អាជីវករផ្សារកែបថា នឹងទៅបោះឆ្នោត ដើម្បីកម្ពុជាបន្តការអភិវឌ្ឍ

ប្រជាពលរដ្ឋនៅក្នុងសង្កាត់កែប ក្រុងកែប និងអាជីវករផ្សារកែប បានលើកឡើងនៅថ្ងៃទី ១៧ ខែកក្កដា ឆ្នាំ២០២៣នេះថា បច្ចុប្បន្នកម្ពុជា ក្រោមការដឹកនាំរបស់រាជរដ្ឋាភិបាល មានការអភិវឌ្ឍរីកចម្រើនលើគ្រប់វិស័យ។

ដូចគ្នានេះដែរ ខេត្តកែបពីមួយឆ្នាំទៅមួយឆ្នាំបានកែប្រែផ្លាស់ប្តូរមុខមាត់ និងអភិវឌ្ឍន៍រីកចម្រើនគួរឲ្យកត់សំគាល់ផងដែរ។ក្រុមអាជីវករបានអះអាងថា នឹងទៅបោះឆ្នោតគាំទ្រគណបក្សប្រជាជនបន្តទៀត ព្រោះចង់ឃើញប្រទេស ក៏ដូចជាខេត្ត បន្តការអភិវឌ្ឍកាន់តែខ្លាំង។

អាជីវករបន្តថា កម្ពុជាក្រោមការដឹកនាំរបស់សម្តេចតេជោហ៊ុន សែន បាននាំមកនូវសុខសន្តិភាព សណ្តាប់ធ្នាប់ សុវត្ថិភាពសង្គមល្អប្រសើរ និងមានការអភិវឌ្ឍលើគ្រប់វិស័យ។ ទន្ទឹមនឹងនេះ ខេត្តកែបក្រោមការដឹកនាំរបស់​លោកអភិបាលខេត្ត សោម ពិសិដ្ឋ បានខិតខំផ្តល់សេវារដ្ឋបាល និងសេវាសាធារណៈផ្សេងៗ ព្រមជាមួយការ​អភិវឌ្ឍប្រព័ន្ធផ្លូវ ទឹក ភ្លើង មន្ទីរពេទ្យ សាលារៀនយ៉ាងច្រើនផងដែរ។

ជាងនេះទៅទៀត ក្នុងរយៈពេលប៉ុន្មានឆ្នាំចុងក្រោយនេះ  ខេត្តកែបបានបង្កើតជាកន្លែងកម្សាន្តជាច្រើន សម្រាប់ទាក់ទាញភ្ញៀវទេសចរជាតិ និងរអន្តរឲ្យមកលេងកម្សាន្តកាន់តែច្រើន ជួយជំរុញដល់ពលរដ្ឋ​ប្រកបរបររកស៊ីទទួលទានរបស់ប្រជាពលរដ្ឋទូទៅ ធ្វើឲ្យពួកគាត់មានជីវភាពកាន់តែប្រសើរជាលំដាប់ ។

យោងតាមការបញ្ជាក់របស់មន្ត្រីរៀបចំការបោះឆ្នោតខេត្ត បានឲ្យដឹងថា សម្រាប់ការបោះឆ្នោតជ្រើសរើសតំណាងរាស្ត្រ នីតិកាលទី ៧ ឆ្នាំ២០២៣នេះ  ខេត្តកែបមានគណបក្សនយោបាយឈរឈ្មោះចំនួន១០  ហើយខេត្តមានការិយាល័យ​ចំនួន៦៩ ពលរដ្ឋមានឈ្មោះក្នុងបញ្ជីចំនួន ២៨១៩៨ នាក់។ ចំណែកស្ថានភាពឃោសនារកសំឡេង​ឆ្នោតរបស់​គណបក្សនយោបាយមានភាពល្អប្រសើររហូតមកដល់ថ្ងៃទី១៧ ខែកក្កដានេះ។

អត្ថបទ ៖ សឹង រ៉ាត់