អូស្ត្រាលី ប្រកាសផ្តល់ជំនួយជាង ៨៣លានដុល្លារដល់កម្ពុជា ដើម្បីគាំទ្រដល់វិស័យសង្គម-សេដ្ឋកិច្ច

រដ្ឋាភិបាលអូស្ត្រាលី បានប្រកាសផ្ដល់ជំនួយអភិវឌ្ឍន៍ផ្លូវការចំនួនជាង ៨៣លានដុល្លារអូស្រា្តលីដល់កម្ពុជា ដើម្បីគាំទ្រដល់ការរីកចម្រើនផ្នែកសេដ្ឋកិច្ច និងសង្គមរបស់កម្ពុជា។ នេះបើតាមសេចក្ដីប្រកាសរបស់ក្រសួងការបរទេសកម្ពុជា នៅរសៀលថ្ងៃទី២៥ ខែកក្កដានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងការបរទេស បានឱ្យដឹងដូច្នេះថា «អូស្រ្តាលីនឹងផ្តល់ជំនួយអភិវឌ្ឍន៍ផ្លូវការចំនួន ៨៣,៦លានដុល្លារអូស្រា្តលីដល់កម្ពុជា ក្នុងឆ្នាំ២០២៣-២០២៤ ដែលក្នុងនោះ ជំនួយប្រមាណ ៤៧,៩លានដុល្លារអូស្រា្តលី សម្រាប់ក្របខណ្ឌទ្វេភាគី ខណៈទឹកប្រាក់នៅសល់ត្រូវផ្តល់តាមរយៈកម្មវិធីសកល និងតំបន់។ បើប្រៀបធៀបឆ្នាំ២០២២-២០២៣ ជំនួយអភិវឌ្ឍន៍សម្រាប់ឆ្នាំ២០២៣-២០២៤នេះ មានការកើនឡើង ពោលគឺនៅឆ្នាំ២០២២-២០២៣ មានត្រឹមចំនួន ៨០,៨ លានដុល្លារអូស្រា្តលី។

ការប្រកាសផ្ដល់ជំនួយនេះ ធ្វើឡើងតាមការបញ្ជាក់នៅក្នុងលិខិតរួមថ្មីៗនេះរបស់លោកស្រី ផេននី វង រដ្ឋមន្ត្រីការបរទេស និងលោក ផាត ខន់រ៉យ រដ្ឋមន្ត្រីអភិវឌ្ឍន៍អន្ដរជាតិ និងប៉ាស៊ីហ្វិក និងជា​រដ្ឋមន្ត្រី​ឧស្សា​ហ​កម្ម​សម្រាប់វិស័យ​ការពារជាតិរបស់អូស្ដ្រាលី ផ្ញើជូនលោក ប្រាក់ សុខុន រដ្ឋមន្រ្តីការបរទេសកម្ពុជា។

ជំនួយអភិវឌ្ឍន៍របស់អូស្ត្រាលី ដែលស្របតាមការខិតខំប្រឹងប្រែងរបស់កម្ពុជា និងផែនការយុទ្ធសាស្រ្តអភិវឌ្ឍន៍ជាតិ នឹងបន្តគាំទ្រដល់ការរីកចម្រើនផ្នែកសេដ្ឋកិច្ច និងសង្គមរបស់កម្ពុជា តាមរយៈការបង្កើនការទទួលបាននិងបទដ្ឋាននៃសេវាសាធារណៈ ការលើកកម្ពស់ការតភ្ជាប់ហេដ្ឋារចនាសម្ព័ន្ធ ការជួយសម្រួលដល់កំណែទម្រង់ និងវិនិយោគលើវិស័យថែទាំសុខភាព និងការរួមចំណែកបង្កើតប្រព័ន្ធគាំពារសង្គម ដែលផ្តោតសំខាន់ជាពិសេសលើស្ត្រី និងជនពិការ។

ជាមួយគ្នានេះ រដ្ឋាភិបាលអូស្ត្រាលីក៏បានបញ្ជាក់ពីការប្តេជ្ញាចិត្តក្នុងការគាំទ្រដល់មហិច្ឆតារបស់កម្ពុជា ហើយត្រៀមខ្លួនបន្តធ្វើការយ៉ាងជិតស្និទ្ធជាមួយរាជរដ្ឋាភិបាលកម្ពុជា ដើម្បីលើកកម្ពស់ការងារអាទិភាពរួមគ្នានៃប្រទេសទាំងពីរ។

កម្ពុជាបានថ្លែងអំណរគុណចំពោះការបន្តផ្តល់ជំនួយអភិវឌ្ឍន៍ផ្លូវការរបស់អូស្ត្រាលីដល់កម្ពុជា ក្នុងរយៈពេលប៉ុន្មានឆ្នាំកន្លងមកនេះ បើទោះបីជាសេដ្ឋកិច្ចរបស់ប្រទេសអូស្ត្រាលីរងផលប៉ះពាល់អវិជ្ជមានយ៉ាងធ្ងន់ធ្ងរពីជំងឺរាតត្បាតសកល កូវីដ-១៩ ក៏ដោយក្ដី។ ក្រសួងការបរទេសកម្ពុជា ចាត់ទុកកាយវិការនេះ គឺជាសក្ខីភាពដ៏ច្បាស់លាស់មួយចំពោះភាពរឹងមាំនៃទំនាក់ទំនងមិត្តភាព និងសាមគ្គីភាពដ៏ជ្រាលជ្រៅរវាងកម្ពុជា និងអូស្ត្រាលី៕​