សម្ដេចតេជោ ហ៊ុន សែន មិនទទួលយកការសុំទោសរបស់លោក សុន ឆ័យ ឡើយ

លោក សុន ឆ័យ អនុប្រធានគណបក្សភ្លើងទៀន បានសរសេរលិខិតសុំទោសសម្ដេចតេជោ ហ៊ុន​ សែន នាយករដ្ឋមន្ត្រី និងជាប្រធានគណបក្សប្រជាជនកម្ពុជា ចំពោះការចោទប្រកាន់ដោយគ្មានការពិតលើគណបក្សប្រជាជនកម្ពុជាថា «លួចសន្លឹកឆ្នោត» ក្រោយការបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី ៥។ តែយ៉ាងក៏ដោយសម្ដេចតេជោ ហ៊ុន សែន បានប្រកាសមិនទទួលយកការសុំទោស នោះឡើយ។

សម្ដេចតេជោ ហ៊ុន សែន បានទម្លាយសារឆ្លើយឆ្លងរវាងសម្ដេច ជាមួយលោក សយ សុភាព អ្នកសារព័ត៌មានជើងចាស់ ពាក់ព័ន្ធនឹងរឿងលោក សុន ឆ័យ អនុប្រធានគណបក្សភ្លើងទៀន ចង់សុំទោសសម្ដេច។ សារឆ្លើយឆ្លងនេះ គ្រាដែលសម្ដេចតេជោ ហ៊ុន សែន កំពុងបំពេញទស្សនកិច្ចនៅទីក្រុងនៅវៀងច័ន្ទប្រទេសឡាវ កាលពីថ្ងៃទី ១៣ ខែកុម្ភៈ ឆ្នាំ ២០២៣។

តាមរយៈ Channel Telegram ផ្ទាល់ខ្លួន នៅព្រឹកថ្ងៃទី ២៨ ខែកុម្ភៈនេះ សម្ដេចតេជោ ហ៊ុន សែន បានបញ្ជាក់ថា «យើងមិនទទួលយកការសុំទោសនោះឡើយ។ យើងចង់បញ្ចប់វប្បធម៌លាបពណ៌ និងការប្រមាថ។ យើងទទួលយកមិនបាននូវការចោទប្រកាន់ថា យើងជាអ្នកលួចសន្លឹកឆ្នោត។ យើងធ្លាប់បានគេសុំទោសច្រើនដងហើយ តែរឿងច្រំដែលនៅតែកើតឡើង ទើបយើងចង់បញ្ចប់វប្បធម៌រឿងដដែលហើយសូមទោសតាមផ្លូវតុលាការ ដើម្បីឲ្យមនុស្យអាក្រក់វារាងចាល»។

សម្ដេចតេជោ ហ៊ុន សែន លើកឡើងទៀតថា «ភាពខ្លួនឯងបានដឹងច្បាស់ហើយតើ សម រង្ស៊ី ធ្លាប់បានសូមទោសខ្ញុំ តែទីបំផុតវាកើតដដែល។ អ្នកគាំទ្រវា គឺដូចគ្នាដែលយើងត្រូវតែប្រើផ្លូវច្បាប់ ដើម្បីបញ្ចប់រឿងច្រំដែលនេះ»។

តាមរយៈលិខិតគោរពជូន សម្ដេចតេជោ ហ៊ុន សែន កាលពីថ្ងៃទី ១៣ ខែកុម្ភៈ ឆ្នាំ ២០២៣ លោក សុន ឆ័យ អនុប្រធានគណបក្សភ្លើងទៀន​ បានសរសេររៀបរាប់ថា «ដោយបានដឹងថា គណបក្សប្រជាជនកម្ពុជា បានចាត់ទុកពាក្យសម្តីមួយផ្នែក ដែលរូបខ្ញុំ បានឆ្លើយក្នុងបទសម្ភាសន៍ ជាមួយសារព័ត៌មាន ឌឹ ខេមបូឌាដេលី កាលពីថ្ងៃទី ៧ ខែមិថុនា ឆ្នាំ ២០២២ថា បាន “ចោទគណបក្សប្រជាជនកម្ពុជា ថាជាចោរលួចសន្លឹកឆ្នោត” នោះខ្ញុំសុំធ្វើការបដិសេធការចោទប្រកាន់នេះ»។

លោក សុន ឆ័យ តាមរយៈលិខិតដដែល បានសរសេរបន្តថា «រូបខ្ញុំបាទ សុន ឆ័យ មិនដែលមានចេតនា ចោទគណបក្សប្រជាជនកម្ពុជា ឬគណៈកម្មាធិការជាតិ រៀបចំការបោះឆ្នោត (គ.ជ.ប) ថាជាចោរលួចសន្លឹកឆ្នោត ហើយក៏នឹងមិនមានបំណង ចោទថា គណបក្សប្រជាជនកម្ពុជា ជាចោរលួច សន្លឹកឆ្នោតនេះ នៅពេលអនាគតនោះដែរ។ បើគណបក្សប្រជាជនកម្ពុជា ឬគណៈកម្មាធិការជាតិ រៀបចំការបោះឆ្នោត (គ.ជ.ប) ចាត់ទុកសម្តីក្នុងបទសម្ភាសន៍ ថាខ្ញុំបានចោទជាចោរ លួចសន្លឹកឆ្នោតនោះ ខ្ញុំសុំអភ័យទោស»។

ជាមួយគ្នានេះ លោក សុន ឆ័យ ក៏បានគាំទ្រសេចក្តីសម្រេចចិត្ត នៃមហាសន្និបាតវិសាមញ្ញតំណាងទូទាំងប្រទេស របស់គណបក្សប្រជាជនកម្ពុជា កាលពីថ្ងៃទី ២៨-២៩ មករា ឆ្នាំ ២០២៣ កន្លងទៅថ្មីៗនេះ ផងដែរ៕