កីឡាការិនី ស្រួង ភាវី៖ ទោះសមត្ថភាពខ្លាំងប៉ុនណា បើឥរិយាបថមិនសមរម្យ គឺមិនទាន់ខ្លាំងអស្ចារ្យទេ

​ក្រោយពីទទួលបានមេដាយមាសជូនជាតិកីឡាការិនីស្នូកឃ័រ និងប៊ឺយ៉ាការ៉ុម កីឡាការិនី ស្រួង ភាវី កាន់តែមានប្រជាប្រិយភាព និងទទួលបានការគាំទ្រកាន់តែខ្លាំងពីសំណាក់ប្រជាជនកម្ពុជា។ កីឡាការិនីរូបនេះ បានបង្ហាញពីការយល់ឃើញរបស់ខ្លួនថា ភាពអស្ចារ្យ​ គឺត្រូវការមនុស្សដែលមានឥរិយាបថ ឬបុគ្គលិកលក្ខណល្អសមរម្យ បើទោះបីជាមានសមត្ថភាពខ្លាំងប៉ុណ្ណាក៏ដោយ។

កីឡាការិនី ស្រួង ភាវី បានសរសេររៀបរាប់លើហ្វេសប៊ុករបស់ខ្លួននៅថ្ងៃព្រហស្បតិ៍នេះថា៖ «សម្រាប់​ខ្ញុំ​យល់ថា​ ទោះសមត្ថភាព​យើងខ្លាំង​ប៉ុនណា​ក៏​ដោយ​ បើឥរិយាបថ​ឬ​បុគ្គលិក​លក្ខណៈ​យើង​មិន​សមរម្យ​ ​គឺមិទាន់អស្ចារ្យទេ»។ កីឡាការិនីរូបនេះ បានបន្តថា៖ «មនុស្សដែលមានអាកប្បកិរិយាល្អ មានចរិតថ្លៃថ្នូរ និងស្លូតបូត​ បេះដូងពោរពេញដោយសេចក្ដីស្រឡាញ់​ បេះដូងស្មោះសរ​ ចេះដាក់ខ្លួន ចេះអត់ធ្មត់ក្នុងជីវិតជីវិតរបស់ខ្លួន​ នុ៎ះ​នឹងអាចទទួលបានជោគជ័យជាក់ជាពុំខានឡើយ»។

គួរឲ្យដឹងថា ស្រួង ភាវី ជាកីឡាការិនីស្នូកឃ័រ និង​​ប៊ឺយ៉ាការ៉ុមឆ្នើមមួយរូបរបស់​ជម្រើស​ជាតិកម្ពុជា ហើយ​បាននាំយកមេដាយមាសជូនជាតិ បន្ទាប់ពីបានប្រកួត​ឈ្នះកីឡាការិនីរៀតណាម វគ្គផ្តាច់ព្រ័ត្រ លើវិញ្ញាសាប៊ឺយ៉ាការ៉ុម៣បាំង៕