អាជ្ញាធរខេត្តបន្ទាយមានជ័យ និងថៃ ជួយសម្រួលការកកស្ទះពលករខ្មែរដែលសម្រុកចូលស្រុក

អាជ្ញាធរខេត្តបន្ទាយមានជ័យ និងខេត្តស្រះកែវ ប្រទេសថៃ កំពុងសហការគ្នាដោះស្រាយបញ្ហាកកស្ទះជាបន្ទាន់របស់ពលខ្មែរ ដែលធ្វើការនៅប្រទេសថៃ និងសម្រុកមកស្រុកកំណើតវិញក្នុងឱកាសបុណ្យចូលឆ្នាំថ្មីប្រពៃណីជាតិខ្មែរ។ នេះបើតាមការប្រកាសឲ្យដឹងរបស់រដ្ឋបាលខេត្តបន្ទាយមានជ័យ នៅថ្ងៃទី១០ ខែមេសានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រូបភាព៖ រដ្ឋបាលខេត្តបន្ទាយមានជ័យ

ដើម្បីកុំឱ្យពលករចំណាកស្រុកខ្មែរមានការកកស្ទះ និងរងចាំយូរនៅច្រកទ្វារអន្តរជាតិប៉ោយប៉ែត-ក្លងឡឹក អាជ្ញាធរកម្ពុជា និងថៃ បានជួយជាសោះស្រាយបញ្ហាទាំងនេះ ដើម្បីសម្រួលដល់ការវិលត្រឡប់មកស្រុកកំណើតវិញរបស់ប្រជាជនខ្មែរ នៅថ្ងៃទី១០ ខែមេសានេះ។ ការសហការសម្របសម្រួលរបស់ភាគីទាំង២ ធ្វើឡើងបន្ទាប់ពីនៅព្រំដែនប៉ោយប៉ែត មានការកកស្ទះមនុស្សជាច្រើន ព្រោះថាប្រជាជនខ្មែរ ដែលធ្វើចំណាកស្រុកទៅប្រទេសថៃ បានសម្រុកមកកម្ពុជាវិញ ក្នុងឱកាសបុណ្យចូលឆ្នាំប្រពៃណីជាតិខ្មែរ ឆ្នាំ២០២៣។

រូបភាព៖ រដ្ឋបាលខេត្តបន្ទាយមានជ័យ

រដ្ឋបាលខេត្តបន្ទាយមានជ័យ បានបញ្ចាក់ថា បញ្ហាដែលនាំឱ្យមានមនុស្សកកស្ទះនៅតំបន់ច្រកទ្វារព្រំដែនប៉ោយប៉ែត គឺព្រោះតែប្រជាជនកំពុងអង្គុយរង់ចាំពិនិត្យបំពេញបែបទនៅខាងទឹកដីថៃ មុននឹងឆ្លងមកទឹកដីកម្ពុជា។ ចំណែក ខាងសមត្ថកិច្ចកម្ពុជា ក៏បានយកចិត្តទុកដាក់ ដើម្បីសម្របសម្រួលពន្លឿននីតិវិធី ធ្វើយ៉ាងណាសម្រួលដល់ប្រជាជនខ្មែរដែលមកពីប្រទេសថៃឆាប់បានទៅស្រុកកំណើតរបស់ខ្លួនផងដែរ។

រូបភាព៖ រដ្ឋបាលខេត្តបន្ទាយមានជ័យ

ប្រភពដដែលក៏បានបញ្ជាក់បន្ថែមថា ខេត្តបន្ទាយមានជ័យ និងខេត្តស្រះកែវ ជាខេត្តសម្ព័ន្ធមេត្រីភាពគ្នា នៅពេលដែលមានបញ្ហាអ្វីមួយ តែងតែជួយគ្នា សហការសម្របសម្រួលគ្នាទៅវិញដោះស្រាយបញ្ហាផ្សេងៗឱ្យបានល្អ និងដើម្បីប្រទេសជាតិទាំងសងខាងផងដែរ៕