ព្រឹត្តិការណ៍បង្ហោះខ្លែងថ្នាក់អន្តរជាតិដំបូងបង្អស់នៅកម្ពុជា បើក​ជា​ផ្លូវការ

ព្រឹត្តិការណ៍បង្ហោះខ្លែងថ្នាក់អន្តរជាតិដំបូងបង្អស់នៅកម្ពុជា (SkyFest) ក្រោមពាក្យស្លោក “ខ្មែរអាចហោះបាន” ប្រារព្ធឡើង​នៅបរិវេណគម្រោង Bay of Lights ក្នុងក្រុងព្រះសីហនុ ក្រោមការ​រៀបចំ​ដោយក្រុមហ៊ុនខេនូភី សែន ឌីវេឡុបម៉ិន (Canopy Sands Development) ដែលជាក្រុមហ៊ុនអភិវឌ្ឍន៍អចនទ្រព្យសំខាន់របស់ក្រុមហ៊ុនព្រីនស៍ ហូលឌីង គ្រុប (Prince Holding Group)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រឹត្តិការណ៍បង្ហោះខ្លែងអន្តរជាតិ (SkyFest) មាន​ប្រទេសចំនួន ០៩ ចូលរួម ​រួមមាន កម្ពុជា ឥណ្ឌូនេស៊ី វៀតណាម ថៃ ហ្វីលីពីន សឹង្ហបូរី ម៉ាឡេស៊ី ចិន និងបារាំង។

លោក លី ធុជ ក្នុងនាមរដ្ឋាភិបាល​បាន​ចាត់ទុកព្រឹត្តិការណ៍ SkyFest នេះ ចូលរួម​លើកកម្ពស់ថែរក្សាវប្បធម៌ប្រពៃណីជាតិ និងប្រមូលផ្តុំមហាគ្រួសារខ្មែរក្រោមស្មារតីតែមួយ ដើម្បីឲ្យយុវជនជំនាន់ក្រោយបានយល់ដឹង និងចេះស្រឡាញ់​ថែរក្សានូវអ្វីដែលខ្មែរមាន ហើយក៏ជានិមិត្តរូបនៃភាពធន់ ភាពច្នៃប្រឌិត និងសក្តានុពលគ្មានទីបញ្ចប់។

ក្រោម​ប្រធានបទ “ខ្មែរអាចហោះបាន” មិនត្រឹមតែឆ្លុះបញ្ចាំងពីគុណតម្លៃនៃខ្លែងហោះខ្ពស់ប៉ុណ្ណោះទេ ប៉ុន្តែក៏ជាក្តីប្រាថ្នា និងក្តីសុបិនរបស់ប្រជាជនកម្ពុជាផងដែរ នៅពេលដែលយើងបន្តបោះជំហានឆ្ពោះទៅកាន់អនាគតដ៏ត្រចះត្រចង់។

លោក​ទេសរដ្ឋមន្រ្តី បានបញ្ជាក់បន្ថែមទៀតថា ព្រឹត្តិការណ៍ SkyFest ក៏​នឹង​ចូលរួមលើកកម្ពស់ខេត្តព្រះសីហនុទៅជាគោលដៅទេសចរណ៍លំដាប់ពិភពលោក៕

អត្ថបទ៖ ឡាង កុសល្យ