មន្រ្តីពន្ធដារ លើកទឹកចិត្តឱ្យពង្រីកសមាជិក​សមាគមអ្នកលក់ឡាន

លោក ហេង សុខណាង អគ្គនាយករងនៃអគ្គនាយកដ្ឋានពន្ធដារ បានលើកទឹកចិត្តដល់សមាជិក​នៃសមាគមអ្នកលក់យានយន្តកម្ពុជា ឱ្យចូលរួមជំរុញ និងចងក្រងពង្រីកសមាជិកឱ្យបានកាន់តែច្រើន ដើម្បីចូលរួមចុះបញ្ជីពន្ធដារ និងបំពេញកាតព្វកិច្ចសារពើពន្ធឱ្យបានត្រឹមត្រូវ សំដៅធានានូវតម្លាភាព និងការប្រកួតប្រជែងដោយស្មើភាពរវាងអ្នកប្រកបអាជីវកម្មលក់យានយន្តទាំងអស់។ លោកលើកឡើង​បែបនេះនៅក្នុងកិច្ចប្រជុំ កាលពីថ្ងៃទី ២១ ខែមិថុនា ឆ្នាំ ២០២៣។

មន្រ្តីជាន់ខ្ពស់ពន្ធដាររូបនេះ បានគូសបញ្ជាក់ថា អត្ថប្រយោជន៍នៃការចុះបញ្ជីពន្ធដារសម្រាប់សហគ្រាស មានដូចជា៖ មានឈ្មោះជាសហគ្រាសបានអនុវត្តត្រឹមត្រូវ តាមច្បាប់កំណត់ ​, ចៀសផុតពីការចុះបញ្ជីជាឯកតោភាគី , ទទួលបាននូវ​សេវាផ្តល់ព័ត៌មានជាប្រចាំអំពីដំណើរការនៃប្រព័ន្ធពន្ធដារ និងនីតិវិធីនៃការកំណត់ពន្ធស្របតាមច្បាប់ និងបទប្បញ្ញត្តិ​ស្តីពីពន្ធដារ។ សម្រាប់យន្តការ អាករ (​ប្រភេទ​ពន្ធ​ប្រយោល) លើតម្លៃបន្ថែមនៅពេលលក់ឱ្យ អតិថិជនជាបុគ្គល​ជាប់អាករ បុគ្គលនោះអាចទទួលបានអាករលើធាតុចូល ដើម្បីធ្វើការកាត់កងជាមួយអាករលើធាតុចេញ, អាចចូលរួម​ដេញ​ថ្លៃក្នុងការផ្គត់ផ្គង់ទំនិញ ឬសេវា ដោយប្រើប្រាស់ថវិការដ្ឋ, ចូលរួមចំណែកក្នុងការបង់ពន្ធចូលថវិការដ្ឋ រួមអភិវឌ្ឍសេដ្ឋកិច្ច-សង្គមឱ្យបានរីកចម្រើន សំដៅលើកកម្ពស់កិត្យានុភាព ឱ្យកាន់តែខ្ពស់ត្រដែតនៅលើឆាក​អន្តរជាតិនៃព្រះរាជាណាចក្រកម្ពុជា។

ជាមួយគ្នានោះដែរ លោក កន សម្បត្តិ បានលើកឡើងថា អនុលោមតាមមាត្រា២០៣ នៃច្បាប់ស្តីពីសារពើ​ពន្ធបានចែងថា ១. បុគ្គលទាំងឡាយត្រូវចុះបញ្ជីនៅរដ្ឋបាលសារពើពន្ធក្នុងអំឡុង ១៥ថ្ងៃក្រោយពីបុគ្គល​នោះចាប់ផ្តើមធ្វើសកម្មភាពសេដ្ឋកិច្ចឬសកម្មភាពផ្សេងទៀត រួមទាំងសកម្មភាពរបស់ស្ថាប័ន ឬអង្គការនានា។  ២. បុគ្គលទាំងឡាយត្រូវជូនដំណឹងទៅរដ្ឋបាលសារពើពន្ធ ក្នុងអំឡុងពេល ១៥ ថ្ងៃ ក្រោយពីការផ្លាស់ប្ដូរ អាសយដ្ឋាន ទ្រង់ទ្រាយ នាមករណ៍ កម្មវត្ថុអាជីវកម្ម ការផ្ទេរ ការបញ្ឈប់អាជីវកម្ម សមាសភាពអ្នកគ្រប់គ្រង ឬអ្នកទទួល បន្ទុកកិច្ចការពន្ធដាររបស់សហគ្រាស។

ទន្ទឹមនឹងនេះ លោក ទី សុខុន ប្រធាននាយកដ្ឋានគ្រប់គ្រងអ្នកជាប់ពន្ធតូច និងមធ្យម បាន ស្នើសុំនូវកិច្ច​សហការពីសមាគមអ្នកលក់យានយន្តកម្ពុជាផ្តល់នូវបញ្ជីឈ្មោះសមាជិកនៃសមាគមទាំងអស់ ដែលបាន​ចុះបញ្ជីពន្ធដាររួចរាល់ ដើម្បីឱ្យអគ្គនាយកដ្ឋានពន្ធដារផ្តល់នូវសេវាជូនអ្នកជាប់ពន្ធឱ្យកាន់តែមានប្រសិទ្ធភាពខ្ពស់៕

អត្ថបទ៖ ផល ធារិត