លោក ហង្ស ពុទ្ធា ៖ ការឃោសនាបោះឆ្នោតរយៈពេល២១ថ្ងៃ ប្រព្រឹត្តទៅដោយរលូន និងមានការយោគយល់គ្នាល្អ

លោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប) បានអះអាងថា យុទ្ធនាការឃោសនាបោះឆ្នោតរយៈពេល២១ថ្ងៃកន្លងមកទៅនេះ គឺមានដំណើរការយ៉ាងរលូន មានអធ្យាស្រ័យយោគយល់គ្នា និងមានការសហការបានយ៉ាងល្អពីភាគីពាក់ព័ន្ធផ្សេងៗទៀត។ លោកបានអះអាងបែបនេះនៅក្នុងសន្និសីទសារព័ត៌មានមួយនៅរសៀលថ្ងៃសុក្រនេះ នៅទីស្តីការគ.ជ.ប។​

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ អ្នកនាំពាក្យគណៈកម្មាធិការជាតិរៀបចំការបោះឆ្នោត(គ.ជ.ប) ក៏បានអះអាងដែរថា ដំណើរការរលូននៃយុទ្ធនាការឃោសនាបោះឆ្នោត គឺមានការចូលរួមសហការពីសំណាក់គណបក្សទាំង១៨ផងដែរ​។ បើតាមលោក ហង្ស ពុទ្ធា ការឃោសនាបោះឆ្នោតនៅក្នុងរយៈពេល២១ថ្ងៃនេះ គឺគណបក្សនយោបាយបានធ្វើផ្សព្វផ្សាយ និងឃោសនាបានដោយស្មើភាព និងតម្លាភាព។

សូមបញ្ជាក់ថា ថ្ងៃទី២១ ខែកក្តដានេះ គឺជាថ្ងៃចុងក្រោយនៃយុទ្ធនាការឃោសនាបោះឆ្នោតជ្រើសតាំងតំណា​ងរាស្រ្ត នីតិកាលទី៧។ ដូច្នេះហើយ គណៈកម្មាធិការជាតិរៀបចំការបោះឆ្នោត(គ.ជ.ប) បានតម្រូវឲ្យគ្រប់គណបក្សនយោបាយទាំងអស់ បញ្ឈប់រាល់សកម្មភាពទាំងអស់នៅត្រឹមម៉ោង១០យប់ថ្ងៃសុក្រនេះ។ ជាមួយគ្នានេះ ប្រព័ន្ធផ្សព្វផ្សាយនានាក៏ត្រូវបញ្ឈប់ការផ្សព្វផ្សាយពាក់ព័ន្ធនឹងគណបក្សនយោបាយ និងគោលនយោបាយគណបក្សទាំង១៨ ត្រឹមម៉ោង១០យប់នេះដូចគ្នាផងដែរ៕