ព័ត៌មានជាតិ

ក្រុមប្រឹក្សានីតិកម្មក្រសួងមហាផ្ទៃ មាន ៥ អង្គភាពចំណុះ ដឹកនាំដោយប្រធានមួយរូបមានឋានៈស្មើអនុរដ្ឋលេខាធិការ

បានផុស

៣ years មុន

នៅ

ថ្ងៃព្រហស្បតិ៍ ១០ សីហា ២០២៣

ដោយ

ក្រុមប្រឹក្សានីតិកម្មក្រសួងមហាផ្ទៃ ជាសេនាធិការជូនរដ្ឋមន្ត្រីក្រសួងមហាផ្ទៃ។ ក្រុមប្រឹក្សានីតិកម្មដឹកនាំដោយលោក ហ៊ន យុវនា ឋានន្តរស័ក្តិឧត្តមមន្ត្រីថ្នាក់លេខ១ ជាប្រធានក្រុមប្រឹក្សានីតិកម្មដែលមានឋានៈស្មើអនុរដ្ឋលេខាធិការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមប្រឹក្សានីតិកម្មមានភារកិច្ចដូចខាងក្រោម៖

– សហការជាមួយអង្គភាពពាក់ព័ន្ធចំណុះក្រសួងមហាផ្ទៃ ក្នុងការលើកផែនការកសាង សិក្សាស្រាវជ្រាវ តាក់តែងសេចក្តីព្រាងច្បាប់ លិខិតបទដ្ឋានគតិយុត្ត និងឯកសារចាំបាច់ផ្សេងទៀតរបស់ក្រសួងមហាផ្ទៃឱ្យស្របតាមទិសដៅនៃកម្មវិធីនយោបាយរបស់រាជរដ្ឋាភិបាល
– សហការជាមួយអគ្គនាយកដ្ឋាន និងអង្គភាពចំណុះក្រសួងមហាផ្ទៃ ក្នុងការកសាងបញ្ជីផែនការច្បាប់និងលិខិតបទដ្ឋានគតិយុត្តនានា
– តាមការប្រគល់សិទ្ធិពីរដ្ឋមន្ត្រីក្រសួងមហាផ្ទៃ ក្រុមប្រឹក្សានីតិកម្មមានភារកិច្ចសហការជាមួយបណ្តាក្រសួង ស្ថាប័ន និងអង្គការជាតិអន្តរជាតិ សិក្សាស្រាវជ្រាវនិងលើកគម្រោងតាក់តែងសេចក្តីព្រាងច្បាប់ និងលិខិតបទដ្ឋានគតិយុត្តនានា
– ពិនិត្យ និងកែសម្រួលខ្លឹមសារសេចក្តីព្រាងច្បាប់ និងលិខិតបទដ្ឋានគតិយុត្តនានារបស់អង្គភាពចំណុះក្រសួងមហាផ្ទៃ បានតាក់តែងរួចហើយ មុនដាក់ឆ្លងរដ្ឋមន្ត្រីក្រសួងមហាផ្ទៃ
– សហការតាមដាន ត្រួតពិនិត្យ ដីកា និងសេចក្តីសម្រេចនានារបស់រដ្ឋបាលថ្នាក់ក្រោមជាតិ ដើម្បីលើកសំណើសុំកែសម្រួលឱ្យស្របតាមច្បាប់និងលិខិតបទដ្ឋានគតិយុត្ត
– សិក្សាស្រាវជ្រាវច្បាប់ និងលិខិតបទដ្ឋានគតិយុត្តទាំងឡាយដែលមិនទាន់ស្របតាមទិសដៅនិងគោលនយោបាយរបស់រាជរដ្ឋាភិបាល ដើម្បីលើកយោបល់ជូនរដ្ឋមន្ត្រីក្រសួងមហាផ្ទៃធ្វើការកែសម្រួលឬធ្វើវិសោធនកម្មឱ្យស្របតាមការអភិវឌ្ឍរបស់ប្រទេសជាតិ
– សិក្សាលើកយោបល់ជូនថ្នាក់ដឹកនាំក្រសួងមហាផ្ទៃលើសេចក្តីព្រាងច្បាប់ និងលិខិតបទដ្ឋានគតិយុត្តនានាដែលពាក់ព័ន្ធក្រសួងមហាផ្ទៃ
– តាមដានលើការអនុវត្តនិងទទួលផ្សព្វផ្សាយច្បាប់លិខិតបទដ្ឋានគតិយុត្ត ដែលពាក់ព័ន្ធសមត្ថកិច្ចរបស់ក្រសួងមហាផ្ទៃ
– រៀបចំបំពេញបែបបទក្នុងការបញ្ជូនសេចក្តីព្រាងច្បាប់ និងលិខិតបទដ្ឋានគតិយុត្តទៅរាជរដ្ឋាភិបាល ក្រោយមានការសម្រេចពីរដ្ឋមន្ត្រីក្រសួងមហាផ្ទៃ
– សិក្សាស្រាវជ្រាវតាក់តែងសេចក្តីព្រាងច្បាប់ និងលិខិតបទដ្ឋានគតិយុត្តនានាតាមការចាត់តាំងរបស់រដ្ឋមន្រ្តីក្រសួងមហាផ្ទៃ
-ចូលរួមជាមួយក្រសួង ស្ថាប័ន និងក្រុមការងារនានា ក្នុងការតាក់តែងសេចក្តីព្រាងច្បាប់និងលិខិតបទដ្ឋានគតិយុត្តនានាតាមការចាត់តាំងរបស់រដ្ឋមន្រ្តីក្រសួងមហាផ្ទៃ
– សហការរៀបចំការបណ្តុះបណ្តាលធនធានមនុស្ស ដល់មន្ត្រីក្រោមឱវាទរបស់ក្រុមប្រឹក្សានីតិកម្ម លើការងារជំនាញច្បាប់ និងលិខិតបទដ្ឋានគតិយុត្ត
– គ្រប់គ្រងបណ្ណាល័យរបស់ក្រសួងមហាផ្ទៃ
– បែងចែកសៀវភៅរាជកិច្ចជូនគ្រប់អង្គភាពចំណុះក្រសួងមហាផ្ទៃ និងរដ្ឋបាលថ្នាក់ក្រោមជាតិទាំង ផ្នែករដ្ឋបាលស៊ីវិល ផ្នែកនគរបាលជាតិ និងផ្នែកពន្ធនាគារ
– ចងក្រង បោះពុម្ពឯកសារច្បាប់ និងលិខិតបទដ្ឋានគតិយុត្តសម្រាប់ចែកចាយនិងផ្សព្វផ្សាយ
– ស្នើសុំតែងតាំង ឬផ្លាស់ប្តូរភារកិច្ច ដំឡើងឋានន្តរស័ក្តិ ថ្នាក់ លើកសរសើរ ឬដាក់វិន័យមន្ត្រីនគរបាល មន្ត្រីរាជការស៊ីវិលនៃក្រុមប្រឹក្សានីតិកម្ម តាមបែបបទនិងនីតិវិធីជូនរដ្ឋមន្ត្រីក្រសួងមហាផ្ទៃពិនិត្យសម្រេច
– ធ្វើរបាយការណ៍បូកសរុបលទ្ធផលការងារ និងទិសដៅបន្តរបស់ក្រុមប្រឹក្សានីតិកម្មតាមការកំណត់ជូនរដ្ឋមន្ត្រីក្រសួងមហាផ្ទៃ
– ទទួលអនុវត្តភារកិច្ច និងសិទ្ធិផ្សេងៗទៀតដែលរដ្ឋមន្ត្រីក្រសួងមហាផ្ទៃប្រគល់ឱ្យ

