ព្យុះទី៥ មិនរំខានដល់ពលរដ្ឋក្នុងការនេសាទនៅខេត្តកំពត

លោក ស សរិន នាយខណ្ឌរដ្ឋបាលជលផលខេត្តកំពតបានប្រាប់ឲ្យដឹងថា ស្ថានភាពធាតុអាកាសនៅក្នុងខេត្តកំពត មានភាពល្អប្រសើរខុសពីប៉ុន្មានថ្ងៃកន្លងទៅ អាកាសធាតុអាប់អួរមានភ្លៀងធ្លាក់រាយប៉ាយគ្រប់តំបន់។ ជាក់ស្ដែងកាលពីម្សិលមិញនេះ ប្រជាពលរដ្ឋជាអ្នកនេសាទបានចេញទៅនេសាទច្រើនដូចសព្វដងគ្មានការរំខានដោយសារអាកាសធាតុនោះឡើយ។

តាមសេចក្តីជូនដំណឹងស្តីពីស្ថានភាពធាតុអាកាសរបស់ក្រសួងធនធានទឹក និងឧតុនិយម កម្ពុជានឹងទទួលឥទ្ធិពលពីប្រព័ន្ធសម្ពាធទាបនិងព្យុះទី ៥ (TY DOKSURI) ប៉ុន្តែសម្រាប់ខេត្តកំពត ធាតុអាកាសមានភាពល្អប្រសើរនៅឡើយ។ មន្ត្រីជំនាញថាប្រជានេសាទនៅតែបន្តចេញទៅនេសាទតាមធម្មតា គ្មានការរំខានដោយសារអាកាសធាតុនោះទេ ប៉ុន្តែប្រជានេសាទត្រូវមានការប្រុងប្រយ័ត្នខ្ពស់អំឡុងពេលនេះ។

លោក ស សុរិន នាយខណ្ឌរដ្ឋបាលជលផលខេត្តកំពតបានបញ្ជាក់ឲ្យដឹងថា សម្រាប់ខេត្តកំពតមានទីតាំងភូមិសាស្ត្រអំណោយផលបានល្អណាស់ ដោយសារការនេសាទនៅជិតៗតំបន់ឆ្នេរទឹករាក់ និងមានកោះត្រល់បាំងខ្យល់ និងរលក ដូច្នេះហើយមិនបង្កជាបញ្ហាធ្ងន់ធ្ងរទៅដល់ប្រជានេសាទទេ ក្នុងករណីដែលមានធាតុអាកាស ព្យុះភ្លៀងកើតឡើងក៍ប្រជានេសាទអាចវិលត្រឡប់មកឆ្នេរវិញបានទាន់ពេល។

ម្យ៉ាងទៀតវិញនោះប្រជាពលរដ្ឋភាគច្រើន គាត់ចេះមើលជើងខ្យល់ ដឹងថាពេលណាខ្យល់តិច ពេលណាខ្យល់ខ្លាំង។

ទោះជាប្រព័ន្ធសម្ពាធទាប និងព្យុះទី៥ (TY DOKSURI) មិនទាន់ជះឥទ្ធិពលលើធាតុអាកាសនៅខេត្តកំពតក៏ដោយ មន្ត្រីជលផលបានធ្វើការផ្សព្វផ្សាយអំពីការព្យាករណ៍ស្ថានភាពធាតុកាស ទៅដល់សហគមន៍នេសាទទាំង ៩ នៅទូទាំងខេត្តកំពតរួចហើយ ដើម្បីផ្សព្វផ្សាយបន្តធ្វើយ៉ាងណាឲ្យប្រជានេសាទមានការប្រុងប្រយ័ត្ន និងអាចការពារខ្លួនឲ្យមានសុវត្ថិភាពនៅពេលចេញទៅនេសាទនៅសមុទ្រ៕

អត្ថបទ៖​ សឹង រ៉ាត់