ព័ត៌មានជាតិ
គួរវិនិយោគលើអាជីវកម្មបង្កើតថ្មី (startup) ក្នុងលក្ខខណ្ឌបែបណា ដើម្បីបង្ការហានិភ័យ
លោកស្រី Barbara Corcoran ជាអ្នកវិនិយោគលើអាជីវកម្មបង្កើតថ្មី (startup) និងអចលនទ្រព្យជនជាតិអាមេរិក។ លោកស្រីថា ក្នុងចំណោម startups ដែលគាត់វិនិយោគចំនួន១៥០ មានតែ១០ភាគរយបណ្ណោះ ដែលបានផ្តល់នូវប្រាក់ចំណេញ។ រីឯ៩០ភាគរយទៀត គឺខាតបង់។ មានន័យថា រៀងរាល់ការវិនិយោគចំនួន១០ មានតែ១ទេ ដែលជោគជ័យ។ នេះជាលទ្ធផលវិនិយោគនៅប្រទេសមានការអភិវឌ្ឍខ្លាំង (សហរដ្ឋអាមេរិក) ដែលមានប្រព័ន្ធគាំទ្រសម្បូរបែប (good ecosystem)។ ចុះចំណែកការវិនិយោគលើ startup នៅកម្ពុជាដែលប្រពន្ធ័គាំទ្រនៅមានកម្រិតនោះ តើនឹងមានហានិភ័យខ្លាំងប៉ុណ្ណា?
ទាក់ទងនឹងការវិនិយោគលើអាជីវកម្មបង្កើតថ្មី (startup)នេះ លោក ង៉ែត ជូ ស្ថាបនិកក្រុមហ៊ុន F.I Vision Capital Plc និងជំនាញផ្នែកគ្រប់គ្រងហិរញ្ញវត្ថុ បានធ្វើការចែករំលែកចំនួន៣ចំណុច ដើម្បីការពារហានិភ័យសម្រាប់អ្នកដែលចង់វិនិយោគលើអាជីវកម្មបង្កើតថ្មី។ ចំណុចទាំងបីនោះ រួមមាន៖
១. អ្នកមានឆន្ទៈមោះមុតក្នុងការធ្វើអាជីវកម្មបង្កើតថ្មី និងសហគ្រិនឱ្យជោគជ័យ។
២. អ្នកជាអ្នកអាជីពដែលមានភាពចាស់ទុំ (senior professional) និងមានជំនាញច្បាស់លាស់ហើយមានបំណងធ្វើជាអ្នកប្រឹក្សាណែនាំដល់សហគ្រិនដែលជាស្ថាបនិករបស់អាជីវកម្មបង្កើតថ្មី។ ពោលគឺអ្នកគួរតែជាអ្នកគ្រប់គ្រងជាន់ខ្ពស់ ឬជាអគ្គនាយក ឬជាក្រុមប្រឹក្សាភិបាលនៅក្រុមហ៊ុនដទៃទៀតដែលមានប្រព័ន្ធគ្រប់គ្រងល្អ។
៣. ដោយហេតុថាការវិនិយោគលើអាជីវកម្មបង្កើតថ្មីមានហានិភ័យខ្ពស់ អ្នកគួរមានធនធានគ្រប់គ្រាន់ដែលអាចប្រថុយនឹងហានិភ័យបាន និងបែងចែកធនធានយ៉ាងច្រើនត្រឹម២០%ដើម្បីវិនិយោគលើអាជីវកម្មបង្កើតថ្មី។ ឧទាហរណ៍ ប្រសិនបើអ្នកមានទ្រព្យសម្បត្តិ១០លានដុល្លារ អ្នកគួរវិនិយោគលើអាជីវកម្មបង្កើតថ្មីយ៉ាងច្រើនបំផុតត្រឹម២លានដុល្លារ។
លោក វង្សី វិស្សុត រដ្ឋលេខាធិការប្រចាំការក្រសួងសេដ្ឋកិច្ចនិងហិរញ្ញវត្ថុ និងជាប្រធាន ក្រុមប្រឹក្សាបរធនបាលនៃមូលនិធិអភិវឌ្ឍសហគ្រិនភាព បានលើកឡើងនៅក្នុងវេទិកាសហគ្រិនខ្មែរ កាលពីថ្ងៃទី ២៤ ឧសភាថា ក្នុងស្ថានភាពបច្ចុប្បន្ននេះ ការបង្កើតសហគ្រិនភាព មិនអាចរីកចម្រើនតាមយថាហេតុបានទេ។ មានន័យថា ការអភិវឌ្ឍសហគ្រិនភាព ឬការកសាងសហគ្រិននៅកម្ពុជា ទាមទារឱ្យមានការជួយពីរដ្ឋាភិបាល និងអ្នកពាក់ព័ន្ធ។ ដោយសារនៅកម្ពុជា មានលក្ខខណ្ឌមួយចំនួនដែលមិនបង្កឱ្យសហគ្រិនភាពអាចរីកលូតលាស់ដោយយថាហេតុបានទេ។ ទោះយ៉ាងណា លោកថា «អាចទៅបាន តែមានល្បឿនយឺតហើយដើរផ្លូវវែងឆ្ងាយ»។
