នាយឧត្តមសេនីយ៍ សៅ សុខា សួរសុខទុក្ខយុវជនស្ម័គ្រចិត្តរងរបួសព្រោះការប្រជ្រៀតទស្សនាបាល់ទាត់

នៅរសៀលថ្ងៃចន្ទ ទី៨ ខែឧសភា ឆ្នាំ២០២៣ នាយឧត្តមសេនីយ៍ សៅ សុខា ប្រធានសហព័ន្ធកីឡាបាល់ទាត់កម្ពុជា បានអញ្ជើញសួរសុខទុក្ខដល់យុវជនស្ម័គ្រចិត្ត រៀបចំសណ្តាប់ធ្នាប់ក្នុងព្រឹត្តិការណ៍ស៊ីហ្គេម លើកទី៣២ រងរបួសក្នុងពេលបំពេញភារកិច្ច ដោយសារទស្សនិកជនដណ្តើមគ្នាប្រជ្រៀតចូលទស្សនាដោយផ្ទាល់ ក្នុងការប្រកួតកីឡាបាល់ទាត់រវាងក្រុមកម្ពុជា និងក្រុមមីយ៉ាន់ម៉ា។

នាយឧត្តមសេនីយ៍ សៅ សុខា បានឱ្យដឹងថា៖ “យុវជនស្ម័គ្រចិត្តដែលរងរបួសនោះ មានម្នាក់មកពីខេត្តសៀមរាប ម្នាក់មកពីខេត្តបាត់ដំបង ម្នាក់មកពីខេត្តពោធិ៍សាត់ និងស្រីម្នាក់ជាអ្នកជំងឺកំពុងសម្រាកព្យាបាលនៅមន្ទីរពេទ្យសម្ភពក្រុង។ ខ្ញុំ និងកូនប្រុសបានទៅសួរសុខទុក្ខ និងផ្តល់ថវិកាបន្តិចបន្ទួចសម្រាប់សម្រួលប្រើប្រាស់ទិញចំណីអាហារ ឬប្រើប្រាស់តាមតម្រូវការផ្សេងៗទៀតរបស់អ្នកជំងឺ”។

គួរបញ្ជាក់ថា កាលពីរាត្រីថ្ងៃទី៧ ខែឧសភា ឆ្នាំ២០២៣ម្សិលមិញនេះ ជាការប្រកួតបាត់ទាត់រវាងក្រុមជម្រើសជាតិកម្ពុជា និងមីយ៉ាន់ម៉ា ក្នុងព្រឹត្តិការណ៍ស៊ីហ្គេម ដោយមានមហាជនជាច្រើនបានប្រជ្រៀតចូលទស្សនាការប្រកួតនេះ។ ចំពោះលទ្ធផលប្រកួត គឺ ក្រុមជម្រើសជាតិ មីយ៉ាន់ម៉ា បានទាត់បាល់បញ្ចូលទីកម្ពុជា ២ ដល់ ០។

ភ្លាមៗនោះ នាយឧត្តមសេនីយ៍ សៅ សុខា បានប្រកាសលាលែងពីតំណែង ប្រធានសហព័ន្ធកីឡាបាល់ទាត់កម្ពុជា តាមការសន្យា។ ប៉ុន្តែមុននេះបន្តិច តាមរយៈសារជាសំឡេង សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានសរសើរនូវការដឹកនាំសហព័ន្ធកីឡាបាល់ទាត់ក​ម្ពុជា ពីសំណាក់លោកនាយឧត្ដមសេនីយ៍ សៅ សុខា និងបានអំពាវនាវឱ្យលោកបន្តដឹកនាំសហព័ន្ធកីឡាបាល់ទាត់ក​ម្ពុជាបន្តទៀត៕

អត្ថបទ៖ ច័ន្ទ ​វីរៈ