អ្នកជំនាញ៖ ការដួលរលំធនាគារអាមេរិក​មិនជះឥទ្ធិពលមកលើកម្ពុជា តែវិបត្តិនេះអាចក្លាយជាឱកាសល្អ​សម្រាប់កម្ពុជា

ការដួលរលំនៃធនាគារមួយចំនួននៅអាមេរិក បាននិងកំពុងធ្វើឱ្យស្ថាប័នធនាគារ មីក្រូហិរញ្ញវត្ថុ នៅលើពិភពលោក តាមដានដោយយកចិត្តទុកដាក់អំពីផលប៉ះពាល់ និងឥទ្ធិពលមកលើប្រទេសខ្លួន ដោយប្រុងប្រយ័ត្នបំផុត។

ដោយឡែកនៅកម្ពុជា អ្នកជំនាញហិរញ្ញវត្ថុ និងសេដ្ឋកិច្ច មើលមិនទាន់ឃើញអំពីឥទ្ធិពល ដែលធ្វើឱ្យប៉ះពាល់​មកលើវិស័យធនាគារ និងហិរញ្ញវត្ថុក្នុងប្រទេសកម្ពុជា នៅឡើយទេ។

លោក កាំង តុងងី អ្នកនាំពាក្យសមាគមមីក្រូហិរញ្ញវត្ថុកម្ពុជា បានលើកឡើងថា កម្ពុជា បាននិងកំពុងតែយកចិត្តទុក​ដាក់លើវិស័យហិរញ្ញវត្ថុ ដោយមានការប្រុងប្រយ័ត្ន និងបង្កើតសេនារីយ៉ូផ្សេងៗគ្នា ដើម្បីបង្ការទុកជាមុន ប្រសិនបើផល​ប៉ះពាល់នៃការដួលរលំធនាគារនៅអាមេរិកនេះ រាលដាលដល់កម្ពុជា។ លោកថា ក្នុងដំណាក់កាលនេះ វាលឿនពេក យើងមិនអាចវាយតម្លៃបានទេ តែយ៉ាងណា វិស័យធនាគារ និងមីក្រូហិរញ្ញវត្ថុនៅកម្ពុជា តែងបានត្រៀមខ្លួន និងមានការ​ប្រុងប្រយ័ត្នជានិច្ច។ នៅតាមគ្រឹះនីមួយៗ តែងធ្វើតេស្តអំពីសុខុមាលភាពជាប្រចាំ ដើម្បីការពារនូវហានិភ័យ​ផ្សេងៗ​ដែលអាចកើនឡើង។

ទាក់ទងនឹងបញ្ហាសេដ្ឋកិច្ច លោក កាំង តុងងី មើលឃើញថា អាចនឹងប៉ះពាល់ខ្លះៗ ប៉ុន្តែមិនធ្ងន់ធ្ងររហូតដល់​ដួលរលំ​ធនា​គារ​នៅកម្ពុជាឡើយ។ លោកបន្តដូច្នេះថា« លុយដែលប្រមូលបាន ធនាគារនៅស្រុកខ្មែរ យកទៅប្រើប្រាស់​ទៅលើ​ការផ្តល់កម្ចី មិនយកទៅវិនិយោគផ្តេសផ្កាសឡើយ»។

លោកបណ្ឌិត អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា បានប្រាប់សារព័ត៌មានក្នុងស្រុកថា ការដួលរលំ​របស់​ធនាគារ នៅសហរដ្ឋអាមេរិកមិនបានធ្វើឲ្យប៉ះពាល់ដល់ប្រព័ន្ធធនាគារ និងស្ថានភាពហិរញ្ញវត្ថុរបស់កម្ពុជានោះទេ។ ធនាគារនៅកម្ពុជាស្ថិតនៅក្នុងបរិយាកាសសេដ្ឋកិច្ចក្រោមច្បាប់ និងបទប្បញ្ញត្តិរបស់ធនាគារជាតិនៃកម្ពុជា ជាអា​ណា​ព្យបាល។