ការលើកឡើងរបស់លោក វង្សី វិស្សុត ដូច្នេះ ដោយសារមូលដ្ឋានសេដ្ឋកិច្ច និងរចនាសម្ព័ន្ធកម្ពុជានៅទន់ខ្សោយ។ មួយវិញទៀត វប្បធម៌សហគ្រិនភាពនៅក្នុងប្រទេសកម្ពុជា នៅមានកម្រិតនៅឡើយ។ មានន័យថា ស្ថាប័នដែលមានតួនាទីផ្តល់មុខងារគាំទ្រការអភិវឌ្ឍរបស់ SME គឺនៅទន់ខ្សោយ។ កត្តាទាំងអស់នេះ ត្រូវតែរួមគ្នាពង្រឹង ដើម្បីជំរុញឱ្យវិស័យ SME មានការចាំបាច់ ទាំងក្នុងការដោះស្រាយបញ្ហាសេដ្ឋកិច្ច ការងារ និងបញ្ហាសង្គម។
មន្រ្តីជាន់ខ្ពស់នៃក្រសួងសេដ្ឋកិច្ចរូបនេះ បានបន្តថា រាជរដ្ឋាភិបាលចង់ឃើញធុរកិច្ចបង្កើតថ្មី (Start-up) រីកលូតលាស់ក្លាយ ទៅជាសហគ្រាសធុនតូច និងមធ្យម (SMEs), ចង់ឃើញសហគ្រាសធុនតូច (Micro Enterprises) រីកលូតលាស់ក្លាយ ទៅជា សហគ្រាសធុនមធ្យម (Medium Enterprises), និងចង់ឃើញសហគ្រាសធុនមធ្យម រីកចម្រើនលូតលាស់អភិវឌ្ឍន៍ខ្លួន ទៅជាសហគ្រាសធុនធំ ព្រមទាំង ចង់ឃើញសហគ្រាសទាំងនោះ ជួយបង្កើតតម្លៃបន្ថែមឱ្យបានកាន់តែច្រើន ក្នុងសេដ្ឋកិច្ចជាតិ និងបង្កើនសមត្ថភាពប្រកួតប្រជែងឱ្យកាន់តែខ្លាំងក្លា៕
-
ព័ត៌មានជាតិ៦ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ៤ ថ្ងៃ ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានជាតិ៤ ថ្ងៃ ago
បណ្ឌិត គិន ភា៖ «ហេតុអីមិនបន្ទោសអ្នកបោកគេ បែរជាបន្ទោសអ្នកត្រូវគេបោកទៅវិញ?»
-
ចរាចរណ៍៩ ម៉ោង ago
បឋម៖ រថភ្លើងបុករថយន្ដក្រុងដឹកអ្នកដំណើររបួសច្រើននាក់
-
ព័ត៌មានជាតិ៥ ថ្ងៃ ago
កម្ពុជានឹងមានភ្លៀងធ្លាក់ ១៥% ដល់ថ្ងៃទី ២៧ ដំណាច់ខែមីនា
-
សេដ្ឋកិច្ច៥ ថ្ងៃ ago
មន្ត្រីជាន់ខ្ពស់ធនាគារជាតិ៖ ក្រដាសប្រាក់ ៥ម៉ឺន រៀល មានគូសឆ្នូតកណ្តាលអាចប្តូរយកប្រាក់ថ្មីបានដោយឥតគិតថ្លៃ
-
ព័ត៌មានជាតិ៥ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
ព័ត៌មានអន្ដរជាតិ៣ ថ្ងៃ ago
លម្អិតហេតុការណ៍រន្ធត់ កប៉ាល់ដឹកកុងតឺន័រ បុកបាក់ស្ពាននៅទីក្រុង Baltimore