មកដឹងសក្តានុពលរបស់ខេត្តព្រះសីហនុដែលកំពុងទាក់ទាញវិនិយោគអន្តរជាតិ និងទេសចរណ៍​

ខេត្តព្រះសីហនុមានសក្តានុពលរួមមាន ធនធានធម្មជាតិតំបន់ឆ្នេរ ហេដ្ឋារចនាសម្ព័ន្ធផ្លូវថ្នល់ សកម្មភាពទេសចរណ៍ ការគ្រប់គ្រងបរិស្ថាន គម្រោងវិនិយោគនានាក្នុងខេត្តទ្វេពាណិជ្ជកម្មដ៏សំខាន់របស់ខេត្ត និងប្រទេសកម្ពុជា។ នេះជាការ​បញ្ជាក់របស់លោក ឯម ភាព អភិបាលរងខេត្តព្រះសីហនុ នៅក្នុងជំនួបជាមួយសហព័ន្ធធុរកិច្ចសិង្ហបុរី កាលពីថ្ងៃទី ០៤ សីហា។

លោក ឯម ភាព បាន បានបន្តប្រាប់សហព័ន្ធធុរកិច្ចសិង្ហបុរីទៀតថា ខេត្តព្រះសីហនុមានកំពង់ផែអន្តរជាតិទឹកជ្រៅ​ក្នុងប្រទេស មានហេដ្ឋារចនាសម្ព័ន្ធផ្លូវទឹក ផ្លូវដែក ផ្លូវគោក ផ្លូវអាកាស និងមានផ្លូវល្បឿនលឿន ជាសរសៃឈាម​សេដ្ឋកិច្ចថ្មី​នៅ​ភាគនិរតីនៃប្រទេសកម្ពុជា។

លើសពីនេះទៀត មួយរយៈពេលចុងក្រោយនេះខេត្តព្រះសីហនុ មានកំណើនសេដ្ឋកិច្ច និងកំណើនប្រជាជនយ៉ាង​ឆាប់រហ័សស្របជាមួយនឹងការផ្លាស់ប្ដូរយ៉ាងខ្លាំង ពិសេសលើហេដ្ឋារចនាសម្ព័ន្ធហើយ​វិស័យចម្បងក្នុងការអភិវឌ្ឍន៍​ខេត្តរួមមាន វិស័យឧស្សាហកម្ម ពាណិជ្ជកម្ម ទេសចរណ៍ និងកសិកម្ម ហិរញ្ញវត្ថុអប់រំ និងបណ្ដុះបណ្ដាលវិជ្ជាជីវៈ សំណង់ និងអចលនទ្រព្យ ជាដើម។

លោកបានបញ្ជាក់បន្ថែមថា ដើម្បីអភិវឌ្ឍន៍ខេត្តព្រះសីហនុទៅជាតំបន់សេដ្ឋកិច្ចពិសេសគំរូពហុបំណងដោយ​សិក្សាបែង​ចែកជាតំបន់ លំនៅដ្ឋាន ពាណិជ្ជកម្ម ឧស្សាហកម្ម រដ្ឋបាលទេសចរណ៍ តំបន់សាសនា និងវប្បធម៌ជាដើម ដែល​ផែនការនេះ មានគោលបំណងប្រែក្លាយក្រុងព្រះសីហនុទៅជាទីក្រុងប្រកួតប្រជែងសាកលលោកមានភាពរីកចម្រើន និងពហុវប្បធម៌តាមរយៈការទាក់ទាញវិនិយោគពីបរទេសក៏ដូចជាភ្ញៀវទេសចរណ៍។

អ្នកវិនិយោគអាចពិចារណាលើការវិនិយោគមួយចំនួននៅខេត្តព្រះសីហនុ រួមមាន គម្រោងទីក្រុងឆ្លាតវៃ។ លោកអភិបាល​រងខេត្ត«បច្ចុប្បន្នយើងក៏រកដៃគូទទួលគម្រោងអភិវឌ្ឍន៍ចំណតឆ្លាតវៃនៅមុខផ្សារលើ ពាក់ព័ន្ធគម្រោងទីក្រុងឆ្លាត​វៃយើងត្រូវ​ការ​​សេវាកម្មជាច្រើនមកជួយទីក្រុងរបស់យើងទាំងអ្នកជំនាញបច្ចេកវិទ្យាឌីជីថល ការអភិវឌ្ឍន៍ទីក្រុង​ទាំងការអនុវត្តគម្រោងអាទិភាពដូចជាការគ្រប់គ្រងសំរាមឆ្លាតវៃគម្រោងអប់រំ គម្រោងថែទាំសុខ​ភាពនិងប្រព័ន្ធទឹក​ភ្លើងឆ្លាតវ័យជាដើម»។

នៅក្នុងដំណើរទស្សនកិច្ចនៅខេត្តព្រះសីហនុនាពេលនេះ លោក ហ្គារី លីម ប្រធានសហព័ន្ធធុរកិច្ចសិង្ហបុរី អមដំណើរ​ដោយលោក ម៉ៃ ខិលតាន់ នាយកប្រតិបត្តិ Aquarii BD Cambodia បានវាយតម្លៃខ្ពស់ចំពោះ​ការដឹកនាំរបស់​ខេត្តព្រះ​សីហនុដែលមានការអភិវឌ្ឍយ៉ាងឆាប់រហ័សមិនតែប៉ុណ្ណោះខេត្តព្រះសីហនុ គឺជាខេត្តដែលមាន​សក្តានុពល​ជាច្រើនសម្រាប់ទាក់ទាញភ្ញៀវទេសចរណ៍ និងអ្នកវិនិយោគ មកបណ្ដាក់ទុនហើយ​ចំពោះដំណើរ​ទស្សនកិច្ចនេះ លោកមានការចាប់អារម្មណ៍​ជាច្រើនចំពោះការធ្វើបទបង្ហាញរបស់ថ្នាក់ដឹកនាំខេត្តអំពីសក្តានុពល និងការអភិវឌ្ឍ​របស់ខេត្តព្រះសីហនុនា​ពេលបច្ចុប្បន្ន៕