ្ឋាន និងបានលើកកម្ពស់សេដ្ឋកិច្ចប្រជាពលរដ្ឋឲ្យបានកាន់តែប្រសើរឡើងថែមទៀត។

លោកបន្តថា ដេីម្បីឲ្យសមិទ្ធផលនេះសាងសង់ប្រកបដោយគុណភាព អាជ្ញាធរឃុំត្រូវ និងអ្នកពាក់ព័ន្ធផ្សេងទៀត ត្រូវសហការគ្នាពិនិត្យមេីលដំណេីរការសាងសង់ឲ្យត្រឹមត្រូវតាមបទដ្ឋានបច្ចេកទេស ដេីម្បីធនាបានគុណភាព ប្រើប្រាស់បានយូរអង្វែង។

លោកអំពាវនាវដល់បងប្អូនប្រជាពលរដ្ឋនៅក្នុងមូលដ្ឋានត្រូវជួយថែរក្សាសមិទ្ធផលទាំងអស់ដែលរាជរដ្ឋាភិបាលសម្រេចបាន និងសហការជាមួយអាជ្ញាធរពាក់ព័ន្ធដើម្បីភូមិ ឃុំ ស្រុក មានការរីកចម្រើន ជាពិសេសសូមកុំរំលោភយកដីចំណីផ្លូវ ហើយបើកផ្លូវឲ្យបានធំទូលាយតាមការណែនាំរបស់អាជ្ញាធរមូលដ្ឋាន និងមន្ត្រីជំនាញ ដើម្បីសមិទ្ធផល ផ្លូវ និងសំណង់ធានាបាននូវគុណភាព អនាម័យ និងសោភ័ណ្ឌភាពស្រស់ស្អាតផងដែរ។

គួរបញ្ជាក់ថា ផ្លូវគ្រួសក្រហម និងសំណង់ស្ពានលូ ដែលបើកការដ្ឋានសាងសង់នៅពេលនេះមានប្រវែងសរុប៦១០ម៉ែត្រ ស្ពានមួយកន្លែង ដែលមានទទឹង៧ម៉ែត្រ បណ្តោយ ១៨ម៉ែត្រ និងលូ២កន្លែងប្រវែង ១០ ម៉ែត្រ ដែលអស់ទឹកប្រាក់សរុបជាង ១៩ ម៉ឺន ដុល្លារ សហរដ្ឋអមេរិកនឹងប្រើរយៈពេលសាងសង់ ៦ ខែ៕

អត្ថបទ៖ ឈាង មករា