អគ្គិភ័យកើតឡើងជាង ៣០០លើកបង្កឱ្យមនុស្សស្លាប់ និងរបួសជិត ៤០នាក់ ត្រឹម៥ ខែ នៅទូទាំងប្រទេស

ក្នុងរយៈពេល៥ខែឆ្នាំ២០២៣នេះ គ្រោះអគ្គិភ័យ បានកើតឡើងចំនួន ៣០៤លើក ដោយបានបណ្តាលឱ្យមនុស្សស្លាប់ និងរងរបួសជិត ៤០នាក់ ព្រមទាំងបំផ្លាញលំនដ្ឋានជាង៣៤០ខ្នងផងដែរ ។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍​នៅព្រឹកថ្ងៃទី​០៣មិថុនានេះថា រយៈពេល៥ខែនេះ អគ្គិភ័យបានបណ្តាលឱ្យឆេះផ្ទះចំនួន ៣៤៣ខ្នងឆេះតូបផ្សារ ២៣តូប ឃ្លាំងទំនិញ ៨កន្លែង សាលារៀន១ខ្នង អគាររដ្ឋបាល៨កន្លែង រោងចក្រសិប្បកម្ម ៩កន្លែង ស្លាប់មនុស្ស១៤នាក់ និងរបួស២៣នាក់។

លោកបានបន្តថា ក្នុងចំណោមអ្នកស្លាប់១៤នាក់ក្នុងនោះ នៅរាជធានីភ្នំពេញមានចំនួន៣នាក់ រងរបួស៣នាក់ ឆេះផ្ទះ៥១ខ្នង ឆេះតូបផ្សារ៣តូប ឃ្លាំទំនិញ៥កន្លែង និងរោងចក្រសិប្បកម្ម១កន្លែងក្នុងករណីអគ្គិភ័យ៥៦លើក។

លោកបានបន្តទៀតថា ក្រៅពីនេះនៅខេត្តកណ្តាលមានអ្នកស្លាប់១នាក់ តាកែវ២នាក់ ស្វាយរៀង២នាក់ ស្ទឹងត្រែង១នាក់ កំពង់ចាម៣នាក់ និងខេត្តព្រះសីហនុ២នាក់។

បើតាមលោកឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការ ពន្លត់អគ្គិភ័យនិងសង្គ្រោះនៃអគ្គស្នង​ការដ្ឋាននគរបាលជាតិ​ធ្លាប់បានបញ្ជាក់ថា ដើមចមដែលនាំឲ្យមានគ្រោះអគ្គិភ័យកើតឡើង គឺបណ្ដាលមកពីការឆ្លង​ចរន្តអគ្គិសនីចំនួន ៤១.៥៥ភាគរយ, ប្រើប្រាស់ភ្លើងចំនួន ៣៨.២៤ភាគរយ និងក្ដាប់ មិនបានចំនួន២០.២១ភាគរយ៕

អត្ថបទ៖ សំអឿន