អ្នកនាំពាក្យ ៖ គ.ជ.ប មិនទទួលបានបណ្ដឹងណាមួយ ពាក់ព័ន្ធនឹងភាពមិនប្រក្រតីនៅថ្ងៃបោះឆ្នោត នោះទេ

មន្ត្រីជាន់ខ្ពស់ គ.ជ.ប អះអាងថា គ.ជ.ប មិនទទួលបានបណ្ដឹងណាមួយ ពាក់ព័ន្ធនឹងភាពមិនប្រក្រតីនៅថ្ងៃបោះឆ្នោត និងការប្រកាសលទ្ធផលបឋម នៃការបោះឆ្នោតនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ បានប្រព្រឹត្តទៅនៅថ្ងៃអាទិត្យ ទី ២៣ ខែកក្កដា ឆ្នាំ ២០២៣។ គ.ជ.ប បានឲ្យដឹងថា ប្រជាពលរដ្ឋខ្មែរដែលមានឈ្មោះក្នុងបញ្ជីបោះឆ្នោតចំនួន ៨,​២១៣​,២៦០នាក់ ស្មើនឹង ៨៤.៥៨ភាគរយ បានចេញទៅបោះឆ្នោត កាលពីថ្ងៃអាទិត្យ ទី ២៣ ខែកក្កដា ឆ្នាំ ២០២៣កន្លងទៅនេះ។

លោក សោម សូរីដា អគ្គលេខាធិការរង និងជាអ្នកនាំពាក្យ គ.ជ.ប មានប្រសាសន៍ប្រាប់កម្ពុជាថ្មី នៅថ្ងៃទី ២៦ ខែកក្កដានេះថា បណ្ដឹងពាក់ព័ន្ធនឹងលទ្ធផលបឋមនៃការបោះឆ្នោត ឬក៏ភាពមិនប្រក្រតី ដែលកើតឡើងនៅការិយាល័យបោះឆ្នោត និងរាប់សន្លឹកឆ្នោត គឺអាចប្ដឹងនៅថ្ងៃបោះឆ្នោត និងយ៉ាងយូរត្រឹមម៉ោង ១១ និង៣០នាទី នៃថ្ងៃបន្ទាប់ពីថ្ងៃបោះឆ្នោត។

លោកថា «បានន័យថា ម៉ោង ១១ និង ៣០នាទី ថ្ងៃទី ២៤ ខែកក្កដា ឆ្នាំ ២០២៣ អញ្ចឹងអំឡុងពេលដែលខ្ញុំបញ្ជាក់អំបាញ់មិញនេះ អត់មានបណ្ដឹងពាក់ព័ន្ធនឹងភាពមិនប្រក្រតី ដែលធ្វើឲ្យប៉ះពាល់ដល់លទ្ធផលនៃការបោះឆ្នោតទេ»។

លោក សោម សូរីដា ក៏បានឲ្យដឹងដែរថា ចំពោះសកម្មភាពញុះញង់បំផ្លាញការបោះឆ្នោត នៅក្នុង Channel Telegram ឈ្មោះថា «Sabai សប្បាយ» នោះ គឺ គ.ជ.ប មិនទាន់បានទទួលពាក្យបណ្ដឹងនៅឡើយទេ។ លោកថា «ករណីបទញុះញង់ដែលបានបង្ហោះនៅលើ Channel Telegram ឈ្មោះថា «Sabai សប្បាយ» គឺ គ.ជ.ប មិនទាន់បានទទួលពាក្យបណ្ដឹងនោះទេ រហូតមកដល់ពេលនេះ អត់ទាន់ទទួលបានពាក្យបណ្ដឹងនោះទ»។

នៅក្នុងសារជាសំឡេង កាលពីថ្ងៃទី ២៣ ខែកក្កដា ឆ្នាំ ២០២៣ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានប្រាប់ឲ្យមុខសញ្ញាដែលធ្វើសកម្មភាពញុះញង់បំផ្លាញការបោះឆ្នោត នៅក្នុង Channel Telegram ឈ្មោះថា «Sabai សប្បាយ» ចេញមុខមកសារភាពជាមួយនឹងអាជ្ញាធរ បើមិនដូច្នេះទេនឹងត្រូវចាត់វិធានការទៅតាមផ្លូវច្បាប់។

សម្ដេចតេជោ ហ៊ុន សែន មានប្រសាសន៍បែបនេះថា «អ្នកអាចចេញមកធ្វើការសារភាពជាមួយនឹងអាជ្ញាធរ ជាមួយនឹងគណៈកម្មាធិការជាតិរៀបចំការបោះឆ្នោត ជាពិសេសជាមួយនឹងអាជ្ញាធរ ព្រោះចលនាបំផ្លាញសន្លឹកឆ្នោត គឺជាបទល្មើសដែលត្រូវតែផ្ដន្ទាទោស អ្នកដឹងខ្លួនសូមឲ្យប្រញ៉ាប់ប្រញ៉ាលចេញមកសារភាពជាមួយនឹងអាជ្ញាធរ នៅកន្លែងដែលកៀកបំផុត»។

បន្ទាប់ពីមានការផ្ដល់ឱកាសពីសម្ដេចតេជោ ហ៊ុន សែន រួចមក គេសង្កេតឃើញមុខសញ្ញាដែលធ្វើសកម្មភាពញុះញង់បំផ្លាញការបោះឆ្នោត នៅក្នុង Channel Telegram ឈ្មោះថា «Sabai សប្បាយ» បានចេញមុខសារភាព នៅចំពោះមុខអាជ្ញាធរមានសមត្ថកិច្ច ជាបន្តបន្ទាប់៕