មួយ​សប្តាហ៍ មាន​យានយន្ត​ជិត ៩ ម៉ឺន​គ្រឿង ធ្វើដំណើរលើផ្លូវល្បឿនលឿនភ្នំពេញ-ព្រះសីហនុ

យោងតាមរបាយការណ៍លំហូរចរាចរណ៍ប្រចាំសប្តាហ៍គិតចាប់ពីថ្ងៃទី២៦ ខែមិថុនា រហូតដល់ ថ្ងៃទី០២ ខែកក្កដា ឆ្នាំ២០២៣ មានយានយន្តបានធ្វើដំណើរលើផ្លូវល្បឿនលឿនសរុបចំនួន ៨៩ ០៤៧ គ្រឿង។ ក្នុងនោះក៏​មាន​បញ្ហាគ្រោះថ្នាក់ចរាចរណ៍ចំនួន ០១ ករណីផង​ដែរ។

​ការប្រើប្រាស់​នៅលើ​ផ្លូវ​ល្បឿនលឿន ក្រុមហ៊ុនបាន​អំពាវនាវដល់បងប្អូនប្រជាពលរដ្ឋកុំបើកបរលើសល្បឿនកំណត់ និងបើកបរបញ្ច្រាស​ទិស​​ចរាចរណ៍។

ទាក់ទង​ការ​អនុវត្ត​ច្បាប់​ចរាចរណ៍ ថ្មីៗ​នេះក្រសួងសាធារណការនិងដឹកជញ្ជូនបាន​​ក្រើន​រំលឹកដល់​បងប្អូនប្រជាពលរដ្ឋចូលរួមគោរពច្បាប់ចរាចរណ៍ឱ្យបានខ្ជាប់ខ្ជួន ជៀសវាងការប្រព្រឹត្តល្មើសនានា ដើម្បីសុវត្ថិភាពពេលធ្វើដំណើរនិងរក្សាបានសណ្តាប់ធ្នាប់ក្នុងទីសាធារណៈ។

ក្រសួង​បានលើកពី​​ករណី​បើកបរបញ្ច្រាសទិសចរាចរណ៍ ដែល​ជាការបំពានច្បាប់ចរាចរណ៍យ៉ាងធ្ងន់ធ្ងរនិងប្រមាថអាយុជីវិត​ខ្លួនឯងនិងអ្នកដទៃ។ នៅគ្រប់ស្ថានភាពផ្លូវយានយន្តគ្រប់ប្រភេទមិនត្រូវបើកបរបញ្ច្រាសទិសចរាចរណ៍​ជាដាច់ខាត។

​ជាមួយការក្រើនរំលឹក ក្រសួង​ក៏​បានចេញ​សារ​ព្រមាន​លើ​អ្នក​ល្មើស​បើ​យោងតាមមាត្រា៤៣ ជំពូកទី៧ នៃច្បាប់ស្ដីពីផ្លូវថ្នល់ឆ្នាំ ២០១៤ ការបើកបរបញ្រ្ចាស​ទិសចរាចរណ៍ នឹងត្រូវកាត់ ៤ពិន្ទុ ពីបណ្ណបើកបរ៕