អង្គការអុកស្វាម-អង្គការ YEAC នឹងរៀបចំវេទិកាធុរកិច្ចអំពីការអភិវឌ្ឍ និងបញ្ហាប្រឈម​វិស័យ SME នៅកម្ពុជា

អង្គការអុកស្វាម និងសមាគមសហគ្រិនវ័យក្មេងកម្ពុជា (YEAC) នឹងរៀបចំវេទិកាធុរកិច្ចប្រកប​ដោយនិរន្តរភាព​ក្រោមប្រធានបទ «រួមគ្នាដើម្បីការលូតលាស់របស់សហគ្រាសធុនតូច និងមធ្យម នៅប្រទេសកម្ពុជា» ដើម្បីចែក​រំលែកចំណេះដឹង មេរៀនពិសោធន៍ និងបញ្ហាប្រឈមនៃការធ្វើធុរកិច្ចប្រកបដោយការទទួលខុសត្រូវ បរិយាបន្ន និងនិរន្តរភាព ក៏ដូចជាអនុសាសន៍គន្លឹះពីអ្នកជំនាញ និងវាគ្មិនដែលនឹងពិភាក្សាបន្ថែមទៅលើប្រធានបទនេះ។

បើតាមការប្រកាសព័ត៌មានរបស់អង្គការអុកស្វាម និងសមាគមសហគ្រិនវ័យក្មេងកម្ពុជា បញ្ជាក់ថា វេទិកានេះ នឹងរៀបចំឡើងនៅថ្ងៃទី ០៦ ខែ កក្កដា ឆ្នាំ ២០២៣​ សណ្ឋាគារអូកវូដព្រីមៀភ្នំពេញ។

អង្គការ Oxfam និង YEAC បានគូសបញ្ជាក់ថា ការអនុវត្តអាជីវកម្មប្រកបដោយនិរន្តរភាព​លើកកម្ពស់ការទទួល​ខុសត្រូវបរិស្ថាន ទំនួលខុសត្រូវសង្គម និងកំណើនសេដ្ឋកិច្ច។ ទន្ទឹមនឹងនេះ ការអនុវត្តអាជីវកម្មប្រកប​ដោយនិរន្តរភាព​អាចផ្តល់អត្ថប្រយោជន៍ដល់សង្គមយ៉ាងច្រើនតាមរយៈការដោះស្រាយបញ្ហាប្រឈមជាសកល ដូចជាការប្រែប្រួល​អាកាសធាតុ វិសមភាព និងភាពក្រីក្រ៕