លោកបណ្ឌិត អ៊ិន ចាន់នី បានគូសបញ្ជាក់ថា កម្ពុជា ជាប្រទេសតូច ប៉ុន្តែមានអាណាព្យាបាលពោរពេញ​ដោយបទ​ពិសោធន៍ និងការអភិរក្សនិយមក្នុងការជួយកាត់បន្ថយហានិភ័យនានានៅក្នុងប្រព័ន្ធធនាគារ និងមីក្រូហិរញ្ញវត្ថុ។ លោក អះអាងថា ប្រព័ន្ធធនាគារកម្ពុជានៅតែបន្តរឹងមាំ ដោយមិនបានរងឥទ្ធិពលពីវិបត្តិធនាគារនៅអាមេរិកឡើយ។

ជាមួយគ្នានេះ លោក ង៉ែត ជូ អ្នកជំនាញសេដ្ឋកិច្ច និងហិរញ្ញវត្ថុ មើលឃើញចំពោះវិបត្តិនៅអាមេរិកនេះ ជាឱកាស​សម្រាប់កម្ពុជា ទៅវិញ។ លោក បានសរសេរនៅលើហ្វេសប៊ុកផ្លូវការដូច្នេះថា«កាលពីវិបត្តិហិរញ្ញវត្ថុពិភពលោកឆ្នាំ២០០៨ ធនាគារដ៏ធំរបស់អាមេរិក Leman Brothers ត្រូវក្ស័យធន។ វិបត្តិលើកនេះអាចធំជាងវិបត្តិលើកមុន។ វិបត្តិឆ្នាំ២០០៨ បានផ្តល់ឱកាសល្អក្នុងការវិនិយោគលើធនាគារ ដីធ្លី ចំនួន៦ឆ្នាំ គឺឆ្នាំ២០១០-២០១៦។ ដោយឡែកវិបត្តិលើកនេះ ក៏អាច​មានឱកាសល្អ ក្នុងការវិនិយោគរង្វង់៦ឆ្នាំដែរ គឺឆ្នាំ២០២២-២០២៨ ដូច្នេះគួរឆ្លៀតលៃលកបែង​ចែកធនធានដោយ​ភាពឆ្លាតវៃវិនិយោគចាប់ពីពេលនេះទៅ រហូតដល់ឆ្នាំ២០២៨ និងវិនិយោគជាប់ជាប្រចាំរៀងរាល់ឆ្នាំ»។

ពាក់ព័ន្ធនឹងបញ្ហានេះ សម្តេចតេជោ ហ៊ុន សែន សូមឱ្យពលរដ្ឋកុំតក់ស្លត់ កុំភិនភ័យ និងស្លន់ស្លោរ ចំពោះមុខ​វិបត្តិច្រំដែល ដែលកើតឡើងពីការដួលរលំនៃធនាគាររបស់អាមេរិកនេះ។ សម្តេច បានអំពាវនាវដល់ពលរដ្ឋខ្មែរ ដែលបានដាក់ប្រាក់នៅធនាគារ កុំមានការស្លន់ស្លោរ ព្រោះការស្លន់ស្លោរនឹងធ្វើឱ្យបាត់បង់ប្រយោជន៍ទៅវិញទេ។ សម្តេចថ្លែងបែបនេះ នៅក្នុងពិធីចែកសញ្ញាបត្រដល់និស្សិតនៃសកលវិទ្យាបៀប្រាយ នាព្រឹកថ្ងៃទី ១៦ មីនា។

ថ្នាក់ដឹកនាំកំពូលកម្ពុជា បានសង្កត់ធ្ងន់ថា ពលរដ្ឋត្រូវជឿទុកចិត្តទៅលើសមត្ថភាពគ្រប់គ្រងនៃវិស័យធនាគារ និងហិរញ្ញវត្ថុនៅកម្ពុជា ព្រោះធនាគារ មានទុនបម្រុងគ្រប់គ្រាន់ដើម្បីដោះស្រាយបញ្ហានេះ។

ទន្ទឹមនឹងនេះ លោក កាំង តុងងី បានគូសបញ្ជាក់ថា រដ្ឋាភិបាលអាមេរិក បានគ្រប់គ្រងយ៉ាងម៉ត់ចត់ ដូច្នេះការ​ដូលរលំធនាគារអាមេរិក មិនរាលដាលធ្ងន់ធ្ងរដល់ប្រទេសដទៃឡើយ៕