ឥណ្ឌា៖ ទស្សនកិច្ចរបស់ព្រះមហាក្សត្រកម្ពុជា បានលើកកម្ពស់ទំនាក់ទំនងដ៏ល្អរវាងប្រទេសទាំងពីរ

​ថ្នាក់ដឹកនាំឥណ្ឌា បានចាត់ទុក​ព្រះរាជទស្សនកិច្ចរបស់ព្រះមហាក្សត្រនៃកម្ពុជា នៅប្រទេសឥណ្ឌា ជាមហា​ព្រឹត្តិការណ៍ដ៏សំខាន់ជាប្រវត្តិសាស្ត្រ ហើយតាមរយៈទស្សនកិច្ចនេះ នឹងលើកកម្ពស់ចំណងទាក់ទងដ៏ល្អប្រសើររវាងប្រទេសទាំងពីរឲ្យកាន់តែខ្ពស់។

យោងតាមសេចក្ដីប្រកាសរបស់ក្រសួងការបរទេសកម្ពុជា នៅថ្ងៃទី ៣១ ខែឧសភានេះ បានឲ្យដឹងថា ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្ស​ត្រកម្ពុជា​ បាន​​យាងបំពេញព្រះរាជទស្សនកិច្ចផ្លូវរដ្ឋនៅឥណ្ឌា ចាប់ពីថ្ងៃទី ២៩ ដល់ថ្ងៃទី ៣១ ខែឧសភា ឆ្នាំ ២០២៣ ដើម្បីប្រារព្ធខួបលើកទី ៧០ នៃការបង្កើតទំនាក់ទំនងការទូតរវាងប្រទេសទាំងពីរ។

ក្នុងព្រះរាជទស្សនកិច្ចនេះ ព្រះមហាក្សត្រនៃកម្ពុជា និងថ្នាក់ដឹកនាំឥណ្ឌា បានរំលឹកអំពីទំនាក់ទំនងដ៏ជិតស្និទ្ធរវាងកម្ពុជា និងឥណ្ឌា ជា​ពិសេស​រវាងព្រះបរមរតនកោដ្ឋ ព្រះបាទ នរោត្តម សីហនុ និងលោក ចាវ៉ាហាឡាល នេហ៍រុ នាយករដ្ឋមន្រ្តីទីមួយនៃសាធារណរដ្ឋឥណ្ឌា ដែលបានកសាង​មូលដ្ឋានគ្រឹះដ៏រឹងមាំសម្រាប់ទំនាក់ទំនងមិត្តភាព និងកិច្ចសហប្រតិបត្តិការជិតស្និទ្ធ ដែលកំពុងរីកចម្រើន និងត្រូវបានចាក់ឫសយ៉ាងជ្រៅនៅក្នុងកេរដំណែលរួមនៃប្រវត្តិសាស្ត្រសាសនា វប្បធម៌ និងអក្សរសាស្ត្ររវាងប្រទេសទាំងពីរ។

លោកស្រី ដ្រៅផាឌី មួរមូ និង​ថ្នាក់ដឹកនាំឥណ្ឌាផ្សេងទៀត​ បានចាត់ទុកថា ព្រះរាជទស្សនកិច្ចរបស់ព្រះមហាក្សត្រនៃកម្ពុជា នៅពេលនេះ ជាមហា​ព្រឹត្តិការណ៍ដ៏សំខាន់ជាប្រវត្តិសាស្ត្រ និងមានជំនឿយ៉ាងមុតមាំថា ទស្សនកិច្ចនេះនឹងលើកកម្ពស់ចំណងទាក់ទងដ៏ល្អប្រសើររវាងប្រទេសជាមិត្តទាំងពីរឲ្យកាន់តែខ្ពស់ និងជំរុញកិច្ចសហប្រតិបត្តិការប្រកបដោយផ្លែផ្កាបន្ថែមទៀត។

ទន្ទឹមនេះ ព្រះមហាក្សត្រកម្ពុជា និងថ្នាក់ដឹកនាំឥណ្ឌា បានវាយតម្លៃខ្ពស់ចំពោះទំនាក់ទំនង និងកិច្ចសហប្រតិបត្តិការទ្វេភាគីដែលកំពុងតែមានការរីកចម្រើន និងកំពុងត្រូវបានពូនជ្រុំឥតឈប់ឈរដោយថ្នាក់ដឹកនាំ និងប្រជាជននៃប្រទេសទាំងពីរក្នុងរយៈពេល ៧ ឆ្នាំកន្លងមកនេះ លើវិស័យជាច្រើនដែលជាផលប្រយោជន៍រួម នៃប្រទេសទាំងពីរ។

ភាគីទាំងពីរ បានសម្ដែងទំនុកចិត្តយ៉ាងមុតមាំថា មូលដ្ឋានដ៏រឹងមាំនៃទំនាក់ទំនងទ្វេភាគី នឹងក្លាយជាកម្លាំងចលករដ៏សំខាន់ ដើម្បីបន្តជំរុញឱ្យកិច្ចសហប្រតិបត្តិការដ៏ល្អប្រសើរលើគ្រប់វិស័យ ដែលជាផលប្រយោជន៍រួមកាន់តែមានភាពរីកចម្រើន និងស៊ីជម្រៅ សំដៅឆ្ពោះទៅរកអនាគតដ៏ត្រចះត្រចង់ និងប្រកបដោយវិបុលភាពសម្រាប់ប្រទេសទាំងពីរ៕