ក្រុមប្រឹក្សានីតិកម្មដឹកនាំដោយប្រធានមួយរូប មានឋានៈនិងបុព្វសិទ្ធិស្មើអនុរដ្ឋលេខាធិការ និងមានអនុប្រធានមានឋានៈនិងបុព្វសិទ្ធិស្មើអគ្គនាយកជាជំនួយការតាមការកំណត់។ សមាជិកក្រុមប្រឹក្សានីតិកម្មមានឋានៈ និងបុព្វសិទ្ធិស្មើប្រធាននាយកដ្ឋាននៃអគ្គនាយកដ្ឋានចំណុះក្រសួងមហាផ្ទៃ។

លោក ហ៊ន យុវនា ប្រធានក្រុមប្រឹក្សានីតិកម្មក្រសួងមហាផ្ទៃ

សមាជិកក្រុមប្រឹក្សានីតិកម្មម្នាក់ៗត្រូវបានចាត់តាំងបញ្ចូលទៅក្នុងក្រុមស្រាវជ្រាវនីមួយៗ។ ក្រុមស្រាវជ្រាវនីមួយៗដឹកនាំដោយអនុប្រធានក្រុមប្រឹក្សានីតិកម្ម។

ប្រធានក្រុមប្រឹក្សានីតិកម្មមានសិទ្ធិអញ្ជើញប្រធានអង្គភាពនានាក្រោមឱវាទក្រសួងមហាផ្ទៃ មកចូលរួមពិនិត្យពិភាក្សាលើការកែសម្រួល ឬសេចក្តីព្រាងច្បាប់និងលិខិតបទដ្ឋានគតិយុត្តដែលពាក់ព័ន្ធ។

ក្រុមប្រឹក្សានីតិកម្ម មានរចនាសម្ព័ន្ធដូចខាងក្រោម៖

១- នាយកដ្ឋានរដ្ឋបាលសរុប

២- ក្រុមស្រាវជ្រាវច្បាប់ និងលិខិតបទដ្ឋានគតិយុត្តនគរបាលជាតិ

៣- ក្រុមស្រាវជ្រាវច្បាប់ និងលិខិតបទដ្ឋានគតិយុត្តរដ្ឋបាលស៊ីវិល

៤- ក្រុមស្រាវជ្រាវច្បាប់ និងលិខិតបទដ្ឋានគតិយុត្តក្រសួងស្ថាប័ននានា

៥- ក្រុមស្រាវជ្រាវច្បាប់ និងលិខិតបទដ្ឋានគតិយុត្តអន្តរជាតិ។

ការរៀបចំតួនាទី ភារកិច្ច រចនាសម្ព័ន្ធនិងរបៀបរបបធ្វើការងាររបស់ការិយាល័យចំណុះឱ្យនាយកដ្ឋាននៃក្រុមប្រឹក្សានីតិកម្ម ត្រូវកំណត់ដោយប្រកាសរបស់រដ្ឋមន្ត្រីក្រសួងមហាផ្ទៃ៕