កម្ពុជាធ្វើជាម្ចាស់ផ្ទះបើកវគ្គបណ្តុះបណ្តាលជំនាញប្រព័ន្ធបញ្ជាច្រវ៉ាក់ផលិតកម្មរោងចក្រដល់គ្រូបង្គោល និងសិស្សមកពីអាស៊ាន

ក្រសួងការងារនិងបណ្តុះបណ្តាលវិជ្ជាជីវៈ សហការជាមួយសភាពាណិជ្ជកម្មនិងឧស្សាហកម្មកូរ៉េ (KCCI) ក្រោមគម្រោង ASEAN-ROK TVET Mobility Programme បានរៀបចំបើកវគ្គបណ្តុះបណ្តាលស្តីពី “Sequence Control” ឬប្រព័ន្ធបញ្ជាច្រវ៉ាក់ផលិតកម្មរោងចក្រដល់គ្រូបង្គោលនិងសិស្សមកពីប្រទេសចំនួន៥មកពីតំបន់អាស៊ានដើម្បីលើកកម្ពស់ជំនាញបច្ចេកទេសឱ្យដើរទាន់ឧស្សាហ៍កម្ម ៤.០។

ថ្លែងនៅក្នុងពិធីបើកវគ្គបណ្តុះបណ្តាលស្តីពីប្រព័ន្ធបញ្ជាច្រវ៉ាក់ផលិតកម្មរោងចក្រនៅព្រឹកថ្ងៃទី២៨កក្កដានេះនៅសណ្ឋាគារ​កាំបូឌីយ៉ាណា លោក ហ៊ីង ស៊ីដេត ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានអប់រំបណ្តុះបណ្តាលបច្ចេកទេសនិងវិជ្ជាជីវៈនៃក្រសួងការងារនិងបណ្តុះបណ្តាលវិជ្ជាជីវៈបានមានប្រសាសន៍ថាគោលបំណងនៃវគ្គបណ្តុះបណ្តាលនេះធ្វើឡើងដើម្បីផ្តល់នូវចំណេះដឹង និងជំនាញក្នុងការសរសេរកម្មវិធី PLC program ដើម្បីធ្វើឱ្យប្រតិបត្តិការនៃប្រព័ន្ធគ្រប់គ្រងស្វ័យប្រវត្តិកម្មនៅក្នុងគម្រោងឧស្សាហកម្ម ឬខ្សែច្រវ៉ាក់ផលិតកម្មប្រកបដោយប្រសិទ្ធភាព ចំណេញពេលវេលា និងសន្សំសំចៃជាពិសេសដើម្បីលើកកម្ពស់ជំនាញបច្ចេកទេសឱ្យដើរទាន់ឧស្សាហ៍កម្ម៤.០។

លោកបានបន្តថា វគ្គបណ្តុះបណ្តាលនេះមានរយៈពេល៣ខែ ចាប់ពីថ្ងៃទី១១ ខែកក្កដា ឆ្នាំ២០២៣ ដល់ថ្ងៃទី៨ ខែតុលា
ឆ្នាំ២០២៣ដោយមានសិក្ខាកាមចូលរួមចំនួន២៥នាក់ក្នុងនោះសិក្ខាកាមជាគ្រូចំនួន៧ នាក់ និងសិស្សចំនួន១៨នាក់
មកពី៥ប្រទេសផ្សេងគ្នាក្នុងនោះ៧ នាក់មកពីប្រទេសកម្ពុជា ២នាក់មកពីព្រ៊ុយណេ៥នាក់មកពីឥណ្ឌូនេស៊ី ៦នាក់មកពីភូមានិង៥នាក់មកពីហ្វីលីពីន។

លោកបានបន្តទៀតថា វគ្គបណ្តុះបណ្តាលនេះមានសិក្សាទ្រឹស្តី និងអនុវត្តក្នុងវិទ្យាស្ថានពហុបច្ចេកទេសព្រះកុសុមៈរយៈពេល២ខែនិងចុះហាត់ការនៅក្រុមហ៊ុនចំនួន១ខែ នៅក្រុមហ៊ុនចំនួន២ គឺ មីនេប៊ែ និងក្រុមហ៊ុន វីតាល់។

គួរបញ្ជាក់ថាគម្រោង “ASEAN-ROK TVET Mobility Programmes” ត្រូវបានរៀបចំឡើងដើម្បីពង្រឹងកម្មវិធី TVET ក្នុងបណ្តាលប្រទេសជាសមាជិកអាស៊ាននិងកាត់បន្ថយគម្លាតនៃសមត្ថភាពការងារក្នុងចំណោមប្រទេសនានានៃតំបន់អាស៊ាន៕

អត្ថបទ៖ សំអឿន