គយប្រមូលចំណូលបានជាង ៥៦០លានដុល្លារ

ក្នុងរយៈពេល ៣ខែ ដើមឆ្នាំ ២០២៣នេះ ការប្រមូលចំណូលរបស់អគ្គនាយកដ្ឋានគយ និងរដ្ឋាករ ប្រមូលចំណូល​បានជាង ៥៦៤លានដុល្លារ ពោលគឺថយចុះប្រមាណ ៥,២ភាគរយ បើធៀបនឹង​រយៈពេលដូចគ្នាកាលពីឆ្នាំ ២០២២។

សម្រាប់មុខទំនិញ ដែលកម្ពុជា នាំចេញ មានដូចជា ផលិតផលកាត់ដេរ គិតជាទឹកប្រាក់ជាង​២ពាន់​រយលានដុល្លារ ថយចុះជាង​២២ភាគរយ។ ប៉ុន្ដែការនាំចេញផលិតផល​មិនមែនកាត់ដេរ ដូចជា គ្រឿងបំណែកអេឡិចត្រូនិក បង្គុំខ្សែភ្លើង កង់ ផលិតផលពីឈើ ឈើកែច្នៃ ផលិតផលពីប្លាស្ទិក គ្រឿងបន្លាស់រថយន្ត កុងផ្លាកេ អំពូលលម្អ ស្បែកសត្វកែច្នៃ និងផលិតផលផ្សេងៗទៀត មានទឹកប្រាក់ជាង ១៤០០ លានដុល្លារ ពោលគឺកើនឡើងប្រហែល ១៩ភាគរយ។

ដោយឡែក ការនាំចេញផលកសិកម្ម សម្រេចបានជាង ​១២០០ លានដុល្លារ កើនឡើងជិត​១១ភាគរយ ក្នុងនោះ កសិផលស្រូវនាំចេញមានតម្លៃជាង ៤ពាន់លានដុល្លារ កើនឡើងប្រមាណ ១១២,៨ លានដុល្លារអាមេរិក, ការនាំចេញ​អង្ករមានតម្លៃ ១២៦ លានដុល្លារអាមេរិក កើនឡើងប្រមាណ ២០,៩ លានដុល្លារអាមេរិក, កៅស៊ូនាំចេញ​មានតម្លៃ ៩៣,១ លានដុល្លារអាមេរិក ថយចុះប្រមាណ ១០,១ លានដុល្លារអាមេរិក និងកសិផលផ្សេង​ទៀតមានតម្លៃ ៦២៨,៤ លានដុល្លារអាមេរិក កើនឡើង ១២ លានដុល្លារអាមេរិក។

យោងតាមទិន្នន័យដដែលបានបង្ហាញថា ប្រភពចំណូលដែលច្រើនជាងគេ គឺបានមកពីអាករលើតម្លៃបន្ថែមមានជាង ៤២ភាគរយ អាករពិសេសមានជិត ៣៣ភាគរយ និងពន្ធគយមាន ២០ភាគរយ រួមទាំងប្រភពចំណូលផ្សេងៗទៀត៕